ކުރީ ސަރުކާރުގައި، އެޗްޑީސީން ގަވާއިދާ ޚިލާފަށް، އެ ކުންފުނީގެ ޕްރޮކިއުމަންޓް އުސޫލާއި ޚިލާފަށް ކޮށްފައިވާ ގިނަ ކަންތައްތަކެއް ފާހަގަ ކޮށްފިއެވެ.

2017 އިން 2018 އެޗްޑީސީން ކޮށްފައިވާ މަސައްކަތްތައް އޮޑިޓް ކުރުމަށްފަހު އޮޑިޓަރ ޖެނެރަލް ނެރުއްވާފައިވާ އޮޑިޓް ރިޕޯޓުގައި، އެކުންފުނިން ގަވާއިދާ ޚިލާފަށް ކޮށްފައިވާ ކަމަށް ފާހަގަ ކޮށްގައިވާ މަސައްކަތްތަކުގެ ތެރެއިން ފާހަގަ ކޮށްލެވޭ އެއްކަމަކީ ހުޅުމާލޭ ވޯޓަރ ތީމް ޕާރކް ތަރައްގީ ކުރުމަށް ކަނޑައަޅާފައިވާ ސަރަހައްދު ސާފު ކުރުމަށް އަމިއްލަ ފަރާތަކަށް ބޮޑު ޚަރަދެއް ކޮށްފައިވާ މައްސަލައެވެ.

މިގޮތުން އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި، ވޯޓަރ ތީމް ޕާރކް ތަރައްގީ ކުރުމަށް ކަނޑައަޅާފައިވާ ސަރަހައްދު ސާފުކޮށް ހުސްކުރުމުގެ މަސައްކަތް ކޮށްދޭނެ ފަރާތެއް ހޯދުމަށް އާންމުކޮށް އިއުލާން ނުކޮށް ސިންގަލް ސޯސް އުސޫލުން އެޗްޑީސީގެ ޕްރޮކިއުމަންޓް އުސޫލާއި ޚިލާފަށް، އެ މަސައްކަތުގެ ތެރެއިން ބައެއް އަމިއްލަ ކުންފުންޏަކާ ހަވާލުކޮށް، އެ ކުންފުންމަށް އަގުގެ ގޮތުގައި 18.04 މިލިއަން ރުފިޔާ ވަނީ ދީފައެވެ.

ކުރީ ސަރުކާރުގެ 2018ވަނަ އަަހަރުގެ އެޗްޑީސީއާއި ގުޅުންހުރި ގިނަ މައްސަލަތަކެއް ފާހަގަކޮށް، އޮޑިޓަރ ޖެނެރަލް ނެއްރުއްވާފައިވާ އޮޑިޓް ރިޕޯޓުގައި ހާމަ ކޮށްފައިވާ ގޮތުގައި، ހުޅުމާލޭ ވޯޓަރ ތީމް ޕާރކް ތަރައްގީ ކުރުމަށް ކަނޑައަޅާފައިވާ ސަރަހައްދު ސާފުކޮށް ހުސްކުރުމުގެ މަސައްކަތާއި ހަވާލުވި ކުންފުނިން އެއްބަސްވެފައިވާ ތާރީޚަށް އެ މައްސައްކަތް ނިންމާފައި ނުވުމުން، މަސައްކަތް ނިންމުމަށް 60 ދުވަސް މުއްދަތަށް އިތުރުކޮށް އަދި މަސައްކަތާއި ހަވާލުވި ފަރާތަށް އިތުރަށް 6.87 މިލިއަން ރުފިޔާއި ދީފައިވަނީ ކުރިން ކުރި މި މަސައްކަތް ކުރުމަށް އެއްބަސްވެފައިވާ "ސްކޯޕް އޮފް ވޯކް" އަށް ބަދަލު ގެނައުމަކާ ނުލައެވެ.

އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި ބީލަމުގެ އުސޫލުން މަސައްކަތް ކޮށްދޭނެ ފަރާތެއް ހޯދާ، މަސައްކަތް ހަވާލުރުކުރުމަށް ނަގާ ވަގުތު ސަލާމަތް ކުރުމުގެ ގޮތުން މި މަސައްކަތް ސިންގަލް ސޯސް އުސޫލުން ހަވާލުކުރުމަށް މެނޭޖްމަންޓުން ހުށަހަޅާފައި ވީނަމަވެސް، ވޯޓަރ ތީމް ޕާކު ތަރައްގީ ކުރުމަށް ހަވާލު ކޮށްފައިވާ ކުންފުންޏާއެކު އެއްބަސްވުމުގެ ކުރިން، މި ޕާކު ތަރައްގީ ކުރުމަށް ކަނޑައަޅާފައިވާ ސަރަހައްދު ހުސްކޮށް ސާފުކުރުމަށް އެޗްޑީސީއަށް 2 އަހަރަށްވުރެ ގިނަ ދުވަސް ވަނީ ލިބިފައެވެ.

އެހެންނަމަވެސް މި މުއްދަތުގައި މި ސަރަހައްދު ސާފުކޮށް ހުސްކުރުމަށް އެޗްޑީސީން އެއްވެސް މަސައްކަތެއް ކޮށްފައިވާކަން ލިޔެކިޔުންތަކުން އެގެން ނެތްކަމަށާއި، މި މުއްދަތަކީ ވާދަވެރި ބީލަމުގެ އުސޫލުން މަސައްކަތް ވަކިފަރާތަކަށް ހަވާލުކުރުމަށް އެކަށިގެންވާ މުއްދަތެއްކަންވެސް އޮޑިޓް ރިޕޯޓުގައި ފާހަގަ ކޮށްފައި ވެއެވެ.

އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި، ކުންފުނީގެ ޕްރޮކިއުމަންޓް ޕޮލިސީގެ 3.4 ވަނަ މާއްދާގައިވާ ގޮތުގެމަތިން، ކުންފުންޏަށް ހޯދަން ބޭނުންވާ މުދާ ނުވަތަ ޚިދުމަތުގެ ފެންވަރު ނުވަތަ ޓެކްނިކަލް ކޮމްޕްލެކްސިޓީއާއި ގުޅިގެންނާއި، ޕްރޮކިއުމަންޓުގެ ކަންތައްތައް ކުރިޔަށް ގެންދާނޭ ވަގުތު ނެތް ހާލަތްތަކުގައި އަދި ކުރިން ކުރެވިފައިވާ ކޮންޓްރެކްޓެއްގެ ދަށުން އިތުރަށް ޚިދުމަތެއް ހޯދަން ނުވަތަ މަސައްކަތެއް ކުރުމުން ކުންފުންޏަށް އިތުރު ފައިދާއެއްވާ ހާލަތްތަކުގައި ސިންގަލް ސޯސް އުސޫލުން ޚިދުމަތް ހޯދުމުގެ އިޚްތިޔާރު އެޗްޑީސީއަށް ލިބިފައި ވެއެވެ.

އެހެންނަމަވެސް، އޮޑިޓް ރިޕޯޓުގައި ބުނެފައިވަނީ، ކުންފުނީގެ މެނޭޖްމަންޓުން ސިންގަލް ސޯސް އުސޫލުން ޚިދުމަތް ހޯދުމުގެ ހުއްދަ ދިނުމަށް އެދި ޑިރެކްޓަރުންގެ ބޯޑަށް ހުށަހަޅާފައިވާ ސަބަބުތަކަކީ އިސްވެ ބަޔާންކުރެވުނު އެއްވެސް ހާލަތަކާއި ގުޅުމެއް ނެތް ސަބަބުތަކެއް ކަމަށް އޮޑިޓަށް ފާގަ ކުރެވިފައިވާ ކަމުގައެވެ.

މީގެ އިތުރުންވެސް މި އޮޑިޓް ރިޕޯޓުގައިވަނީ، 2018ވަނަ އަހަރު އެޗްޑީސީން ގަވާއިދާ ޚިލާފަށް، ފައިސާގެ ބޮޑެތި އަދަދުތައް ހޭދަކޮށްގެން ކޮށްފައިވާ ގިނަ މަސައްކަތްތަކުގެ ތަފްސީލުތައްވެސް ހިމަނާފައެވެ.