އިންޑިއާގެ އިނދިކޮޅު ލީޑަރު ރާހުލް ގާނދީ އިސްވެ ހުންނަވާ، އިދިކޮޅު ކޮންގްރެސްއަށް ތާއީދު ހޯދުމުގެ ގޮތުން ކުރިޔަށް ގެންދާ "އެއްބައިވަންތަ ކަމުގެ ހިނގާލުން" އެގައުމުގެ 8 ސްޓޭޓެއް ކަޑައްތުކޮށް ވެރިރަށް ނިއު ދިއްލިއާއި ހަމައަށް ދަތުރު ކޮށްފިއެވެ.
ރާހޫލް ގާނދީގެ މި "ޔުނައިޓެޑް އިންޑިއާ މާރޗް"ގައި އިންޑިއާގެ އެތައް ހާސް ރައްޔިތުން ބައިވެރިވަމުން ދާއިރު، "ދެކޮޅުވެރިކަމާއި ބައިބައިވުމާއި" ދެކޮޅަށް ބާއްވަމުންދާ މި ހިނގާލުމުގެ އެއް މަގުސަދަކީ ފާއިތުވެދިޔަ 2 އިންތިޚާބުގައިވެސް، މިހާރު އެގައުމުގައި ވެރިކަން ކުރާ ބަހަރަތިޔާ ޖަނަތާ ޕާޓީ (BJP)އާއި ވާދަކޮށް ކޮންގްރެސް ޕާޓީއަށް ލިބިގެން ގޮސްފައިވާ ނާކާމިޔާބީއަށްފަހު އެ ޕާޓީއަށް އޮތް ތާއީދު އިތުރު ކުރުމެވެ.
"ހިންދޫންނާއި މުސްލިމުންގެ މެދުގައި އޮތް ހަސަދައާއި ރުޅިވެރިކަން ދަނީ ހުއްޓުމެއްނެތި ފެތުރެމުން. އޭގެ ނަތީޖާއެއްގެ ގޮތުން، ހަގީގީ މައްސަލަތަކާމެދު ވިސްނުމުގެ އެއްވެސް ފުރުސަތެއް ނެތް،" އިންޑިއާގެ ކެޕިޓަލްގައި ހުންނަ މުގާލް ޒަމާނުގެ ރެޑް ފޯޓު ސަރަހައްދުގައި ވާހަލަ ދައްކަވަމުން ރާހޫލް ގާނދީ ވިދާޅުވެފައި ވެއެވެ.
"އެމީހުން ފަތުރަމުން ދަނީ ނަފްރަތު، އަހަރެމެން ފަތުރާނީ ލޯބި،" މިހާރުގެ ބޮޑުވަޒީރު ނަރެންދުރަ މޯޑީގެ ބީޖޭޕީއަށް ނިސްބަތްކޮށް ރާހުލް ގާނދީ ވިދާޅުވެފައި ވެއެވެ.
އިންޑިއާގެ މިހާރުގެ ބޮޑުވަޒީރު ނަރެންދުރަ މޯޑީގެ ބޮޑުވަޒީރުކަމުގައި އިންޑިއާގައި ހިންދޫންގެ ވަތަނީ ވިސްނުންވަނީ ވަރަށް ބޮޑަށް ތަރައްގީވެގެން އައިސްފައެވެ. އޭގެ ނަތީޖާއެއްގެ ގޮތުން އެގައުމުގައި މުސްލިމުންނާއި ދެކޮޅަށް އޮތް ނަފްރަތު އެތައް ގުނައަކަށް މައްޗަށް ގޮސް، އިންޑިއާގެ މުސްލިމުންނާއި ދެކޮޅަށް ދަނީ އަނިޔާވެރި އެތައް އަމުލުތަކެއް ހިގަމުންނެވެ.
އިންޑިއާގެ އިދިކޮޅު ފަރާތްތަކުން ބުނަމުންދަނީ އިންޑިއާގައި މުސްލިމުންނާ ދެކޮޅަށް ހިންގަމުންދާ އަނިޔާވެރި އަމަލުތަކަށް ބޮޑުވަޒީރު މޯޑީ ހަނު ހުއްނެވުމާއި ގުޅިގެން އިންޑިއާގެ ކަނާތުފިޔައިގެ ގުރޫޕްތަކަށް ހިތްވަރުލިބި، އިންޑިއާގެ ގައުމީ ސަލާމަތަށް ނުރައްކާ ވެފައިވާ ކަމުގައެވެ. އެހެންނަމަވެސް މި ތުހުމަތުތަކަށް މޯޑީގެ ޕީޖޭޕިން ދެކޮޅު ހަދައެވެ.
ނެހެރޫ-ގާނދީ އާއިލާއަކީ އެތައް އަހަރުތަކެއް ވަންދެން އިދިކޮޅު ކޮންގްރެސް ޕާޓީގެ ލީޑަރޝިޕްގައި އޮތް އާއިލާއެވެ. އެހެންނަމަވެސް ފަހަކަށް އައިސް އެ ޕާޓީއަށް އޮތް ތާއީދުވަނީ އިންޑިއާގައިވަނީ ވަރަށް ބޮޑުތަކުން ދަށަށް ގޮސްފައެވެ. އަދި އިންޑިއާގެ 28 ސްޓޭޓްގެ ތެރެއިން މިހާރު އެޕާޓީން ވެރިކަން ކުރަމުންދަނީ އެންމެ 3 ސްޓޭޓެއްގައެވެ.
އެންމެ ފަހުން ބޭއްވުނު އާންމު އިންތިޚާބު ކޮންގެރެސް ޕާޓީއަށް ނާކާމިޔާބު ވުމާއި ގުޅިގެން ރާހޫލް ގާނދީވަނީ ޕާޓީގެ ލީޑަރުކަމުން އިސްތިއުފާ ދެއްވާފައެވެ. އިންޑިއާގެ އާންމު އިންތިޚާބު ދެން އޮންނާނީ 2024ވަނަ އަހަރުއެވެ.
