ކުރީގެ ރައީސް ޔާމީންގެ މައްޗަށް ދައުލަތުން ކުރާ ދައުވާތަކުގައި ޔާމީންއާއި ދެކޮޅަށް ހެކިބަސްދޭ ހަސްމުންނަށް ދައުވާނުކުރާނެ ކަމުގެ ޔަގީންކަން ފުލުހުން ދޭ ކަމަށް ޔާމީންގެ ވަކީލުން ތުހުމަތު ކުރައްވައިފިއެވެ.
ރައީސް ޔާމީންގެ ޤާނޫނީ ވަކީލުންގެ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޤާނޫނީ ވަކީލް އަލީ ޝާހު ވިދާޅުވީ ފުލުހުންގެ އިސް ވެރިންގެ ގޮތުގައި ތިބި ބައެއް ބޭފުޅުން ބައެއް ހަސްމުންނަށް ވަކި ގޮތަކަށް ބަޔާން ދިނުމަށް އަންގަމުންދާ ކަމަށެވެ. އޭގެ އިތުރުން ވަކި ގޮތަކަށް ރައީސް ޔާމީން ފްރޭމް ކުރުމަށްޓަކައި ކަންކަންކޮށް އަދި އެގޮތަށް ބަޔާން ދީފިކަމަށް ވާނަމަ އެ ފަރާތްތަކުގެ މައްޗަށް ދައުވާ ނުކުރާނެކަމަށް ބުނަމުންދާ ކަމަށްވެސް އޭނާ ވިދާޅުވިއެވެ.
ނިކަން ބައްލަވާ މިހާރު ދިވެހި މުޖުތަމައުގެ ހާލަތަށް ބަލާލާއިރުގައި ކޮބައިތޯ ޖިންސީ ކުށުގެ މައްސަލަތައް. އިންތިހާއަށް ތިލަވެފައި. ސިޔާސީ އެތަކެއް ފަރާތްތަކަށް މިފަދަ ތުހުމަތުތަކެއް ކުރެވިފައި ވަނީ.
– ޝާހު ވިދާޅުވިއެވެ.
ޝާހު ވިދާޅުވީ ސަރުކާރުގެ އިސް މަގާމުތަކުގައި ތިއްބެވި ބޭފުޅުން ބަނގުރާ ބޭނުންކުރާތަން ފެންނަ މަންޒަރުތަކާއި ވީޑިއޯތައް ވެސް މިހާރު އާންމު ކުރަމުންދާ ކަމަށާއި މިއީ އަންނަން އޮތް ޖީލުތަކަށް ދޭ ވަރަށް ނުރައްކާތެރި މެެސެޖެއް ކަމަށެވެ. އަދި އެމްއެމްޕީއާރުސީގެ ހިޔާނުގައި ރައްޔިތުންގެ މަޖިލީހުގެ މެމްބަރުންނާއި ވަޒީރުން ހިމެނޭ އިރު ވެސް އެ މައްސަލަތައް ނުބަލާތީ ފާޑު ވިދާޅުވިއެވެ.
ޔާމީންގެ ވަކީލުން މިފަދަ ތުހުމަތުތަކެއް ކޮށްފައިވާއިރު ވ. އާރަށު މައްސަލައިގައި ޔާމީންގެ މައްޗަށް ދައުލަތުން އުފުލާފައިވާ ދައުވާގައި އަޑުއެހުންތައް ނިންމާލައި ހުލާސާ ބަޔާންވެސް ވަނީ އިއްވާފަ އެވެ. މި މައްސަލައިގައި ދެން އޮންނާނީ ހުކުމް ކުރުމެވެ.
ޔާމީންއާ ދެކޮޅަށް ހުށަހެޅި ހެކިންގެ ތެރޭގައި ކުރީގެ ނައިބު ރައީސް އަހުމަދު އަދީބު އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ކުރީގެ މެނޭޖިން ޑިރެކްޓަރު ޒިޔަތު ހިމެނެއެވެ. މައްސަލައިގައި އަދީބު އާއި ޒިޔަތު ވަނީ ކޯޓުގައި ޔާމީންއާއި ދެކޮޅަށް ހެކިބަސް ދީފައެވެ. ނަމަވެސް އެ ހެކިތައް ބަލައިނުގަތުމަށް ޔާމީންގެ ވަކީލުން ވަނީ އެދިވަޑައިގެންފައެވެ.
ހުލާސާ ބަޔާނުގައި ދައުލަތުން ވަނީ ދައުވާގެ ސީޣާގައި ދައުލަތުން އެދިފައިވާ ގޮތަށް ޔާމީން ލޯންޑާކުރި ކަމަށް ތުހުމަތުކުރެވޭ އެއް މިލިއަން އެމެރިކާ ޑޮލަރާއި، އެ ފައިސާއަށް އެއްކޮށްފައިވާ 2،413،230 އެމެރިކާ ޑޮލަރާ އެކު ޖުމްލަ 3،413،230 އެމެރިކާ ޑޮލަރު އިންވެސްޓްކޮށްގެން ރައީސް ޔާމީން ލިބިފައިވާތީ އެ ފައިސާ ދައުލަތަށް ނަގައިދިނުމަށް އަމުރުކޮށްދިނުމަށް އެދިފައެވެ.
