އެއްޖިންސުން ގުޅުން ހިންގި ކަމަށް އިއުތިރާފުވެ، ތިން މަސް ދުވަހުގެ ގޭބަންދު ހުކުމެއް ތަންފީޒު ކުރަމުންދިޔަ ރައީސް ނަޝީދުގެ ކޮއްކޮ ގާނޫނީ ވަކީލު އަހުމަދު ނާޒިމް ސައްތާރު މިނިވަން ވެއްޖެއެވެ.
ބަންގްލަދޭޝްގެ އަލަމްގީރް އާއެކު އެއްޖިންސުން ގުޅުން ހިންގާ ވީޑިއޯއެއް އާންމުވުމުން ނުރުހުން އަމާޒުވެފައިވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް ވަނީ މި މައްސަލައިގެ އިބްތިދާއީ އަޑުއެހުމުގައި ކުށަށް އިއުތިރާފުވެފައެވެ. އެހެންވެ، ކްރިމިނަލް ކޯޓުގައި މި މައްސަލަ ކުރިޔަށް ގެންގޮސްފައިވަނީ އަވަސް ނިޔާގެ ޝަރީއަތެއްގެ ގޮތުގައެވެ.
ކްރިމިނަލް ކޯޓުން މިދިޔަ އަހަރުގެ ސެޕްޓެމްބަރު މަހުގެ 15 ވަނަ ދުވަހު ކުރި ހުކުމުގައި ވަނީ ދައުލަތުން ނާޒިމްގެ މައްޗަށް އުފުލާފައިވާ އެއްޖިންސުން ގުޅުންހިންގުމުގެ ކުށުގެ ދައުވާ އެއްވެސް ޝައްކެއް ނެތް މިންވަރަށް ސާބިތުވެފައިވާތީ އޭނާ ތިން މަހާއި 26 ދުވަހަށް އޭނާ ގޭ ބަންދު ކުރުމަށް ހުކުމް ކޮށްފައެވެ. އެފަދަ ހުކުމެއް އޭނާގެ މައްޗަށް އައިސްފައިވަނީ އެއީ އޭނާ ކުށެއް ކުރި ފުރަތަމަ ފަހަރަށްވެފަ، އިއުތިރާފުވެފައިވާތީ ދެ ދަރަޖަ ދަށް ކުރުމުންނެވެ.
ގިނަ އަދަދެއްގެ ދިވެހި ފިރިހެނުންނާއެކު އެއްޖިންސުން ގުޅުން ހިންގި ބަންގްލަދޭޝްގެ އަލަމްގިރް އާއެކު ނާޒިމް އެއްޖިންސުން ގުޅުން ހިންގި ކަމަށް އަލްމްގިރް ވަނީ ޝަރީއަތުގައި އިއުތިރާފުވެފައެވެ. އެހެންވެ އެއްޖިންސުން ގުޅުން ހިންގުމުގެ ކުށް ސާބިތުވެ، އަލަމްގިރް މިހާރު ދަނީ ޖަލުހުކުމެއް ތަންފީޒު ކުރަމުންނެވެ. އަލަންގިރް އާއެއެކު އެއްޖިންސުން ގުޅުން ހިންގި މައްސަލައިގައި އެހެން ބައެއް މީހުންގެ މައްޗަށް ވެސް ދައުވާ އުފުލާފައިވެއެވެ. އޭގެތެރެއިން ބައެއް މީހުންގެ ޝަރީއަތް ވަނީ ކްރިމިނަލް ކޯޓުގައި ފަށައިފައެވެ.
