ބޮލީވުޑްގެ ސްޕަސްޓާރު ޝާހްރުކް ޚާން މިހާރު އަންނަނީ ފުލުފުލުގައި ފިލްމްތަކުގެ މަސައްކަތް ކުރަމުންނެވެ. 5 އަހަރެއްގެ މެދުކެނޑުމަށްފަހު އޭނާ އެނބުރި ބޮޑުސްކްރީނަށް އަންނަ ފިލްމަކީ "ޕަޓާން" އެވެ.
މި ފިލްމަކީ ލީޑުން ޝާހްރުކާއި އެކު ދީޕިކާ ޕަޑުކޯން ފެނިގެންދާނެ ފިލްމްއެކެވެ. މިއީ މި ދެތަރިން އެކުގައި ކުޅޭ 4 ވަނަ ފިލްމެވެ. ދެތަރިން އެކުގައި މިހާތަނަށް ކުޅުނު ހުރިހާ ފިލްމަކީވެސް ސުޕަހިޓު ފިލްމްތަކެކެވެ.
ދާދި ފަހުން ޝާހު ވަނީ އިންސްޓަގްރާމްގެ "އާސްކްމީ އެނީތިންގ" ގެ ނަމުގައި ސެޝަން އެއް ކުރިއަށް ގެންގޮސްފައެވެ. މިސެޝަންގެ ތެރެއިން ފޭނަކު ވަނީ ކެއުމުގެ އާދަ ގެންގުޅޭ ގޮތާ ބެހޭ ގޮތުން ސުވާލުކޮށްފައެވެ.
މި ސުވާލުގެ ޖަވާބުދެމުން ޝާހު ބުނީ ބަލިވެ އުޅޭ ކަމަށާއި، ބަލިން އަރައިގަންނަން މަސައްކަތްކުރާއިރު ކެއުން ވެސް ވަރަށް ލުއި ގޮތަކަށް ގެންގުޅޭކަމަށެވެ. އެގޮތުން އޭނާ މިހާރު ކަނީ މުގުރިހައާއި ބަތް ކޮޅެއް ކަމަށް ވަނީ ބުނެފައެވެ. މިހެން ޝާހު ބުނުމާއެކު ގިނަ ސަޕޯޓަރުން އަންނަނީ ހެޔޮ ދުއާ ކުރަމުންނެވެ.
View this post on Instagram
ޝާހުގެ ފިލްމްގެ ދެލަވައެއް މިހާރު އާންމުކޮށްފައިވާއިރު ބެލުންތެރިންގެ ފަރާތުން ލިބެމުން އަންނަނީ ބޮޑަށް ނެގެޓިވް ކޮމްންޓެވެ. ސަބަބަކީ ބެލުންތެރިންނަށް ދޫކޮށްލި ދެލަވައިގެ ވެސް ނެށުން ތައް ގައިގޯޅި ވުމާއި ލަވައިގައި ދީޕިކާ ލައިފާވާ ހެދުންތަކަކީ ނިވާކަން ކުޑަ ހެދުން ތަކަކަށްވުމެވެ.
ޝާހު ދެން އެންމެ އަވަހަށް ފެނިގެންދާ ފިލްމު "ޕަޓާން" ރިލީޒް ކުރުމަށް ތާވަލް ކޮށްފައިވަނީ އާއަހަރާ ދިމާކޮށް ޖެނުއަރީ މަހުގެ 25 ވަނަ ދުވަހަށެވެ.
