މިއަހަރު ބާއްވާ ރިޔާސީ އިންތިޚާބުގައި އިދިކޮޅު ޕީޕީއެމްގެ ޓިކެޓްގައި ވާދަކުރައްވާ ރިޔާސީ ކެނޑިޑޭޓަކީ ރައީސް ޔާމީން ކަމަށާއި، އެމަނިކުފާނާއި ކުޅެން ނެހެއްދެވުމަށް އިދިކޮޅު ކޯލިޝަނުން ސަރުކާރަށް ގޮވާލައިފިއެވެ.

ޕީޕީއެމް އަދި ޕީއެންސީން "ދުއްޕާން" ގެ ނަމުގައި ބޭއްވި ޖަލްސާގެ ހުރިހާ ބައިވެރިން އަހުދުވެ ޔާމީން މިނިވަން ކުރުމަށް ހުވާކޮށްފައިވެއެވެ. މިއަހަރު ބާއްވާ ރިޔާސީ އިންތިހާބުގެ ވޯޓު ކަރުދާހުގައި ރައީސް ޔާމީނުގެ ނަން އޮންނާނެ ކަން ކަށަވަރު ކުރުމަށް ކުރަން ޖެހޭ ހުރިހާ ކަމެއް ކުރުމަށް "ދުއްޕާން"ގެ ނަމުގައި އެ ކޯލިޝަނުން ކުރިއަށް ގެންދާ ޖަލްސާގެ ހުރިހާ ބައިވެރިން ވަނީ އެ ހުވާގައި ބައިވެރިވެ އިގުރާރު ވެފައެވެ.

އަދުރޭ ވިދާޅުވި ގޮތުގައި ރިޔާސީ އިންތިހާބުގެ ވޯޓު ކަރުދާހުގައި ރައީސް ޔާމީނުގެ ނަންފުޅު އޮންނާނެއެވެ. ހެޔޮ ވެރިކަމުގެ ނިޒާމެއް މިޤައުމުގައި ޤާއިމުކުރި ރައީސަކީ ރައީސް ޔާމީނު ކަމަށް އޭނާ ވިދާޅުވިއެވެ. އަދުރޭ ވިދާޅުވި ގޮތުގައި ހޯޕް ކޮންފަރެންސް އިދިކޮޅު އެމްޑީޕީއަށް ހަޖަމެއް ނުކުރެވުނެވެ. ބަޔަކަށް ހަޖަމުނުކުރެވުނަސް އެކަން ހުއްޓާލާނީ ރައީސް ޔާމީން ވެރިކަމަށް އައުމުން ކަމަށް އަދުރޭ ވަނީ ވިދާޅުވެފައެވެ.

ގިނަ ބަޔަކު ބައިވެރިވި ޖަލްސާގައި އަބްރުއްރަހީމް ވަނީ އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާންގެ ޓްވީޓަކަށް ވެސް ރައްދު ދެއްވައިފަ އެވެ. އަބްދުއްރަހީމް ވިދާޅުވީ އެ ކޯލިޝަނުން މަސައްކަތް ކުރާނީ ޕީޕީއެމްގެ އަސްލު ދައްކަން ކަމަށެވެ. އެ އަސްލު ސައިޒު ފެންނައިރު އިމްރާން އޮންނަވާނީ ޖަލު ގޮޅީގައި ކަމަށް ވިދާޅުވިއެވެ.

ނަމަނަމަ ރައީސް ޔާމީން ކުޅެން ނުހައްދަވާތި. ނަހަދާތި. ރައީސް ޔާމީނާ ކުޅުމަކީ މި ގައުމުގެ މިނިވަންކަމާ ކުޅުން. ރައީސް ޔާމީން ކުޅުމަކީ އަޅުގަނޑުމެން ދިވެހި ރައްޔިތުންގެ ލެއާ ކުޅުން. ރައީސް ޔާމީނާ ކުޅުމަކީ މި ގައުމުގެ މާދަމާގެ މުސްތަގުބަލާ ކުޅުން. ރައީސް ޔާމީނާ ކުޅުމަކީ އިސްލާމީ ވަންތަކަމާ ކުޅުން.

– އަދުރޭ ވިދާޅުވިއެވެ.

ރައީސް ސޯލިހުއަށް ފާޑު ވިދާޅުވަމުން އަދުރޭ ވިދާޅުވީ އިންސާފުވެރިގޮތަށް އިންތިހާބު ކާމިޔާބު ކުރުމުގެ ފޯމިއުލާ އޮތީ ޕީޕީއެމް އަތުގައި ކަމަށާއި ކެރެންޏާ ރިޔާސީ އިންތިހާބުގައި ރައީސް ޔާމީނު އާއި ކުރިމަތިލާންވީ ކަމަށެވެ. އިންތިހާބު ކާމިޔާބު ކުރާ ފޯމިއުލާއެއް އެމަނިކުފާނުގެ އަތުގައި އެބައޮތް ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.

އަދުރޭ އިތުރަށް ވިދާޅުވީ އަސްލު ޕީޕީއެމް ދައްކާ ނިމޭއިރު އިމްރާނު ހުންނާނީ ގޮޅީގައި ކަމަށާއި އޭނާއަކީ ރައްޔިތުންނަށާއި ޤައުމަށް ޣައްދާރުވެފައިވާ ޚިޔާނާތްތެރިއެއް ކަމަށެވެ. ރޭގެ ޖަލްސާގައި ރާއްޖޭގެ އެކިކަންކޮޅުން ބައިވެރިވި ބައެއް ޒުވާނުން ވެސް ވާހަކަ ދެއްކިއެވެ. 1150 މަނދޫބުންނާ އެކު ޕީޕީއެމް ޕީއެންސީ ކޯލިޝަނުން ހޯޕް ކޮންފަރެންސްގެ ނަމުގައި ހަރަކާތެއް ފެށީ މިދިޔަ ބުރާސްފަތި ދުވަހުއެވެ.