އެމެރިކާގެ ރައީސް ޑޮނަލްޓް ޓްރަމްޕް ބަލި ގަބޫލު ނުކުރެއްވިޔަސް، ޖޯ ބައިޑްން އެމެރިކާގެ ރައީސްކަމުގެ ހުވާ ކުރައްވާ ދުވަހު އެމެރިކާގެ ރައީސްގެ ރަސްމީ ޓުވިޓަރ އެކައުންޓް ބައިޑްއާ ހަވާލު ކުރާނެކަމަށް ޓުވިޓަރއިން ބުނެފިއެވެ.
އެމެރިކާގެ ރައީސްގެ ރަސްމީ ޓުވިޓަރ އެކައުންޓަކީ "POTUS@" އެވެ. މިއެކައުންޓަކީ 32.8 މިލިއަން މީހުން ފޮލޯ ކުރާ އެކައުންޓެކެވެ. މި އެކައުންޓުން މިހާތަނަށް 10،900 ޓުވީޓު ކޮށްފައިވާއިރު، އެކައުންޓް އުފަދާފައިވަނީ 2017 ވަނަ އަހަރު، އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައެވެ.
"ޓުވިޓަރ އިން މިހާރުވެސް ދަނީ، އެމެރިކާގެ ރައީސް ހުވާކުރާ ދުވަސް ކަމަށްވާ ޖެނުއަރީ 20 ވަނަ ދުވަހަށް ވައިޓް ހައުސްގެ އިންޓަރނޭޝަނަލް ހުރިހާ ޓުވިޓަރ އެކައުންޓެއްތަކަކުން ކުރަންޖެހޭ ހުރިހާ ތައްޔާރީތަކެއް ކުރަމުން"، ޓުވިޓަރގެ ތަރުޖަމާނު ނިކް ޕެސިލިއޯ ހުކުރު ދުވަހު ވިދާޅުވެފައި ވެއެވެ. "2017 ވަނަ އަހަރުވެސް ޓުވިޓަރއިން އަމަލް ކޮށްފައިވާ ގޮތަށް، މި ތައްޔާރީތަކަކީ އެމެރިކާގެ ނޭޝަނަލް އާކައިވްސް އެންޑް ރެކޯޑްސް އެޑްމިނިސްޓްރޭޝަން އާއި ގުޅިގެން ވަމުންދާ ތައްޔާރީތަކެއް"، އޭނާ ވިދާޅުވިއެވެ.
ވައިޓް ހައުސްއިން ބޭނުން ކުރަމުންދާ ޓުވިޓަރ އެކައުންޓުތަކުގެ ތެރެއިން، ބައިޑްންއާއި ހަވާލު ކުރެވިގެންދާނެ އެކައުންތަކުގެ ތެރޭގައި، ފަސްޓް ލޭޑީގެ ރަސްމީ ޓުވިޓައ އެކައުންޓް FLOTUS@ އާއި، ނާއިބު ރައީސްގެ ރަސްމީ ޓުވިޓަރ އެކައުންޓް VP@ އާއި އަދި ވައިޓް ހައުސްގެ ރަސްމީ ޓުވިޓަރ އެކައުންޓް WhiteHouse@ ވެސް ހިމެނެއެވެ. މި ދުވަހަށްއަށްފަހު ނާއިބް ރައީސް މައިކް ޕެންސްއާއި އަދި ފަސްޓް ލޭޑީ މެލާނިއާ ޓަރަންޕަށް ޓުވީޓު ކުރުމުގެ ފުރުސަތު ލިބިގެންދާނީ އެބޭފުޅުންގެ އަމިއްލަފުޅު ޓުވިޓަރ އެކައުންޓުތަކުންނެވެ.
އެމެރިކާގެ ރައީސް ޓްރަމްޕް އޭނާގެ ދައުރުގައި މިހާތަނަށް ރަސްމީ އަދި ނުރަސްމީ ޓުވީޓުތައްވެސް ކުރެއްވުމުގައި ބޭނުން ކުރައްވާފައިވަނީ އަމިއްލަފުޅު ޓުވިޓަރ އެކައުންޓް realDonaldTrump@ އެވެ. މި އެކައުޓް 88.9 މިލިއަން މީހުން ފޮލޯ ކުރެއެވެ.
ޓްރަމްޕްގެ ވެރިކަމުގެ މުޅި ދައުރުގައިވެސް ޓުވިޓަރއާއި އޭނާއާއި ދެމެދު އޮތީ ނުތަނަވަސް ގުޅުމެކެވެ. އަދި ޓުވިޓަރއިން ވަނީ ފާއިތުވެދިޔަ މަސްތަކުގައި، އެމެރިކާގެ ރިޔާސީ އިންތިޚާބުގައި މަކަރު ހަދާ އޮޅުވާލާފައިވާ ކަމަށްބުނެ ޓްރަމްޕް ކުރަމުންދާ ޓުވީޓު ތަކާއި އަދި ކޮރޯނާ ވައިރަހާ ގުޅޭގޮތުން ފަތުރަމުން ދިޔަ ހަގީގަތާ ޚިލާފު މައުލޫމާތުތަކުގެ ސަބަބުން ކަމަށްބުނެ، ޓްރަމްޕްގެ ޓުވިޓަރ އެކައުންޓު އޮޕަރޭޓު ކުރުމުގައި ބައެއް ހިފެހެއްޓުންތައް ކުރިމަތި ކުރުވާފައެވެ. މިގޮތުން، ފަހުން ޓްރަމްޕް ކޮށްފައިވާ ގިނަ ޓުވީޓުތަކުގައި ޓުވިޓަރއިން ވަނީ ސަމާލު ވުމަށް އަންގާ ޚާއްސަ މެސެޖެއް ހިމަނާފައެވެ. އަދި ޓްރަމްޕްގެ ބައެއ ޓުވީޓުތައް ޓުވިޓަރއިން ސެންސަރުވެސް ކޮށްފައިވެއެވެ.
ޓުވިޓަރއިން އެމެރިކާގެ ރައީސްގެ ޓުވީޓުތަކުގައި އިންޒާރުގެ މެސެޖްތައް ހިމަނާ އަދި ބައެއް ޓުވީޓުތައް ސެންސަރު ކުރަމުން ދިއުމާގުޅިގެން، ބައެއް ފަރާތްތަކުން ވަނީ ޓުވިޓަރ އަށް ވަރަށް ބޮޑަށް ފާޑު ކިޔާފައެވެ. މިފަދަ ފަރާތްތަކުން ބުނާ ގޮތުގައި ޓުވިޓަރ އިންވަނީ އެމެރިކާގެ ކޮންޒަރވޭޓިވުންނާމެދު ސިޔާސީ ވިސްނުމެގައި ބޭއިންސާފުން އަމަލު ކޮށްފައެވެ.
