ކޮޕް 27ގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަށްޓެރި ސްރީލަންކާ ތަމްސީލު ކުރެއްވުމަށް ވަޑައިގަތުމަކީ އެމަނިކުފާނުގެ ހިތުގައި ރާއްޖެއާއިމެދު އޮތް ގަދަރު ކުޑަކަން ހާމަވާކަމެއްކަމަށް ސަރުކާރު ކޯލިޝަންގައި ހިމެނޭ އެމް.އާރް.އެމް އިން ބުނެފިއެވެ.
ކޮޕް27 ގައި ބައިވެރިވުމުގެ ފުރުސަތު ރާޢްޖެއިން ނަޝީދަށް ނުދިނުމުން ނަޝީދު ވަނީ ލަންކާ ތަމްސީލްކުރާ މެމްބަރެއްގެ ގޮތުގައި ސަމިޓަށް ވަޑައިގެންފައެވެ. މިކަމާއި ގުޅިގެން ސަރުކާރުން މިހާތަނަށް ރަސްމީކޮށް އަދި ވަކި އެއްޗެއް ހަމަކޮށްފައި ނުވެއެވެ.
ކޮޕް 27 ގައި ނަޝީދު ލަންކާ ތަމްސީލް ކުރާތީ ކަންބޮޑުވުން ފާޅުކޮށް އެމްއާރުއެމްއިން ނެރުނު ބަޔާނުގައި ބުނެފައިވަނި މި އަހަރުގެ ތިމާވެއްޓާ ބެހޭ ބައިނަލްއަޤްވާމީ ކޮންފަރަންސް، ކޮޕް 27 ގައި ރާއްޖޭގެ ރައްޔިތުންގެ މަޖިލީހުގެ ރައީސް މުޙައްމަދު ނަޝީދު، އެހެން ޤައުމެއް ތަމްސީލު ކުރެއްވުމަށް ވަޑައިގަތުމަކީ، މޯލްޑިވްސް ރިފޯމް މޫވްމެންޓް (އެމް.އާރް.އެމް) އިން ބަލައިގަންނާނެ ކަމެއް ނޫންކަމަށެވެ.
އެޕާޓީން ބުނެފައިވަނީ މިއީ ދިވެހި ދައުލަތުގެ މަޞްލަޙަތާ ފުށުއަރާ، ޤާނޫނު އަސާސީގެ 75 ވަނަ މާއްދާއާއި ރައްޔިތުންގެ މަޖިލީހުގެ ޤަވައިދުގެ ރޫހާ ޚިލާފު، މަޖިލީހުގެ ރައީސް ގެ މަސްއޫލިއްޔަތު ތަކަށް އޮޅުން އަރާ، ސުލޫކީ މިންގަނޑުތަކާ ޚިލާފު އަމަލެއްކަމަށެވެ.
ރާއްޖޭގެ ރައްޔިތުންގެ މަޖިލީހުގެ ރައީސް ކަމުގެ މަޤާމުގައި ހުންނަވައިގެން، ރާއްޖެއިންވެސް ބައިވެރިވާ ބައިނަލްއަޤްވާމީ ކޮންފަރެންސެއްގައި، އެހެން ޤައުމެއްގެ މަންދޫބެއްގެ ގޮތުގައި ވަޑައިގަތުމަކީ އެމަނިކުފާނުގެ ހިތްޕުޅުގައި ރާއްޖެއަށް އޮތް ޤަދަރު ކުޑަކަން ހާމަކޮށްދޭ ކަމެއް.
– އެމްއާރުއެމްއިން ބުނެފައިވެއެވެ.
ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުމުވެސް ކުރިން ފުރުއްވާފައިވާ، އަދި މިހާރު ރައްޔިތުން އިންތިޚާބުކޮށްފައިވާ އެމީހުންގެ މަންދޫބުންގެ މައްޗަށް އެކުލެވިގެންވާ ދައުލަތުގެ ތިންބާރު ތެރެއިން ޤާނޫނު ހެދުމުގެ ބާރުގެ ރައީސް ކަމުގެ މަގާމުގައި ހުންނަވައިގެން ރައީސް މުޙައްމަދު ނަޝީދު މިފަދަ އަމަލެއް ހިންގެވުމަކީ އެމް.އާރް.އެމްއިން ވަރަށް ބޮޑަށް ކުށްވެރިކުރާ ކަމެއްކަމަށް ވަނީ ބުނެފައެވެ.
