ބޮލީވުޑްގެ މަޝްހޫރު ޑައިރެކްޓަރު ސަންޖޭ ލީލާ ބަންސާލީ އަލަތު ވެބް ސީރީޒް "ހީރާމަންޑީ" ގެ ރޯލަކަށް ޖެކީ ޝްރޮފް ވެސް ސޮއިކޮށްފައިވާ ކަމަށް ރިޕޯޓްތައް ބުނެފިއެވެ.
މިދިޔަ އަހަރުގެ އޮގަސްޓް މަހު "ހީރާމަންޑީ" އިއުލާންކުރި ނަމަވެސް މީގެ ކާސްޓް މިހާތަނަށް ރަސްމީކޮށް އިއުލާންކޮށްއެއް ނުވެ އެވެ. ބަންސާލީ ބުނެފައިވާ ގޮތުގައި މި ސީރީޒްގެ ކާސްޓް ވާނީ ވަރަށް ބޮޑު ސަޕްރައިޒަކަށެވެ.
ނަމަވެސް މިހާރުވެސް ބައެއް ނަންތަށް ވަނީ ފެންމަތިވެފައިއެވެ. އެގޮތުން ކުރީގެ ވަރަށް މަޝްހޫރު ބަތަލާއިންވެސް މި ސީރީޒް އިން ފެނިގެންދާނެއެވެ. މިއީ ސަންޖޭ، ނެޓްފްލިކްސް އަށް ހަދާ ވެބް ސީރީޒްއެކެވެ.
"ހީރާމަންޑީ" ގެ ކާސްޓްގައި ސޮނާކްޝީ ސިންހާ، މަނީޝާ ކޮއިރަލާ، ހުމާ ގްރޭޝީ، އަދިތީ ރާއޯ ހައިދަރީ، ރޭކާ، ފަރުދީން ޚާނާއި އޭނަގެ މައިދައިތަ ކުރީގެ ބަތަލާ މުމްތާޒްގެ އިތުރުން ފަރީދާ ޖަލާލު ފަދަ ތަރިން ހިމެނެއެވެ.
View this post on Instagram
"ހީރާމަންޑީ" ގެ ކާސްޓާއި ޖެކީ ގުޅުން އިރުގައި މީގެ ކުރިންވެސް ޖެކީ ވަނީ ބަންސާލީ އާއި އެކުގައި މަސައްކަތް ކޮށްފައިއެވެ. އެއީ ބަންސާލީގެ ކާމިޔާބު ފިލްމް 2002 ވަނަ އަހަރުގައި ނެރުނު "ދޭވްދާސް"އެވެ. މި ފިލްމްގައި ޖެކީ އާއި އެކުގައި ފެނިގެންދިއައީ ޝާހުރުކް ހާން، މަދުރީ ޑީކްޝިތް އަދި އައިޝްވަރްޔާ ރާއިއެވެ.
މި ވެބް ސީރީޒްގެ ފުރަތަމަ އެޕިސޯޑް ޑައިރެކްޓް ކުރާނީ ބަންސާލީއެވެ. ނަމަވެސް ބާކީ ހުރިހާ އެޕިސޯޑްތަކެއް ޑައިރެކްޓް ކުރާނީ ވީބޫ ޕޫރީއެވެ. ވީބޫ އަކީ 2015 ވަނަ އަހަރުގެ ފިލްމް "ހަވައިޒާދާ"ގެ ޑައިރެކްޓަރެވެ.
View this post on Instagram
ދެ ސީޒަނަކަށް ހަދާ "ހީރާމަންޑީ"ގެ ފުރަތަމަ ސީޒަނުގައި 7 އެޕިސޯޑް ހިމެނެއެވެ. މި ވެބް ސީރީޒް ދައްކަން ފަށާ ދުވަހެއް އަދި ނޭނގެއެވެ. ސީރީޒްގެ އެއް ޕްރޮޑިއުސަރަކީވެސް ބަންސާލީއެވެ. މި ސީރީޒް ދައްކަން ފަށާނެ ދުވަހެއް އަދި ހާމައެއް ނުކުރެއެވެ.
