ވ.އާރަށް ކުށްޔަށް ދިން މައްސަލާގައި ރިޝްވަތު ދިންކަމުގެ ކުށް ސާބިތު 3 އަހަރާއި 2 މަހާއި 12 ދުވަހަށް ކުރީގެ މެމްބަރު ޔޫސުފް ނައީމް ޖަލަށް ލާން ހުކުމް ކޮށްފިއެވެ.

މިއަދު ހެނދުނު ދަންފަޅިގައި އަދަބު ކަނޑައެޅުމާއި ގުޅޭގޮތުން ޔޫސުފް ނައީމްގެ ދިފާއީ ވަކީލުންވަނީ އަދަބާއި ގުޅޭގޮތުން ވާހަކަ ދައްކާނެ އެކަށީގެންވާ ފުރުސަތު ދީފައި ނުވާކަމަށް ވިދާޅުވެ، އަދަބާއި ގުޅޭގޮތުން ވާހަކަ ދައްކަން އިތުރުވަގުތު ބޭނުންވާކަމަށް ވިދާޅުވެފައެވެ. އަދި އެދިފައިވަނީ ގާނޫނުގައި ކަނޑައަޅާފައިވާ އެންމެ ދިގު މުއްދަތު ކަމުގައިވާ 10 ދުވަސް ދިނުމަށެވެ. އެހެންނަމަވެސް ގާޒީ ޝަކީލު އަދަބާއި ގުޅޭގޮތުން ވާހަކަ ދެއްކުމަށް ދެއްވާފައިވަނީ ދޮޅު ގަޑިއިރެވެ.

ލިބިފައިވާ ފުރުސަތު އެކަށީގެން ނުވާކަމަށް ވިދާޅުވެ އިހުތިޖާޖް ކުރެއްވުމަށްފަހުވެސް، ލިބިފައިވާ ދޮޅުގަޑިއިރުގެ ތެރޭގައި އަދަބާއި ގުޅޭގޮތުން ވާހަކަ ދެއްކުމަށް ބޭނުންވާކަމަށް ޔޫސުފް ނައީމުގެ ވަކީލުން ވިދާޅުވުމުން ގާޒީވަނީ އެ ފުރުސަތު ޔޫސުފް ނައީމްގެ ވަކީލުންނަށް ދެއްވާފައެވެ.

މި ފުރަތުގައި ޔޫސުފް ނައީމްގެ ވަކީލުންވަނީ، ޔޫސުފް ނައީމުގެ ކުށުގެ ރެކޯޑެއް ނެތުމާއި، އަދި އޭނާ ސިއްޙީ ހާލަތަށް ރިއާޔަތްކޮށް އަދަބުގެ މިންވަރު ދަށްކޮށްދިނުމަށް ނުވަތަ ލުއި ކޮށްދިނުމަށް އެދިފައެވެ.

އެހެންނަމަވެސް ހުކުމް އިއްވަމުން ގާޒީ ވިދާޅުވެފައިވަނީ، އަސާސީ މިންގަޑަށްވުރެ އަދަބު ލުއިކުރަންޖެހޭ ސަބަބެއްވެސް އަދި މަތިކުރަންޖެހޭ ސަބަބެއްވެސް ނެތްކަމުގައެވެ. މިގޮތުން ރިޝްވަތު ދިނުމުގެ ކުށުގައި، ކުރީގެ ރައްޔިތުންގެ މަޖިލިހުގެ މެމްބަރުކަންވެސް ކުރައްވާފައިވާ ޔޫސުފް ނައީމް 3 އަހަރާއި 2 މަހާއި 12 ދުވަހަކަށް ޖަލަށްލާން ގާޒީވަނީ ހުކުމް ކުރައްވާފައެވެ.

މިމައްސަލާގައި ރައީސް ޔާމީންއާއި ޔޫސުފް ނައީމްގެ މައްޗަށް ދަޢުވާކުރުމަށް ޕީޖީ އޮފީހުން ކޯޓަށް ފޮނުވީ 2021ވަނަ އަހަރުގެ ނޮވެމްބަރުމަހުގެ 24ވަނަ ދުވަހުއެވެ. މައްސަލައިގެ އަޑުއެހުންތައް ކޯޓުގައި ފެށީ މިއަހަރުގެ ޖެނުއަރީމަހުގެ ދެވަނަ ދުވަހުއެވެ. އަޑުއެހުންތައް ނިންމާލީ މިއަހަރުގެ ނޮވެމްބަރު މަހުގެ 30ވަނަ ދުވަހުއެވެ.