ކުޅުދުއްފުށި ސިޓީގެ މޭޔަރ މުހައްމަދު އާތިފްވެސް ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި ނަޝީދަށް ތާއީދު ކުރައްވަން ނިންމަވައިފިއެވެ.

ކުޅުދުއްފުށި އުތުރު ދާއިރާގެ މެމްބަރު ޔާސިރު އަބުދުއްލަތީފް، ރައީސް ސާލިހަށް ކުރައްވަމުން ގެންދެވި ތައީދު އަނބުރާ ގެންގޮސް، ނަޝީދަށް ތާއީދު ކުރެއްވިކަން ހާމަކުރިތާ ކުޑަ ވަގުތު ކޮޅެއްގެ ތެރޭ، ކުޅުދުއްފުށި ސިޓީގެ މޭޔަރު ކުރެއްވި ޓުވީޓެއްގައި އޭނާ ވިދާޅުވީ އޭނާއަށް އަބަދުވެސް އެންމެ މުހިންމުވާ ކަމަކީ ރައްޔިތުންގެ މަސްލަހަތާއި ކުޅުދުއްފުށީގެ ކުރިއެރުމާއި ތަރައްގީ ކަމަށްވާތީ، ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި އެޕާޓީގެ ރައީސް މުހައްމަދު ނަޝީދަށް ތާއީދު ކުރައްވަން ނިންމެވީ ކަމުގައެވެ.

އަޅުގަނޑުމެންނަށް އަބަދުވެސް އެންމެ މުހިންމުވާ ކަމަކީ ރައްޔިތުންގެ މަސްލަހަތާއި، ކުޅުދުއްފުށީގެ ކުރިއެރުމާއި ތަރައްޤީކަމަށްވާތީ މިއަހަރުގެ އެމް.ޑީ.ޕީ ރިޔާސީ ޕްރައިމަރީގައި ރައީސް @MohamedNasheed އަށް ތާއީދު ކުރުމަށް އަޅުގަނޑު ނިންމައިފިން.

ހިނގާދަމާ ކުރިއަށް… ހިނގާދަމާ ބާރަށް pic.twitter.com/GTbcGja92r

— 🅰 🆁 🆃 🅷 🅸 🅵 (@ArthifKFCity) January 6, 2023

އޭނާގެ ޓުވީޓުގައި ވިދާޅުވީ، އެމްޑީޕީގެ 3 އަހަރުގެ ސަރުކާރާއި 4 އަހަރުގެ ސަރުކާރުވެސް ތަޖުރިބާ ކުރެއްވިއްޖެ ކަމަށާއި، ކުޅުދުއްދުއްފުޓައް އެންމެ ބޮޑު ތަރައްގީއެއް އައިސްފައިވަނީ ނަޝީދުގެ 3 އަހަރުގެ ސަރުކާރުގައި ކަމުގައެވެ. އޭނާ ވިދާޅުވީ ރައްޔިތުން މިއަދުވެސް ތިބީ އެފަދަ ހަލުއި ތަރައްގީއަށް ފެންބޮވައިގެންފައި ކަމުގައެވެ.

ކުޅުދުއްދުށީ ސިޓީގެ މޭޔަރު ނަޝީދަށް ތާއީދު ކުރައްވަން ނިންމަވާފައިވާއި، އެ ސިޓީގެ އުތުރު ދާއިރާގެ މެމްބަރު ޔާސިރު އަބުދުއްލަތީފްވެސްވަނީ، އެ ސިޓީއަށް ތަރައްގީ އަންނަމުންދަނީ މާ ލަސްކޮށްކަމަށް ވިދާޅުވެ ރައީސް ސާލިހަށް ކުރަމުން އައި ތާއީދު އަބުރާ ގެންގޮސް، ނަޝީދަށް ތާއީދު ކުރަން ނިންމެވިކަން އިއުލާން ކޮށްފައެވެ.

ފައިތުވެދިޔަ އެމްޑީޕީގެ ޗެއަރޕާސަން އިންތިޚާބުގައި މެމްބަރު ޔަސިރެކޭ އެއްގޮތަށް އާތިފްވެސް ތާއީދު ކޮށްފައިވަނީ ރައީސް ސާލިހުގެ ފެކްޝަނުން ވާދަކުރެއްވި ފައްޔާޒަށެވެ.

މިހާރު ކުރިޔަށްދާ އެމްޑީޕީގެ ޕްރައިމަރީ ކެމްޕޭންގައި، އެމްޑީޕީގެ ގިނަ މަޖިލިސް މެމްބަރުންނާއި ގައުމީ މަޖިލިސްގެ ގިނަ މެމްބަރުންވެސް ތާއީދު ކުރަމުންދަނީ ރައީސް ސާލިހަށެވެ. އެހެންނަމެވެސް ޕްރައިމަރީ ކެމްޕޭންގައި ވަކި ކެނޑިޑޭޓަކަށް ތާއީދު ކުރާކަން ހާމަ ނުކުރާ ބައެއް މެމްބަރުންވެސް އަދިވެސް އެމްޑިޕީގެ ޕީޖީގައި ތިބިކަން ފާހަގަ ކޮށްލެވެއެވެ.