އަންނަ ޑިސެމްބަރުމަހު ކައިވެނި ކުރުމަށް ތައްޔާރުވަމުން އަންނަ ބޮލީވުޑްގެ އެންމެ މަގުބޫލު ޖޯޑު ކަމުގައިވާ ކިއާރާ އަދުވާނީ އާއި ސިދާތު މަލްހޮތުރާގެ ކައިވެނި އޮންނާނީ ޗަންދީގަޅްގެ އޮބެރޯއީ ސުކްވިލާސް ސްޕާ އެންޑް ރިސޯޓްގައި ކަމަށް މުނިފޫހި ފިލުމުގެ ޚަބަރުތަށް ގެނެސްދޭ ނޫސްތަކުން ބުނެފިއެވެ.
ދާދި ފަހުން މި ދެތަރިން އެކުގައި އެތަން ބަލަން ޗަންދީގަޅް އަށް ދަތުރެއް ވެސް ކޮށްފައިވާ ކަމަށާއި، ވަރަށް ކުލަގަދަކޮށް ކައިވެނީގެ ހަފުލާ ކުރިއަށް ގެންދާނެ ކަމަށް ރިޕޯޓްތައް ބުނެއެވެ. މި ތަނަކީ މިދިޔަ އަހަރު އެކްޓަރު ރާޖްކުމާރް ރާއޯ އާއި ޕަޓްރަލޭކާގެ ކައިވެނި ހަފުލާ ވެސް ބޭއްވި ތަނެވެ.
View this post on Instagram
މި ތަރިންގެ ކައިވެނި އައިސް ބޯމަތި ވާއިރުގައި ދެމީހުންގެ ކައިވެންޏަށް ތައްޔާރުވުމަށް ކުރަންޖެހޭ ކަންކަން ދެއާއިލާގެ ފަރާތުން ވެސް އަންނަނީ ކުރަމުން ކަމަށް ޚަބަރުތައް ބުނެއެވެ.
އަންނަ މަހު ކައިވެނިކުރަން ނިންމާފައިވާ ކަމަށް މީޑިއާތަކުން ބުނަމުން ދިޔަ ނަމަވެސް މިކަމާ ބެހޭ ގޮތުން ދެ ތަރިން އެއްވެސް ވާހަކައެއް ނުދައްކައެވެ. އަދި ލޯބީގެ ގޮތުން ގުޅިގެން އުޅޭކަމަށް ވެސް މިހާތަނަށް ދެ ތަރިން އެއްބަސް ވެފައިއެއް ނުވެއެވެ.
ކުރިން އަޑުތައް އެރި ގޮތުން ސިދާތާއި ކިއާރާ ކައިވެނިކުރަން އޮތީ އަންނަ އަހަރުގެ ކުރީކޮޅުއެވެ. އެކަމަކު އެކަން މިހާރު ޑިސެމްބަރަށް އަވަސްކޮށް، ދެ ފަރާތުގެ އާއިލާ އިން އަންނަނީ ފޯރީގައި ތައްޔާރީތައްވަމުންނެވެ.
View this post on Instagram
ސިދާތާއި ކިއާރާ ޑޭޓްކުރަން ފެށީ، އެ ދެ ތަރިން އެކުގައި ކުޅުނު ފުރަތަމަ ފިލްމު، "ޝޭރްޝާހް"ގެ ޝޫޓިންގެ ތެރެއިން ދިމާވެގެންނެވެ. އެ ފިލްމަކީ ދެމީހުން އެކުގައި ފެނިގެންދިޔަ އަލަތު ފިލްމު ވެސް މެއެވެ. އަދި ހަމައެއާއި އެކުގައި ފިލްްމަކީ ވަރަށް ކާމިޔާބު ފިލްމެކެވެ.
ކިއާރާ، 30، އާއި ސިދާތު، 37، ގެ ކައިވެންޏަށް ފަހު، ސިދާތުގެ އުފަން ސިޓީ، ނިއު ދިއްލީ އާއި ކިއާރާގެ އުފަން ސިޓީ، މުމްބާއީގައި ހާއްސަ ރިސެޕްޝަންތަކެއް ވެސް ބާއްވަން ހަމަޖެހިފައިވާ ކަމަށް ރިޕޯޓްތައް ބުނެއެވެ.
