ފާއަކަށް އަރަގަނެވޭ މީހާ ފަޞީހަތް ކުރުމަކީ އިސްލާމް ދީނުގައި ހުއްދަ ކަމެއް ނޫންކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.

"ތިމާގެ އަޚާ ފަޞީޙަތް ކުރުމުން ދުރުހެލިވުން" މި މައުޞޫއަށް ޚާއްސަ ކުރެވުނު މިއަދުގެ ހުކުރު ޚުތުބާގައި ވިދާޅުވެފައިވާ ގޮތުގައި اللهގެ އަޅުތަކުން ފަޞީހަތް ނުކޮށް، އެމީހުންގެ ނުބައި އަމަލުތައް ވަންހަނާ ކޮށްދޭ މީހަކީ الله ދެކެ ބިރުގަންނަ، އާޚިރަތް ދުވަހުގެ ރައްކައުތެރިކަމަށް އެދޭ މީހެކެވެ.

މިގޮތުން މީސްމީޑިއާގެ ވަސީލަތްތައް ބޭނުން ކޮށްގެން ޚަބަރުތަކާއި، ފޮޓޯތަކާއި، ވީޑިއޯތައް ފަތުރަން ފަސޭހަ މިފަދަ ޒަމާނެއްގައި މުސްލިމުން މިކަމަށް ވަރަށް ބޮޑަށް ސަމާލުކަން ދޭން ޖެހޭނެކަމުގައި ހުކުރު ޚުތުބާގައި ވިދާޅުވެފައި ވެއެވެ.

އަތުގައި އޮންނަ މޯބައިލް ފޯނުގެ ޒަރީއާއިން، މީހުންނަށް ނޭނގޭ ގޮތަށް، ތަންތަނާއި، މަންޒަރުތަކާއި އަޑުތައް ރެކޯޑުކޮށް، އެ ސިއްރުތައް އާންމު ކޮށްލާހިނދު، އެފަދަ ކަންކަން ކުރާ ކޮންމެ މީހަކުވެސް، ދީނުގައި އައިސްފައިވާ ވަޢީދުތަކާމެދު ވިސްނައިލަން ޖެހޭނެއެވެ.

ޚުތުބާގައި ވިދާޅުވެފައި ވެއެވެ.

ޚުތުބާގައި ބަޔާން ކޮށްފައިވާ ގޮތުގައި ފާފަތައް ފޮރުވާ ވަންހަނާ ކުރަންޖެހެނީ އޭގެ ސަބަބުން މީސްތަކުންގެ ސިއްރުތައް ހާމަވެ ފަޞީހަތް ވެގެންދާނެތީއެވެ. އަދި އެއީ އިޚްލާސްތެރިކަމާއެކު ތައުބާވުމުން އެކަން މާތްاللهގެ އިރާދަފުޅުން، ހެޔޮ ކަންކަމަށް ބަދަލުކުރައްވާނެތީ ކަމުގައިވެސް ބަޔާން ކޮށްފައި ވެއެވެ.

ޚުޡުބާގައި އިތުރަށް ވިދާޅުވެފައިވާ ގޮތުގައި ފާފަތައް ފޮރުވާ ވަންހަނާ ކުރުމުގެ މާނައަކީ އެއްވެސް ހާލެއްގައި ފާހިޝް ކަންތަކާއި މުންކަރާތްތަކަށް އަރައިގަތުމަށް ހިތްވަރު ދިނުމެއް ނޫނެވެ. އަދި އެއީ މުންކަރާތްތަކާއި ދެކޮޅު ހެދުން ދޫކޮށްލުމެއްވެސް ނޫނެވެ. އެކުށަކަށް ކަނޑައެޅިފައިވާ އަދަބު ނުދިނުމެއްވެސް ނޫނެވެ. އަދި އެއީ މުންކަރާތް ހުއްޓުވޭފަދަ ފަރާތެއް މެދުވެރިކޮށް އެކަން ހުއްޓުވުމަށް މަސައްކަތް ނުކޮށް ދޫކޮށްލުމެއްވެސް ނުމެނޫންމެއެވެ.

ޚުޡުބާގައި ވިދާޅުވެފައިވާގޮތުގައި މުންކަރާތްތަކަށް އަރައިގަނެވިއްޖެނަމަ އޮތީ އޭނާއަށް ނަސޭޙަތް ދިނުމެވެ. އޭނާގެ އަތުގައި ހިފާ، ފާފަތަކުން އެއްކިބާވެ ހެޔޮމަގަށް ރުޖޫޢަވުމަށް ބާރުއަޅާ ހިތްވަރު ދިނުމެވެ.

ހަމައެއާއެކު ފާޅުކަން ބޮޑު ގޮތެއްގައި، ވަކީން ޚާއްސަކޮށް ހައްދު ކަނޑައެޅިފައިބާ ފާފަތަކަށް އަރައިގަންނަ ފަރާތްތަކުގެ މައްސަލަތައް ޝަރީއަތަށް ހުށަހެޅި ކުށް ސާބިތުވެއްޖެ ނަމަ. ޝަރުޢީ ގޮތުން ކަނޑައެޅިފައިވާ ހައްގު އަދަބު އެފަދަ މީހަކަށް ދޭން ޖެހޭނެކަމަށްވެސް ޚުތުބާގައި ވިދާޅުވެފައި ވެއެވެ.