އަމީނީމަގުގެ މަގު ހެދުމަށްޓަކައި، އެމަގުގައި ހުރި ގަސްތައް ކަނޑަމުންދާ މައްސަލާގައި އެމަސައްކަތް ކުރާ ކުންފުންޏާއި ސަރުކާރުން ދެވަނަ ވިސްނުމަކަށް ނުގޮސްފިނަމަ މިމައްސަލާގައި ޝަރީއަތަށް ދާންޖެހިދާނެ ކަމުގެ އިންޒާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވައިފިއެވެ.
އަމީނީމަގުގެ މަސައްކަތް ނިމޭއިރު، އެމަގުން ނަގާ ގަސްތަކުގެ ބަދަލުގައި، ގަސް އިންދެން ހުރި ތަންތަނުގައި ގަސް އިންދާ، މަގު ފެހިކުރާނެކަމަށް މިމަސައްކަތް ހަވާލުވެފައިވާ ރޯޑް ޑިވެލޮޕްމަންޓް ކޯޕަރޭޝަން، އާރް.ޑީ.ސީން ވަނީ ބުނެފައެވެ. ނަމަވެސް މިހާރުވެސް އަމީނީ މަގުގެ ގިނަ އަދަދެއްގެ ގަސް ކަނޑަމުންދާތީ އެކަމުގެ ކަންބޮޑުވުން ގިނަ ބަޔަކު ދަނީ ފާޅު ކުރަމުންނެވެ.
އަމީނީ މަގުގެ ގަސްތައް ކަނޑާ މައްސަލާގައި މިއަދު މަޖިލީހުގެ ޖަލްސާގައި ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ގަސްތައް ކަޑާ މައްސަލައަކީ ބޮޑުވެފައިވާ މައްސަލައެއްކަމަށެވެ. މާލޭގައި ދިރިއުޅޭ އެތައް ބަޔަކު މިކަމުގެ ކަންބޮޑުވުން ފާޅު ކުރަމުންދާއިރު ސަރުކާރާއި މިމަސައްކަތް ކުރާ ކުނުފުނިންވެސް ދެވަނަ ވިސްނުމަކަށް މިކަމުގައި ދާންޖެހޭކަމަށް ނަޝީދު ވިދާޅުވިއެވެ. އެހެން ނޫންނަމަ މިމައްސަލާގައި ކޯޓަށް ދާނެކަމަށް ނަޝީދު ވަނީ ވިދާޅުވެފައެވެ.
އަޅުގަނޑު މީގެ ކުރީ ދުވަހެއްގައި އަމީނީ މަގުގައި ގަސްތައް ނަގަމުންދާ ވާހަކަ ދެންނެވިން. އަޅުގަނޑު ހިތުން އެކަންބޮޑުވުމަކީ މާލޭގައި ދިރިއުޅޭ ވަރަށް ގިނަ ރައްޔިތުންގެ ކަންބޮޑުވުމެއް. އަޅުގަނޑު އުންމީދު ކުރަން އެކުންފުނިންނާއި ސަރުކާރުގެ ޕްލޭނިން މިނިސްޓްރީން މިކަމާއި އިތުރު ވިސްނުމަކަށް ވަޑައިގަންނަވާނެކަމަށް. އެހެން ނޫންނަމަ އަމިއްލަ ފަރުދެއްގެ ހައިސިއްޔަތުން ޝަރީއަތަށް ދިއުން ނޫންގޮތެއް މިކަމުގައި ހަގީގަތުގައި ނެތް.
– މަޖިލިސް ރައީސް މުހައްމަދު ނަޝީދު ވިދާޅުވިއެވެ.
އާރް.ޑީ.ސީން ވިދާޅުވީ، އަމީނީމަގުގައި ހުރި ގަސްތައް ބަހައްޓައިގެން އެމަގުގެ މުޅި ނެޓްވޯކް އަޕްގްރޭޑްކުރުމަކީ ވަރަށް ބޮޑު ގޮންޖެހުމެއްކަމަށެވެ. އަދި މިހާރުވެސް އެމަގުގައި ވަޅުލާފައިވާ ހޮޅިތަކާ އެހެނިހެން ކޭބަލްތަކަށް ގަސްތަކުގެ މުލުގެ އަސަރު ވަރަށް ބޮޑަށް ކޮށްފައިވާކަން އެކުންފުނިން ފާހަގަކުރެއެވެ. އެހެންކަމުން އަމީނީމަގުގައި ހުރި ގަސްތައް ކެނޑުމުގެ ބަދަލުގައި، އެގަސްތައް ނެގުމަށްފަހު މިހާރު ތަރައްޤީކުރަމުން އަންނަ ކުޑަގިރި ޕިކްނިކް އައިލެންޑަށް ބަދަލުކުރެވޭނެކަމަށް އާރް.ޑީ.ސީން ވިދާޅުވެއެވެ.
އަމީނީ މަގަކީ މާލޭގެ އެންމެ ގިނަ އަދަދަކަށް ގަސް އިންދާފައި ހުރި މަގެވެ. އެމަގުގައި ހުރި ގިނަ ގަސްތަކެއް މިހާރުވަނީ ނަގާފައެވެ. ގަސްތައް ނަގުމަށްފަހު ގަސް އިންދާނެކަމަށް އާރުޑީސީން ވިދާޅުވި ނަމަވެސް މިއީ ކުރަން ފަސޭހަކަމަކަށް ނުވާނެކަމަށް ގިނަ ބަޔަކު ދަނީ ބުނަމުންނެވެ. އަދި މިއީ އެއްވެސް ޕްލޭނެއްނެތި ކުރަމުންދާ މަސައްކަތެއްކަމަށް ގިނަ ބަޔަކު ދަނީ ބުނަމުންނެވެ.
މާލޭގެ ހުރިހާ އަވަށްތަކެއް ގުޅުވައިދޭ މައި އެއް މަގުކަމަށްވާ އަމީނީމަގު ތަރައްޤީކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ޖުމްލަ 13 ސެގްމަންޓަކަށް ބަހާލައިގެންނެވެ. އެގޮތުން ފުރަތަމަ ސެގްމަންޓުގެ މަސައްކަތް އާރް.ޑީ.ސީން މިހާރު އަންނަނީ ކުރަމުންނެވެ. މި ސެގްމަންޓުގެ މަސައްކަތް ކުރިއަށްގެންދިއުމަށްޓަކާ ހޭންވާރު ސަރަޙައްދުން ބޮޑުތަކުރުފާނުމަގާއި އަމީނީމަގު ގުޅޭ ހިސާބުން ފެށިގެން އިރުދޭމާ ހިނގުމާއި ހަމައަށް ވަނީ ބަންދުކޮށްފައެވެ.
