މާލޭގެ ރައްޔިތުންނަށް ޚާއްސަ ކޮށްގެން ދޫކުތާ ގޯތި ލިބޭ ފަރާތްތަކުގެ ނަންނަތައް އަންނަ މެއިމަހު އިއުލާން ކުރާގޮތަށް ހަމަޖެހިފައިވާކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އަސަލަމް ވިދާޅުވި ގޮތުގައި މިހާރު ކުރިޔަށް ދަނީ، ރައީސް ސާލިހުގެ ސަރުކާރުން ކުރިޔަށް ގެންދާ "ގެދޮރުވެރިޔާ" މަޝްރޫއުގެ ދަށުން ދޫކުރާ ގޯއްޗާއި އަދި ފްލެޓަށް ފޯމު ހުށަހަޅާފައިވާ ފަރާތްތަކުން ހުށަހަޅާފައިވާ ފޯމުތައް ބަލާ ދިރާސާ ކުރުން ކަމުގައެވެ.

ރައްޔިތުންގެ މަޖިލީހުގެ ގައުމީ ތަރައްގީގެ ކޮމިޓީގައި ވާހަކަ ދައްކަވަމުން އަސްލަމް ވިދާޅުވީ މިހާރު ފޯމު ހުށަހެޅުމުގެ މުއްދަތު ހަމަވެފައިވި ނަމަވެސް، ފޯމު ހުށަހެޅުމުގެ މަރުހަލާގައިވެސް ފޯމުތަކުގައި ހުރި މައްސަލަތައް ބަލާ ދިރާސާކޮށް، މައްސަލަ ހުރި ފަރާތްތަކާއި ގުޅާ މައްސަލަތައް ރަގަޅު ކުރުމުގެ މަސައްކަތް ގެންދިޔައީ ކުރަމުން ކަމުގައެވެ.

އަސްލަމް އިތުރަށް ވިދާޅުވި ގޮތުގައި ގޯއްޗަށް އެދި ހުށަހަޅާފައިވާ ފޯމުތައް ދިރާސާ ކުރުމަށް ރައީސުލްޖުމްހޫރިއްޔާ ޚާއްސަ ކޮމިޓީއެއް އެކުލަވާލާފައިވާ ކަމަށާއި، އެ ކޮމިޓީން ޝޯޓު ލިސްޓު ކުރުމުގެ މަސައްކަތް ކުރަމުން ދާނެކަމަށެވެ.