ޓްރާންސްޕޯޓް މިނިސްޓަރ ޢާއިޝަތު ނަޙުލާ، އެމިނިސްޓްރީގެ ޑެޕިއުޓީ މިނިސްޓަރ ޝިމާޒް އަލީއަށް ދިން ހަމަލާ ކޮށްވެރިކުރައްވައިފިއެވެ. މިޙަމަލާ ކުށްވެރިކުރައްވަމުން މިނިސްތަރ ނަހުލާ ވިދާޅުވީ، ކޮރަޕްޝަން ހުއްޓުވުމަށް ކުރަންޖެހޭ މަސައްކަތް އެއްވެސް ފަސްޖެހުމެއްނެތި ކުރައްވާނެކަމަށެވެ.

ޝިމާޒަށް ދިން ޙަމަލާ ހަރުކަށި އިބާރާތުން ކުއްވެރި ކުރައްވާކަމަށާ، މައްސަލަތައް ބަލަމުންދާ ދަނޑިވަޅުގައި އެކަމަށް އެކި ގޮތްގޮތުން ނުފޫޒު ފޯރުވަން މަސައްކަތްކޮށް އެކަމުގެ ތެރޭގައި މިނިސްޓަރުގެ އާއިލާ އަށް ނިސްބަތްކޮށް ދެކެވޭ ވާހަކަތަކަކީ އަބުރު ކަތިލިމުގެ ހުތުރު އަމަލުތަކެއްކަމަށްވެސް މިނިސްޓަރ ވިދާޅުވެފައިވެއެވެ. އަދި ކޮރަޕްޝަން ހުއްޓުވުމަށް ކުރަންޖެހޭ މަސައްކަތް ފަސްޖެހުމެއްނެތި ކުރާނެކަމަށް ވިދާޅުވެފައިވެއެވެ.

މިނިސްޓަރު މިހެން ވިދާޅުވީ ޝިމާޒަށް ޙަމަލާދިން މައްސަލައާ ގުޅިގެން ކުރެއްވި ޓްވީޓެއްގައެވެ. އެހެންނަމަވެސް އެޓްވިޓުގައި މިނިސްޓަރ އެވިދާޅުވާ، ބަލަމުންދާ މައްސަލައަކީ ކޮބައިކަމެއް ވިދާޅެއް ނުވެއެވެ. ބެލެވޭގޮތުގައި އެވިދާޅުވަނީ ޝިމާޒުގެ މައްޗަށް ތުހުމަތުކުރާ ކޮރަޕްޝަންގެ މައްސަލައެވެ. އެމައްްސަލަ އެންމެ ފުރަތަމަ ފެންމަތިވުމުން މިނިސްޓަރު ވަނީ ޝިމާޒުގެ ދިފާޢުގައި ވާހަކަފުޅުދައްކަވާފައެވެ.

އެއީ މީގެ މަސްތަކެއްކުރިން މެޝިން ރީޑަބަލް ނަންބަރު ބޯޑު ތައްޔާރުކުރުމުގެ މަސައްކަތް ޙަވާލުކުރުމުގައި ވަކި ފަރާތަކަށް ނާޖައިޒު ފައިދާ ހޯދައިދީފައިވާކަމަށް ބުނެ ތުހުމަތުކުރެވުނު މައްސަލައެވެ. މިމައްސަލަ އޭސީސީން ބަލައި މައްސަލާގައި ޝިމާޒުގެ މައްޗަށް ދަޢުވާކޮށްދިނުމަށް އެދި އޭސީސީން ޕީޖީއަށްވެސް ފޮނުވިއެވެ. އެހެންނަމަވެސް އެމައްސަލާގައި ދައުވާ ނުކުރަން ޕީޖީ އޮފީހުން ވަނީ ނިންމާފައެވެ. ޕީޖީ އޮފީހުން ބޭއްވި ޕްރެސްކޮންފަރެންސްގައި މިކަމާ ބެހޭގޮތުން ޕީޖީ ހުސެއިން ޝަމީމް ވަނީ ވާހަކަފުޅުވެސް ދައްކަވާފައެވެ. ޕީޖީ ވިދާޅުވީ އެ މައްސަލައިގައި މީހެއްގެ މައްޗަށް ކޮރަޕްޝަންގެ ތުހުމަތުގައި ދައުވާއެއް ކުރެވެން ނެތް ކަމަށް ނިންމާފައިވާކަމަށެވެ. ޕީޖީ ވިދާޅުވީ އެކަން އޭސީސީއަށްވެސް އަންގާފައިވާކަމަށެވެ.

ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ޝިމާޒް އަލީ އަށް ދިން ހަމަލާ ހަރުކަށި އިބާރާތުން ކުއްވެރި ކުރަން. މައްސަލަތައް ބަލަމުންދާ ދަނޑިވަޅުގައި މިކަމަށް އެކި ގޮތްގޮތުން ނުފޫޒު ފޯރުވަން މަސައްކަތްކޮށް، (1/2).

— Aishath Nahula (@aishath_nahula) November 18, 2022

އެހެންނަމަވެސް ޝިމާޒާއި މިނިސްޓަރު ޢާއިޝަތު ނަހުލާއާ ދެބޭފުޅުންގެ މެދުގައި ދާދިފަހުން ވަނީ ނުތަނަވަސްކަމެއް އުފެދިފައެވެ. ޝިމާޒްގެ މައްސަލަ މިނިސްޓަރު އަލުން ބައްލަވައި އޭނާއާމެދު ފިޔަވަޅު އަޅައި މަޤާމުން ވަކިކޮށްދެއްވުމަށް އެދި، ރައީސް އޮފީހަށް ސިޓީއެއް ފޮނުއްވިކަން ވަނީ ހާމަވެފައެވެ. މިިސިޓީ ލިބިފައިވާކަން ރައީސް އޮފީހުގެ ތަރުޖަމާނުވެސް ވަނީ ހާމަކުރައްވާފައެވެ. އެހެންނަމަވެސް ސިޓީއާ ގުޅިގެން އެއްވެސް ފިޔަވަޅެއް މިހާތަނަށް އަޅުއްވާފައެއް ނުވެއެވެ. ޝިމާޒް ނިސްބަތްވާ އެމްއާރުއެމްއިން ވަނީ ޝިމާޒްގެ މައްސަލަ އިންސާފުވެރިގޮތަކަށް ބަލާފައި ނޫނީ އޭނާއާމެދު ފިޔަވަޅެއް އެޅުމަކީ ރަނގަޅުކަމެއް ނޫންކަމަށް ބުނެފައެވެ. ޝިމާޒު ވަކިކުރަން ރައީސް އޮފީހަށް ސިޓީ ފޮނުވި ހިސާބުން އޭނާއަށް އެކިކަހަލަ އިންޒާރުތައް ލިބުމާއި އޭނާގެ ސައިކަލަށް ގެއްލުން ދިނުމުގެ ޢަމަލުތައް ހިނގަމުންދާކަމަށް ޝިމާޒުވަނީ ހާމަކޮށްފައެވެ. އަދި އެފަދަ ބައެއް މައްސަލަތައް އޭނާވަނީ ފުލުހުންނަށްވެސް ހުށަހަޅާފައެވެ. އެހެންނަމަވެސް މިހާތަނަށް އެފަދަ މައްސަލައަކާމެދު ފުލުހުން މާ ތަފްސީލް މަޢުލޫމާތެއް ހާމައެއް ނުކުރައްވައެވެ.

ރޭ ޝިމާޒް ޢަލީއަށް މަގުމަތިން ބަޔަކު ވަނީ ހަމަލާ ދީފިއެވެ. މިކަމާ ގުޅިގެން ފުލުހުން ވިދާޅުވެފައިވަނީ ޓްރާންސްޕޯޓު މިނިސްޓްރީގެ ޑެޕިއިޓީ މިނިސްޓަރަކަށް ހަމަލާދިން މައްސަލައެއް ހުށަހެޅިފައިވާކަމަށާ، އެމައްސަލަ ބަލަމުންދާކަމަށެވެ.

ޝިމާޒް ނިސްބަތްވާ ސިޔާސީ ޕާޓީ އެމްއާރުއެމްއިން ވަނީ މިކަން ކުށްވެރިކޮށްފައެވެ. އަދި މިމައްސަލަ ބަލައިދިނުމަށާއި މިކަންކުރި ބަޔަކު ހޯދައި ފިޔަވަޅު އަޅައިދިނުމަށް އެޕާޓީންވަނީ ކަމާބެހޭ ފަރާތްތަކަށް ގޮވާލާފައެވެ.