ޔޫކުރެއިންގެ ރައީސް ވޮލޮޑޮމިރު ޒެލެންސްކީ އެމެރިކާއަށް ވަޑައިގަތުމުން އެމެރިކާގެ ރައީސް ޖޯ ބައިޑްން ޒެލެންސްކީއަށް ރަތް ދޫލައިގެ މަރުހަބާއެއް ކިޔައިފިއެވެ.
ޒެލެންސްކީގެ މި ދަތުރުފުޅަކީ ފާއިތުވެދިޔަ ފެބްރުއަރީމަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށިފަހުން އެގައުމުގެ ރައީސް ގައުމުން ބޭރަށް ކުރައްވާ ފުރަތަމަ ދަތުރުފުޅެވެ.
މި ދަތުރުފުޅުގައި ޒެލެންސްކީ އެމެރިކާއަށް ދަތުރު ކުރައްވާފައިވަނީ އެމެރިކާއިން މި ދަތުރުފުޅަށް ޚާއްސަކުރި މަތިންދާ ބޯޓެއްގައެވެ.
މި ދަތުރުފުޅުގެ ކުރިން އެމެރިކާގެ ވައިޓް ހައުސްއިން ނެރުނު ބަޔާނެއްގައި ބުނެފައިވަނީ ޒެލެންސްކީގެ މި ދަތުރުފުޅުން، އިންސާނީ ވަސީލަތުގެ ގޮތުންނާއި އިގްތުސާދީގޮތުން އަދި އެނޫން ގޮތްގޮތުންވެސް އެމެރިކާއިން ޔޫކުރެއިންއަށް ފޯރުކޮށް ދެމުންދާ އެހީތެރިކަމާއި އަދި ހަނގުރާމައަށް ކިތަންމެ ދިގު މުއްދަތެއް ނެގިކަމުގައި ވިނަމަވެސް އެމެރިކާ ޔޫކުރެއިންއާއިއެކު އޮންނަ އޮތުން ރަމްޒު ކޮށްދޭނެ، ކަމުގައެވެ.
ޒެލެންސްކީ މި ދަތުރުފުޅުގައި ވައިޓް ހައުސްއަށް ވަޑައިގަތުން އޭނާއަށް މަރުހަބާ ވިދާޅުވެފައިވަނީ ރަތް ދޫލާގައި، ބައިޑްބްގެ ދެމަފިރި ކަނބަލުންނެވެ.
އަދި ވައިޓް ހައިސްގައި ޒެލެންސްކީއާއި ބައްދަލު ކުރެެއްވުމަށްފަހު ބައިޑްންވަނީ އެމެރިކާއިން ޔޫކުރެއިންއަށް 2 ބިލިއަން ޑޮލަރުގެ އަސްކަރީ އެހީ ފޯރުކޮށްދޭނެކަން އިއުލާން ކުރައްވާފައެވެ.
މީގެ ތެރޭގައި އެމެރިކާއިން ޔޫކުރެއިންއަށް ފޯރުކޮށް ދިނުމަށް މިހާރު ހަމަޖެހިފައިވާ ޕެޓްރިއޮޓް މިސައިލް ސިއްޓަމްވެސް ހިމެނެއެވެ.
މި ޕްޓެއިއޮޓް ސިސްޓަމް ޔޫކުރެއިންގައި ބޭނުން ކުރަން ފެށުމުގެ ކުރިން 3 ވަނަ ގައުމެއްގައި ޔޫކުރެއިން ސަފައިނަށް މި ސިސްޓަމާއި ގުޅޭ ތަމްރީން ފޯރުކޮށް ދިނުމަށް ވަނީ ހަމަޖެހިފައެވެ. އެހެންނަމަވެސް އެއީ ކޮންގައުމެއް ކަމެއް އެމެރިކާއިން ހާމަކޮށްފައެއް ނުވެއެވެ.
އެއަށްފަހު މިއަދުގެ ވަގުތެއްގައި ޒެލެންސްކީ ވަނީ އެމެރިކާގެ ގާނޫނުހަދާ މަޖިލިހުގައި ތަގްރީރު ކުރައްވާފައެވެ. މި ތަގުރީރުގައި ޒެލެންސްކީ ވަނީ އެމެރިކާއިން ޔޫކުރެއިންއަށް ވެދެމުންދާ އެހީތަކަށް އެގައުމަށް ޝުކުރު އަދާކޮށްފައެވެ.
އަދި ޒެލެންސްކީ ވިދާޅިވެފައިވަނީ އެމެރިކައިން ޔޫކުރެއިންއަަށް ވެދެމުންދާ އެހީތެރިކަމަކީ ޑިމޮކްރަސީގެ ދިރި ދެމި އޮތުމަށްޓަކާ ވެދޭ އެހީތެރިކަމެއް ކަމަށާއި، މިހާރު ކުރިޔަށްދާ ހަގުރާމާގައި އެގުމު އަމާން ނުދޭނެ ކަމުގައެވެ.
