އެމްޑީޕީގެ ކުރިއަށް އޮތް ރިޔާސީ ޕްރައިމަރީގައި ތާޢީދުކުރައްވާނީ ރައީސް އިބްރާހީމް މުޙައްމަދު ޞާލިޙަށްކަން އެޑިއުކޭޝަން މިނިސްޓަރ ޑރ.އާއިޝަތު ޢަލީ ވިދާޅުވެއްޖެއެވެ.
އެމްޑީޕީގެ ޕްރައިމަރީގައި ވާދަކުރައްވަނީ ރައީސް އިބްރާހީމް މުޙައްމަދު ޞާލިޙާއި، އެމްޑީޕީގެ ރައީސް މުޙައްމަދު ނަޝީދެވެ. އެމްޑީޕީގެ އެތެރޭގެ ދެ ފެކްޝަނުގެ ބަހުގެ ހަމަލާތައް ރައްދުކުރަމުން ދަނިކޮށް، އެޑިއުކޭޝަން މިނިސްޓަރ އައިޝަތު އަލީ ހިމެނޭހެން މި ސަރުކާރުގެ ވަޒީރުން ގެންދަވަނީ ރައީސްއަށް ތާޢީދުކުރައްވާކަން ހާމަކުރައްވަމުންނެވެ.
އެގޮތުން އެޑިއުކޭޝަން މިނިސްޓަރ ވިދާޅުވީ، އެމްޑީޕީގެ ޕްރައިމަރީގައި ތާޢީދުކުރައްވަނީ ތަޢުލީމީ ދާއިރާއަށް އިންޤިލާބީ ބަދަލެއް ގެނެސް ދެއްވި ރައީސް އިބްރާހީމް މުޙައްމަދު ޞާލިޙަށްކަމަށެވެ.
އެމްޑީޕީގެ ޕްރައިމަރީއަށް ފޯމް ހުށައެޅުން މިއަދު ބަންދުވިއިރު ފޯމް ހުށައެޅުއްވީ ރައީސް ޞާލިހާއި ރައީސް ނަޝީދެވެ. ރައީސް ޞާލިޙް ފޯމް ހުށައެޅުއްވީ ވިހި ހާހަށްވުރެ ގިނަ މީހުންގެ ތާޢީދާއެކުއެވެ.
އެމްޑީޕީގެ ޕްރައިމަރީ އޮންނާނީ އަންނަ މަހުގެ 28ގައެވެ. އަދި ރިޔާސީ އިންތިޚާބު އޮންނާނީ ސެޕްޓެމްބަރު މަހުއެވެ.
