ލ. ފޮނަދޫ ދާއިރާގެ މަޖިލިސް މެމްބަރު މޫސާ ސިރާޖަކީ އެއްވެސް އިރަކު އެމަނިކްފާނާ އެކީ ހުންވިކަމަށް ވިދާޅުވި ބޭފުޅެއް ނޫންކަމަށާއި، އެހެންނަމަވެސް އެ މެމްބަރުގެ ދާއިރާ ކަމުގައިވާ ލ. އަތޮޅު ފޮނުދޫގެ ވޯޓު "ވަރަށް ސެކިއަރ" ކަމުގައި، އެމްޑީޕީގެ ކުރިޔަށްއޮތް ޕްރައިމަރީގައި ވާދަކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ވާއްދަކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދު ގެންދަވަނީ ރަށްރަށަށް ކުރައްވާ ދަތުރުފުޅުތަކުގައި އެބުރި މާލެ ވަޑައިގަންނަވާ ކޮންމެ ފަހަރަކުވެސް ނޫސްވެރިންނާއި ބައްދަލު ކުރައްވަމުންނެވެ.
މިގޮތުން ހުވަދޫ އޮތޮޅަށް ކުރެއްވި ކެމްޕޭން ދަތުރު ނިންމަވާލެއްވުމަށްފަހު މިއަދު މާލެ ވަޑައިގެން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ ސިރާޖު ބޮޑަށް ތަމްސީލު ކުރައްވަނީ ގާދޫގެ އާއިލާތައް ކަމަށާއި، އެއީ ފޮނަދުއަށް ހިޖުރަކުރި ގާދޫގެ އާއިލާތައް ކަމަށެވެ.
އަދި ނަޝީދު ވިދާޅުވީ ގާދޫގެ އާއިލާތަކާވެސް ވާހަކަ ދައްކަވަމުން ގެންދަވާ ކަމަށާއި، އެހެންނަމެސް މައި ފޮނަދޫ އާއިލާތައް ވަރަށް ސާބިތުކަމާއެކު ވޯޓުދީ ހައްދުންމަތީގެ ވަރަށް ރަގަޅު އަގުލަބިއްޔަތެއް ފެނިގެންދާނެ ކަމުގައެވެ.
ދެން ސިރާޖު އެއްވެސް އިރަކު އަޅުގަޑުމެން ކޮޅުގަ ހުންނެވި ވާހަކައެއް ވިދާޅެއް ނުވޭ… އަޅުގަޑު ދެކޭގޮތުގައި ލ. އަތޮޅު ފޮނަދޫގެ ވޯޓު އަޅުގަޑުމެންނަށް ސެކިއަރ. ސިރާޖު ބޮޑަށް ތަމްސީލު ކުރައްވަނީ އެނގިވަޑައިގަންނަވާނެ ގާދޫ ފެމިލީތައް. އެއީ ފޮނަދޫއަށް ހިޖުރަކުރި ގާދޫ ފެމިލީތައް. ދެން އަޅުގަޑު ފޮނަދުއަށް ގޮސްފަ މިއައީ. ގާދޫ ފެމިލީތަކާވެސް އަޅުގަޑު އެބަ ވާހަކަ ދައްކަން. އެކަމަކު މައި ފޮނަދޫ އާއިލާތަށް ވަރަށް ސާބިތުކަމާއެކީ އަޅުޑުމެންނަށް ވޯޓުދީ ލ. އަތޮޅުގެ، ހައްދުންމަތީގެ ވަރަށް ރަގަޅު އަޢުލަބިއްޔަތެއް އިރާދަކުރެއްވިއްޔާ އަޅުގަޑުމެންނަށް ފެންނާނެ.
ނަޝީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ނަޝީދު ވިދާޅުވީ އެމަނިކްފާނަށް ތާއީދުނުކުރާކަމަށް ވިދާޅުވެފައިވާ މެމްބަރުންވެސް އެމަނިކުފާނު ގުޅާލީމަ އެއްގޮތަކަށްވެސް ކަންބޮޑު ނުވުމަށް ދަންނަވަމުން ގެންދަވާ ކަމުގައެވެ.
ދެން މިހެން ވިދާޅުވާ މެމްބަރުންވެސް އިނގޭތޯ އަޅުގަޑު ގުޅާލީމަ ވިދާޅުވަނީ ރައީސްއޭ އެއްގޮތަކަށްވެސް ކަންބޮޑުވެ ނުލައްވާށޭ، ދެން ތިމަންނަމެން މިހެންވެގެން އެހެންވެގެން ދެން އެހެން ހަދާލަން ޖެހިގެންނޭ މިގަޑީގަ މިއުޅެނީ. އެހެންވީމަ ދެން ރައީސް މަޑުމަޑުން ހުންނަވާށޭ ތިއޮތީ ހަމަ މޮޅުވެފަ ނުންހޭ.
ނަޝީދު ވިދާޅުވި ގޮތުގައި އެއްވެސް މެމްބަރަކު ރަށެއްގެ ކެމްޕޭން ޓީމާއި ގުޅުއްވައިފިނަމަ އެ ކެމްޕޭން ޓީމެއްގެ މެމްބަރުން އެމަނިކުފާނަށް ގުޅާ ކަމުގައެވެ.
ނަޝީދު ވިދާޅުވީ މިހާރުވެސް ހުރި ކެމްޕޭން ޓީމުތަކަކީ މެމްބަރުން އިންތިޚާބު ކުރުމަށް އެކުލަވާލި ކެމްޕޭން ޓީމުތައް ކަމަށާއި، އެހެންވީމަ އެ ކެމްޕޭން ޓީމުތައް އެހެން ގޮތަކަށް ކެމްޕޭން ކުރާނެކަމަށް ދެކެވަޑައި ނުގަންނަވާ ކަމުގައެވެ.
މިހާރު ކުރިޔަށްދާ އެމްޑީޕީގެ ޕްރައިމަރީގައި ގިނަ ދުވަސްތަކެއް ވަންދެން ހަނު ހުންނެވުމަށް، ޕްރައިރީގައި ވާދަ ކުރައްވާ ދެބޭފުޅުންގެ ތެރެއިން، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ކެމްޕޭނާއި ގުޅިވަޑައިގަންނަވަން ލ. ފޮނަދޫ ދާއިރާގެ މަޖިލިސް މެމްބަރު މޫސާ ސިރާޖު ހާމަ ކުރައްވާފައިވަނީ ދާދިފަހުން ރައީސް ސާލިހު ހައްދުންމައްޗަށް ކުރެއްވި ދަތުރުފުޅާ ދިމާކޮށެވެ.
މޫސާ ސިރާޖް ރައީސް ސާލިހަށް ތާޢީދު ކުރައްވަން ނިންމެވުމުގެ ކުރިން، އޭނާ މިހާތަނަށް ފާހަވެގެން ދިޔައީ ރައްޔިތުންގެ މަޖިލިހުގައި ސަރުކާރަށް ވަރަށްބޮޑަށް ފާޑު ވިދާޅުވާ މެމްބަރެއްގެ ގޮތުގައެވެ. އަދި އޭނާ ގިނަ ފަހަރަށް މަޖިލިހުގައި ވާހަކަ ދައްކަވާފައިވަނީ ނަޝީދުގެ ފެކްޝަނަން ތާއީދުކުރާ މެމްބަރުންގެ ވިސްނުމާއި އެއް ލައިނަކުންކަން ފާހަގަ ކުރެވިފައި ވެއެވެ.
