އިދިކޮޅު ޕީޕީއެމާއި ޕީއެންސީން މާލޭގައި ރޭ ބޭއްވި މުޒާހަރާ އިން ހައްޔަރުކުރި މާލޭގެ މޭޔަރު ޑރ. މުހައްމަދު މުއިއްޒު މިއަދު ދޫކޮށްލައިފިއެވެ.

ފުލުހުންގެ މީޑިއާ އޮފިޝަލް ވިދާޅުވީ މުޒާހަރާ އިން ހައްޔަރުކުރި ހަތަރު މީހުން ދޫކޮށްލާފައިވާ ކަމަށެވެ. މުއިއްޒުގެ އިތުރުން ހައްޔަރުކުރީ އިދިކޮޅުގެ އެކްޓިވިސްޓުންތަކެކެވެ. މުއިއްޒު ހައްޔަރުކުރި ސަބަބެއް ފުލުހުން ނުބުނެ އެވެ. އޭނާ އެކު ޕީޕީއެމާއި ޕީއެންސީގެ ލީޑަޝިޕްގެ އިސް ބޭފުޅުން ވެސް ރޭ މުޒާހަރާއަށް ނުކުތެވެ.

މުއިއްޒު ހައްޔަރު ކުރީ މުޒާހަރާގެ ބައިވެރިންނާ އެކު، ޖަނަވަރީ މަގުގައި ހުންނަވަނިކޮށެވެ. ރޭގެ މުޒާހަރާގެ ތެރެއިން އެންމެ ފުރަތަމަ ހައްޔަރުކޮށްގެން ގެންދިޔައީ ވެސް މުއިއްޒެވެ.

ވ. އާރަށް މައްސަލާގައި މަނީ ލޯންޑްރިން އާއި ރިޝްވަތުގެ ކުށް ސާބިތުވެ، ޔާމީންގެ މައްޗަށް 11 އަހަރުގެ ޖަލު ހުކުމަކާއި ފަސް މިލިއަން ޑޮލަރުގެ ޖޫރިމަނާގެ ހުކުމެއް އިއްވާފައިވާތީ ޔާމީން މިނިވަން ކުރުމަށް ގޮވާލައި ކޮންމެ ރެއަކު ހެން، އިދިކޮޅު ފަރާތްތަކުން އަންނަނީ މާލޭގައި މުޒާހަރާ ކުރަމުންނެވެ.

މުއިއްޒު ހައްޔަރުކުރުމާ ގުޅިގެން މާލޭ ސިޓީ ކައުންސިލުން ނެރުނު ނޫސް ބަޔާނުގައި ބުނީ އެއީ ގާނޫނުއަސާސީން ލިބިދޭ ޝުއޫރު ފާޅުކުރުމުގެ ހައްގު ހަނިކޮށް މާލެ ސިޓީގެ ރައްޔިތުން އެމީހުންގެ މަންދޫބެއްގެ ގޮތުގައި މާލެ ސިޓީގެ މޭޔަރުގެ މަގާމަށް ހޮވާފައި ހުރި މޭޔަރުގެ ބާރު ކަނޑުވާލައި އަޑު ކަނޑުވާލުމަށް ހިންގާފައިވާ ވަރަށް ޒިންމާދާރުކަން ކުޑަ އަމަލެއް ކަމަށެވެ. މިއީ ދިމިގްރާތީ ވެއްޓެއްގައި ކަން ވާން ޖެހޭނެ ގޮތް ނޫން ކަމަށް ވެސް އެ ބަޔާނުގައިވެއެވެ.