ބޮލީވުޑްގެ ބަތަލާ ކެޓްރީނާ ކައިފް އާއި އެކުގައި ޑައިރެކްޓަރ އަލީ އައްބާސް ޒަަފަރު ގެނެސްދޭ ފިލްމު "ސުޕަ ސޯލްޖާ" ނެޓްފްލިކްސް އިން ދައްކާ ގޮތަށް ހަމަޖައްސައިފިއެވެ.
މި ފިލްމް އަކީ 2020 އަހަރުގައި އިއުލާން ކުރި ފިލްމެކެވެ. ފިލްްމްގައި ކެޓްރީނާ ފެނިގެންދާނީ ސުޕަ ހީރޯއެއްގެ ގޮތުގައެވެ.
ނަމަވެސް ފިލްމު ނުފެށި ދިގުލައިގެން ދިއައީ ކޯވިޑްގެ ބަލިމަޑުކަމުގެ ސަބަބުންނެވެ. މި ފިލްމުގެ ލީޑުން ކެޓްރީނާ ފެނިގެންދާއިރު ފިލްމުގެ އިތުރު ކާސްޓް އަދި އިއުލާން ކޮށްފައެއެއް ނުވެއެވެ.
އަލީ މީގެކުރިން ދިން އިންޓަވިއުއެއްގައި ބުނެފައި ވަނީ ފިލްމު ޔަޤީނުންވެސް އުފައްދާނެ ކަމަށާއި ފިލްމުން ފެނިގެންދާނީ ކެޓްރީނާ ކަމަށެވެ.
ކެޓްރީނާ އާއި އެކުގައި އަލީ މި ފިލްމުގެ މަސައްކަތް ފަށާނީ ކެޓްރީނާ ކުރިއަށް ހުރި ފިލްމުތަކުގެ މަސައްކަތް ނިމުމުންނެވެ. ބެލެވޭ ގޮތުގައި އަންނަ އަހަރު ފިލްމުގެ މަސައްކަތް ފަށާނެއެވެ.
ކެޓްރީނާގެ ކުރިއަށްހުރި ފިލްމުތަކުގެ ތެރެއިން އެންމެ އަވަހަށް ފެންނާނީ އަންނަ ނޮވެމްބަރު މަހު ރިލީޒްކުރަން ހަމަޖެހިފައިވާ ބިރުވެރި ކޮމެޑީ ފިލްމު "ފޯން ބޫތު" އެވެ. މި ފިލްމުގައި ކެޓްރީނާއާއިއެކު ސިދާންތު ޗަތުރުވެދީ އަދި އިޝަން ޚައްޓަރުވެސް ފެންނިގެންދާނެއެވެ. މިއީ މިތިންތަރިން އެކުގައި ސްކްރީނުން ފެނިގެންދާ ފުރަތަމަ ފަހަރެވެ.
