އަލް ނަޞްރުގެ އެތައްހާސް ސަޕޯޓަރުން ރޮނާލްޑޯއަށް ހޫނު މަރުހަބާއެއް ކިޔައިފިއެވެ.

ރޭ ސައުދީގެ ވެރިރަށް ރިޔާދުގައި ރޮނާލްޑޯ އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލިއިރު، އެތައް ހާސް ބަޔަކު ވަނީ އެއްވެފައެވެ. ރިޕޯޓުތައް ބުނާ ގޮތުން އެ ސްޓޭޑިއަމަށް ގާތްގަނޑަކަށް 30،000 ސަޕޯޓަރުން ވަނީ ވަދެފައެވެ. އަލް ނަޞްރަކީ ރޮނާލްޑޯގެ ސީނިއާ ކެރިއަރުގައި އޭނާ ގުޅުނު ފަސް ވަނަ ކުލަބެވެ. މިއީ ރޮނާލްޑޯ ޔޫރަޕުން ބޭރުގެ ކުލަބަކާ ގުޅުނު ފުރަތަމަ ފަހަރެވެ. މީގެ ކުރިން ރޮނާލްޑޯ ވަނީ ޔޫރަޕުގެ ހަތަރު ކުލަބަށް ކުޅެފައެވެ. އޭގެ ތެރޭގައި ސްޕޯޓިން، މެންޗެސްޓަރ ޔުނައިޓެޑް، ރެއާލް މެޑްރިޑް، އަދި ޔުވެންޓަސް ހިމެނެއެވެ.

އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލުމަށްފަހު ކުލަބުގެ ސަޕޯޓަރުންނާ ވާހަކަ ދައްކަމުން ރޮނާލްޑޯ ބުނީ، އޭނާ ބޭނުންވަނީ ކުލަބަށް ހުރިހާ ކާމިޔާބަށް ހޯދައިދޭން ކަމަށެވެ. އަދި އޭނާ އަށް ކުލަބުގެ ސަޕޯޓަރުންގެ ފަރާތުން ދައްކާލި ލޯތްބާއި، އިޙުތިރާމަށް ވެސް ރޮނާލްޑޯ ވަނީ ޝުކުރު އަދާކޮށްފައެވެ.

ރޮނާލްޑޯ ބުނީ އަލް ނަޞްރުގެ ޖާޒީގައި މެޗެއް ކުޅުމަށް ކެތް މެދުވެފައި ހުރި ކަމަށެވެ. މީގެ އިތުރުން ރޮނާލްޑޯ ވަނީ ސައުދީން އޭނާގެ އާއިލާ އަށް އަދާކުރި މެހެމާންދާރީ އާއި ކީ މަރުޙަބާ އަށް ވެސް ޝުކުރު އަދާކޮށްފައެވެ. އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލުމަށްފަހު ރޮނާލްޑޯ ވަނީ ކުލަބުގެ ބައެއް ކުޅުންތެރިންނާ ވެސް ބައްދަލުކޮށްފައެެވެ.

An unwavering passion for the club we love 🔥

This is Al Nassr. This is our club. And these are our incredible fans 💛#HalaRonaldo pic.twitter.com/mDv6vZJfYA

— AlNassr FC (@AlNassrFC_EN) January 3, 2023

ރޮނާލްޑޯ ކުލަބަށް ކުޅެން އެއްބަސްވިކަން އިއުލާނުކުރުމަށްފަހު، 7 ނަންބަރު ޖެހި ރޮނާލްޑޯގެ އަލްނަސްރުގެ ޖޯޒީތަކުގެ ވިޔަފާރިވެސް ވަނީ ވަރަށް ބޮޑަށް އިތުރުވެގެން ގޮސްފައެވެ.

ދުނިޔޭގައި މިވަގުތު ހުރި އެންމެ މޮޅު ފުޓްބޯޅަ ކުޅުންތެރިޔާ ކަމަށް ގިނަ ބަޔަކު ގަބޫލު ކުރާ ރޮނާލްޑޯއާއި މެންޗެސްޓަރ ޔުނައިޓެޑުން ވެފައިވާ އެއްބަސްވުން އުވާލައި، މިދިޔަ މަހުން ފެށިގެން ހުރީ އެއްވެސް ޓީމެއް ނެތިއެވެ.
ސައުދީގެ މީޑިއާތަކުން ރިޕޯޓް ކޮށްފައިވާ ގޮތުގައި ރޮނާލްޑޯ ސައުދީގެ އަރަބިއްޔާގެ އަލް ނަސްރު ކްލަބާއި އޭނާ ގުޅުނީ އަހަރަކު 175 މިލިއަން ޕައުންޑުގެ އަގަކަށް ދެ އަހަރާއި ހަމަހުގެ ކޮންޓްރެކްޓަކަށެވެ. ރޮނާލްޑޯގެ މުސާރަ އަހަރަކު 214 މިލިއަން ޑޮލަރަށްވުރެ ބޮޑުކަމަށް ބައެއް ރިޕޯޓްތައް ބުނެއެވެ.