އިންޑިއާގެ އެހީގައި މަރާމާތުކޮށް، ޒަމާނީ ފެންވަރަށް ހަދަމުން އަންނަ އޮލިމްޕަސް ސިނަމާ އެޑްވާންސް ބުކިން އަށް ހުޅުވާލައިފިއެވެ.
އަންނަ މަހުގެ 25 ވަނަ ދުވަހު، ކުލަގަދަ ހަފްލާއަކާއެކު އޮލިމްޕަސް ހުޅުވުން އޮންނާނެކަމަށް ނެޝަނަލް ސެންޓަރ ފޮރ ދި އަރޓްސްއިން ވަނީ ބުނެފައެވެ.
ދިވެހި ފިލްމުތައް އަޅުވަން ރާއްޖޭގައި ހާއްސަ ކޮށްފައިވާ ހަމައެކަނި ސިނަމާ ނުހުޅުވައި ލަސްވާތީ ފިލްމީ ދާއިރާގައި މަސައްކަތްކުރާ ގިނަ ބަޔަކު ކަންބޮޑުވުން ފާޅުކޮށްފައިވަނިކޮށް، އާޓްސް މިނިސްޓްރީން އިއްޔެ ކުރި އިއުލާނެއްގައި ބުނީ އޮލިމްޕަހުގައި އެކި ހަރަކާތްތައް ބޭއްވުމަށް އެދޭ ފަރާތްތަކަށް މިހާރު އެތަން އެޑްވާންސްކޮށް ބުކް ކުރެވޭނެ ކަމަށެވެ. އޮލިމްޕަހުގައި ހިމެނޭ ޕްރެކްްޓިސް ރޫމްތަކާއި އޮލިމްޕަސް ހޯލް ވެސް ބުކް ކުރެވޭނީ އަންނަ މަހުގެ 15 އިން ފެށިގެންނެވެ.
އޮލިމްޕަސް ތަރައްޤީކުރުމުގެ މަސައްކަތްތައް ކުރިއަށްގެންދިޔައީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގައި ކުރިއަށް ގެންގޮސްފައިވަނީ އިމާރާތް މަރާމާތުކޮށް، ގެންނަންޖެހޭ ބޮޑެތި ބަދަލުތައް ގެނައުމުގެ މަސައްކަތެވެ. މި މަސައްކަތްތައް މިހާރު ވަނީ ނިމިފައެވެ. އެގޮތުން ޓިކެޓް ކައުންޓަރަށް ބަދަލުގެނައުމާއި، ހޯލާއި، ކޮރިޑޯއާއި ކެފޭ ސަރަޙައްދާއި އިމާރާތުގެ ބޭރަށްވެސް ބަދަލު ގެނެސްފައިވެއެވެ. އަދި ދެވަނަ ފިޔަވަހީގައި ހިމަނައިގެން އޮލިމްޕަހުގެ ސައުންޑް ސިސްޓަމާއި ޓެކް މަސައްކަތްތައް ދަނީ ކުރަމުންނެވެ. އަދި މިއުޒިކާއި ޑާންސް ޕްރެކްޓިސް ކުރުމަށްވެސް ރޫމްވަނީ ހަދާފައެވެ.
އެންސީއޭއިން މިހާރުވަނީ އޮލިމްޕަހުގައި ފިލްމު އެޅުވުމާއި ހަރަކާތްތައް ހިންގަން ބޭނުންވާ މީހުން، ބުކިންގ ހެއްދުމުގެ ފުރުޞަތު ހުޅުވާލާފައެވެ. ދިވެހި ސަރުކާރާއި އިންޑިއާގެ ސަރުކާރާ ދެމެދުވެފައިވާ، "ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް" ގެ ދަށުން އޮލިމްޕަސް މަރާމާތުކުރަމުން އަންނައިރު އެތަނުން ޒަމާނީ ބޮޑެތި ބަދަލުތަކެއް ފެންނާނެ އެވެ. ފިލްމު ސްކްރީން ކުރުމަށް ޑިޖިޓަލް ސިނަމާ ޕްރޮޖެކްޓަރަކާއި ރިޓްރަކްޓަބަލް ސްކްރީނާއި 7.1 ސައުންޑް އިންސްޓޯލްކުރާނެ އެވެ. އޮލިމްޕަހުގެ ބެކްޔާޑުގައި މިއުޒިޝަނުންނަށް ހާއްސަ ސަރަހައްދެއް ވެސް ހިމެނެއެވެ. އޮލިމްޕަހުގައި އެންމެ ފަހުން ފިލްމް ދައްކާފައިވަނީ 2019 ވަނަ އަހަރުއެވެ.
