ޖުމްހޫރީ ޕާޓީގެ ޓިކެޓްގައި މަޖިލީހުގެ ގޮޑިތަކަށް އިންތިޚާބު ވުމަށްފަހު، ޕާޓީ ބަދަލުކޮށް އިންތިޚާބުވީ ޖޭޕީގެ ތާއީދުން ނޫންކަމަށް ދައްކަން އުޅުއްވާ ބޭފުޅުން، ކެރިވަޑައިގަންނަވާނަމަ، އިސްތިއުފާ ދެއްވުމަށްފަހު އަލުން އެދާއިރާތަކަށް ކުރިމަތިލުމަށް ޖުމްހޫރީ ޕާޓީން ގޮވާލައިފިއެވެ.
ރޭ އެމްއެންޕީން އެޕާޓީގެ ފުރަތަމަ ޤައުމީ ޖަލްސާ ފެށުމުގެ ގޮތުން ބޭއްވި ޖަލްސާގައި ނާޒިމްވަނީ ނުސީފާކޮށް ޖުމްހޫރީ ޕާޓީއަށް ބަހުގެ ހަމަލާތަކެއް ދެއްވާފައެވެ. ނާޒިމް ވިދާޅުވީ ރާއްޖޭގެ ހަމަޖެހުން ގާއިމްކޮށް ތަރައްޤީ ގެނެވޭނީ އަމިއްލަ މަސްލަހަތު އެއްފަރާތްތަކޮށްގެން ކަމަށެވެ. ޤައުމުގެ މަސްލަހަތު އިސްނުކުރެވޭ ކަމުގައިވާނަމަ އެއްވެސް ޕާޓީއެއްގެ ބޭނުމެއް ނުކުރެވޭނެކަމަށް ނާޒިމް ވިދާޅުވިއެވެ.
އަދި ކުދި ޕާޓީތަކުންވެސް ބޮޑެތި ޕާޓީތަކުންވެސް މަސައްކަތް ކުރަނީ ވަކި ފަރުދުންގެ މަސްލަހަތު ހިމާޔަތްކުރަންކަމަށް ނާޒިމް ވިދާޅުވިއެވެ.
ނާޒިމްގެ ވާހަކަތަކާއި ގުޅިގެން ޖުމްހޫރީ ޕާޓީގެ ތަރުޖަމާން އަލީ ޞާލިހު ވިދާޅުވީ ޖުމްހޫރީ ޕާޓީގައި ޤާއިމް އިބްރާހިމްގެ ސްޓްރެންތު ހުރިކަން އަދިވެސް ދައްކާނެކަމަށެވެ. ޖުމްހޫރީ ޕާޓީގެ ޓިކެޓްގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ތާއީދާއިއެކު ދާއިރާތަކަށް އިންތިޚާބު ވުމަށްފަހު މިހާރު އެއީ ތިމަންނާމެން އަމިއްލަ މަސައްކަތުން އިންތިޚާބުވީ ގޮޑިތަކަށް ހެދުމަށް މަސައްކަތް ކުރި ނަމަވެސް އެކަން ނުވާނެކަމަށް އަލީ ޞާލިހު ވިދާޅުވިއެވެ.
އޭނާ ވަނީ ތާއީދު އޮތްކަމުގައިވާނަމަ ޖޭޕީގެ ޓިކެޓްގައި ވާދަކޮށްގެން އިންތިޚާބުވި ބޭފުޅުން ގޮޑިތަކުން އިސްތިއުފާ ދެއްވައި، އަލުން އިންތިޚާބުގައި ވާދަކުރުމަށް ގޮވާލާފައެވެ.
ޖުމްހޫރީ ޕާޓީން ނިކުންނަވާ، ބުރަކަށި މަތީ ހިންގަވާ، ޖުމްހޫރީ ޕާޓީގެ ނަމުގައި ގޮޑިއެއް ލިބުނީމާ ޖޭޕީއިން ވަކިވެ، ޖޭޕީ އިން ނޫންކަމަށް ތިމާހޮވުނީ ވިދާޅުވާ ބޭފުޅުން ނިކަން ކެރިވަޑައިގަންނަވަންޏާ އިސްތިއުފާދީ އަލުން އެދާއިރާތަކަށް ވާދަކުރައްވާ. ޖޭޕީއިން ޤާސިމްގެ ސްޓްރެންތު އަދިވެސް ދައްކާނަން. ޖޭޕީގެ ތަރުޖަމާން ވިދާޅުވިއެވެ.
ޖުމްހޫރީ ޕާޓީގެ އިސްސަފުގައި ހަރަކާތްތެރިވުމަށްފަހު ނާޒިމްއާއި، ރިޔާޒު އެޕާޓީން ވަކިވެ ވަނީ އެމްއެންޕީ އުފައްދަވާފައެވެ. ނާޒިމްއާއި، ރިޔާޒަކީ ޤާސިމްއާއި ވަރަށް އަރިސް އަދި ޖޭޕީގެ އެންމެ އިސް މަޤާމުތަކުގައި ތިއްބެވި ދެބޭފުޅުންނެވެ. މިދެބޭފުޅުން މަޖިލީހަށް އިންތިޚާބު ވެފައިވަނީ ޖުމްހޫރީ ޕާޓީގެ ޓިކެޓްގައި ޤާސިމްގެ ބޮޑު ތާއީދަކާއިވެސް އެކުގައެވެ.
