ބޮލީވުޑްގެ އެންމެ ނުފޫޒު ގަދަ އެއް ޑައިރެކްޓަރ އަދި ޕްރޮޑިއުސަރު ކަރަން ޖޯހަރް އޭނާ ބޭނުންކުރަމުންދިޔަ ޓްވިޓާ އެކައުންޓް ޑިލީޓް ކޮށްލައިފިއެވެ.
އިއްޔެ ކަރަންގެ ޓްވިޓާ އެކައުންޓްއިން އެންމެ ފަހުގެ ޓްވީޓް ވަނީ ދޫކޮށްލައިފައެވެ. މިޓްވީޓްގައި ބުނެފައިވަނީ "ޕޮޒިޓިވިޓީ" އަށް ޖާގަދިނުމަށް ފުރަތަމަ ފިޔަވަޅު އެޅީ ކަމަށެވެ. މި ޓްވީޓްގައި އޭނާ ބުނެފައިވަނީ ޖާގަ އޮތީ ހަމައެކަނި ޕޮޒިޓިވިޓީއަށް ކަމަށާއި އެމަގު ކޮށުމުގެ މީ ފުރަތަމަ ފިޔަވަޅު ކަމަށެވެ. އެޔަށްފަހު ޓްވީޓް ނިންމާލައިފައިވަނީ "ގުޑްބާއި ޓްވީޓާ" ޖެހުމަށްފަހުގައިއެވެ.
ވަކި ބަޔަކަށް ފައިދާވާގޮތަށް ވަކި ބަޔަކު ކުރިއެރުވުމަށް މަސައްކަތް ކުރާ ޑައިރެކްތަރެއްގެ ތުހުމަތު ކަރަންގެ ބޮލުގައި ގިނަ ބަޔަކު ވަނީ އަޅުވާފައެވެ. އަދި ކުރީގެ ސްޓާރުންގެ، އެކްޓްކުރަން ނޭގޭ ދަރިން ބޮލީވުޑަށް ނެރެ އޭނާގެ ނުފޫޒުން އެކުދިންނަށް މަސައްކަތް ހޯދައި ދޭކަމަށްވެސް ގިނަބަޔަކު ގަބޫލުކުރެއެވެ.
ނަމަވެސް މިއީ ކަރަންގެ ކުރިއަށް އޮތް ފިލްމް 'ބްރަމާސްތުރާ" ގެ ދެވަނަ ބަޔަށް ސަމާލުކަން ދިނުމަށް ކުރި ކަމެއްކަމަށްވެސް ގިނަ ބަޔަކު ވަނީ ބުނެފައެވެ. އަދި އޭނާ އަށް މާގިނަ ދުވަހު ޓްވިޓާއާ ދުރުގައި ނުހުރެވޭނެ ކަމަށް އެއްބަޔަކު ވަނީ ބުނެފައެވެ.
