އެމެރިކާ ތަފާތު ސްޓޭޓުތަކުގެ އެންމެފަހުގެ ނަތީޖާތައް އަންނަމުން ދާވަރަކަށް އެމެރިކާގެ ރައީސްކަމަށް އިންތިޚާބު ވާނެކަން ޔަގީންވެފައިވާ އިންތިޚާބީ ރައީސް ޖޯ ބައިޑްއާއި، މިހާރުގެ ރައީސް ޓްރަމްޕްއާއި ދެމެދު އޮތް ފަރަގު ކުރިއަށްވުރެ ބޮޑުވެއްޖެއެވެ.
މިހާރުގެ ނަތީޖާ ދައްކާގޮތުން، ގިނަ ސްޓޭޓުތަކުގެ ދާއިމީ ނަތީޖާ އިއުލާން ކުރެވިފައިވާއިރު، ބައިޑްން އުޅެނީ ޓްރަމްޕަށްވުރެ 6 މިލިއަން ވޯޓު ކުރީގައެވެ.
ޕޮޕިއުލާ ވޯޓުން (ވޯޓުލީ މީހުންގެ މުޅި އަދަދުން ކުރި ހޯދުން) އިންނާއި އަދި އިލެކްޓޯރަލް ވޯޓުންވެސް ބައިޑް މިއިންތިޚާބުގައި ކުރި ހޯދާފައިވާއިރު، އަދިވެސް ޓްރަމްޕް ގެންދަވަނީ އިންތިޚާބުގެ ނަތީޖާ ގަބޫލުކުރުމަށް ދެކޮޅު ހައްދަވަމުންނެވެ.
އެންމެ ފަހުގެ ނަތީޖާތައް ދައްކާގޮތުން، ކުރީގެ ނާއިބު ރައީސް އަދި ޑިމޮކްރަޓިކް ޕާޓީގެ ރިޔާސީ ކެޑީޑޭޓް ޖޯ ބައިޑްވަނީ މުޅި އިންތިޚާބުގައި 80 މިލިއަން ވޯޓު ކާމިޔާބު ކޮށްފައެވެ. މިއީ އެމެރިކާގެ ތާރީޚުގައިވެސް، ރިޔާސީ އިންތިޚާބެއްގައި އެންމެ ގިނަ އަދަދަކަށް އެއް ކެޑިޑޭޓަކު ވޯޓު ހޯއްދެވި ފަހަރެވެ. މިއިންތިޚާބުގައި ރިޕަބްލިކަން ޕާޓީގެ ކެޑިޑޭޓު ޓްރަމްޕަށް ކާމިޔާބު ކުރެވިފައިވަނީ 74 މިލިއަން ވޯޓެވެ.
މީގެ ދެހަފްތާކުރިން، ޕެންސިލްވޭނިއާގެ 20 އިލެކްޓޯރަލް ވޯޓު ބައިޑްން ކާމިޔާބު ކުރުމާއެކު، އިންތިޚާބު ކާމިޔާބު ކުރުމަށް ބޭނުންވާ 270 އިލެކްޓޯރަލް ވޯޓަށްވުރެ މަތިން ވޯޓު ލިގެންދާނެކަން ޔަގީންވެ، އެމެރިކާގެ ގިނަ މީޑިއާތަކުން ވަނީ ބައިޑްން އިންތިޚާބު ކާމިޔާބު ކުރިކަން އިއުލާން ކޮށްފައެވެ. ބައިޑްން އެންމެފަހުން ވަނީ 306 އިލެކްޓޯރަކް ވޯޓު ކާމިޔާބު ކޮށްފައެވެ. ޓްރަމްޕަށް ކާމިޔާބު ކުރެވުނީ 232 އިލެކްޓޯރަލް ވޯޓެވެ. މިއީ 2016 ވަނަ އަހަރު ހިލަރީއާއި ވާދަކޮށް ޓްރަމްޕް ކުރި ހޯއްދެވި ނަތީޖާއެވެ.
އިންތިޚާބުގެ ނަތީޖާ ޔަގީންވެގެން ދިޔަނަމަވެސް، އިންތިޚާބުގައި މަކަރުހަދާ އޮޅުވާލާފައި ވާކަމަށް ތުހުމަތުކޮށް ޓްރަމްޕް ވަނީ އިންތިޚާބުގެ ނަތީޖާ ގަބޫލުކުރުމަށް ތަކުރާރުކޮށް ދެކޮޅު ހައްދަވާފައެވެ. އެހެންނަމަވެސް، ފާއިތުވެދިޔަ 2 ހަފްތާގެ ތެރޭގައި، ތަކުރާތުކޮށް ޓްރްމަޕްގެ ލީގަލް ޓީމުން ކޯޓަށްހުށަހެލި އިންތިޚާބާއި ގުޅޭ އެތަކެއް މައްސަލައެއް ކޯޓުންވަނީ މިހާތަނަށް އައިއިރު ސާބިތު ނުވާކަމަށްވެސް ނިންމާފައެވެ.
މިއަހަރުގެ ރިޔާސީ އިންތިޚާބުގައި އެމެރިކާގެ 100 މިލިއަނެއްހާ ރައްޔިތުންވަނީ ޕޯސްޓު މެދުވެރިކޮށް ދުރާލާ ވޯޓު ލާފައެވެ. މިއީ ކޮވިޑުން ރައްކާތެރިވުމުގެ ގޮތުން ގިނަބަޔަކު އެޅި ރައްކާތެރިކަމުގެ ފިޔަވަޅެކެވެ. އަދި ނަތީޖާއެއްގެ ގޮތުން އެހެން އިންތިޚާބުތަކާ ޚިލާފަށް ވޯޓުގުނާ ނިމި އެންމެ ފަހުގެ ނަތީޖާ ވޯޓު ލާދުވަހުގެ ފަހުދުވަހު އިއުލާން ނުކުރެވި، ދާއިމީ ނަތީޖާ އިއުލާން ކުރުން އެތަކެއް ހަފްތާތަކަކަށް ދިގުދެމިގެން ހިގައިދާނެކަމަށް ކުރިންވެސް އޮފިޝަލުންވަނީ ވިދާޅުވެފައެވެ.
ޓްރަމްޕާއި އޭނާއަށް ތާޢީދު ކުރާފަރާތްތަކުން، އެމެރިކާގެ ރިޔާސީ އިންތިޚާބަށްފަހު އިންތިޚާބުގެ އިންސާފުވެރިކަމާ ގުޅޭގޮތުން ސުވާލު އުފެއްދުމުގެ ނަތީޖާއެއްގެ ގޮތުން، ދައުރު ބަދަލުވާއިރު ކުރިޔަށް ގެންދަންޖެހޭ އިންތިގާލީ މަރުހަލާ ވަނީ އަދިވެސް ފަށައި ނުގަނެވިފައެވެ.
މިގޮތުން، އެމެރިކާގެ ޖެނެރަލް ސާވިސް އެޑްމިނިސްޓްރޭޝަން (ޖީއެސްއޭ) އިން އަދިވެސް ޖޯ ބައިޑްއަކީ އިންތިޚާބީ ރައީސްގެ ގޮތުގައި ބަލައިގެންފައެއް ނުވެއެވެ. މި އޭޖެންސީއަކީ އިންތިގާލީ މަރުހަލާގެ ކަންކަން ހަމަޖެއްސުމާބެހޭ ހުރިހާ ޒިންމާއެއް ހަވާލުވެފައި އޮންނަ އޭޖެންސީއެވެ. މިގޮތުން ޖީއެސްއޭ އިން އަދިވެސް ޖޯ ބައިޑްން އިންތިޚާބު ކާމިޔާބު ކޮށްފައިވާކަމަށް ބަލައިގެންފައި ނުވާތީ، ބައިޑްންގެ އިންތިގާލީ ޓީމަށް ލިބެންޖެހޭ މުހިންމެ އެތަކެއް ޑާޓާތަކާއި މައުލޫމާތުތަކެއް ލިބުމުގައި ބޮޑެތި ހުރަސްތަކެއް ވަނީ ކުރިމަތި ވެފައެވެ.
