އިރާނުގެ ރައީސް އިބުރާހިމް ރައީސީއާއެކު ބޭއްވުމަށް ހަމަޖެހިފައި އޮތް އިންޓަރވިއު ހިގަމުންދާ ވަގުތު ބުރުގާ އަޅުއްވައިގެން އިންނެވުމަށް ސީއެންއެންގެ މަޝްހޫރު ޕްރެސެންޓަރ ކުރިސްޓިއާން އަމަންޕޫރު ދެކޮޅު ހެއްދެމާއި ގުޅިގެން އިންޓަވިއު ކެންސަލް ކުރައްވައިފިކަމަށް، އޭނާ ވިދާޅުވެއްޖެއެވެ.
ރައީސީގެ އިންޓަރވިއު ކެންސަލް ކުރެއްވުމާއެކު އަމަންޕޫރު ކުރެއްވި ޓުވީޓެއްގައި ވިދާޅުވީ ރޭގެ ވަގުތަކަށް ޝެޑިއުލް ކޮށްފައި އޮތް މި އިންޓަވިއު ވެގެން ދިޔައީހީ އެމެރިކާގެ ފަސްގަޑުގައި، މިހާރު ޔޫއެން ޖެނެރަލް އެސެމްބްލީގެ ބައްދަލުވުމަށް ވަޑައިގެން ހުންނެވި ރައީސީ ދިނުމަށް ހަމަޖެހިފައި އޮތް ފުރަތަމަ އިންޓަވިއު ކަމަށާއި، މި އިންޓަވިއުއަށް ތައްޔާރު ވަމުންދާތާ އެތައް ހަފްތާއެއް ވެގެން ގޮސްފައިވާ ކަމުގައެވެ. އަދި ރައީސީގެ ވާހަކަފުޅުތައް ތަރުޖަމާ ކުރުމަށް ބޭނުންވާ ސާމާނުތައް ތައްޔާރު ކުރުމަށާއި، ލައިޓިންގ އާއި ކެމެރާތައް ސެޓް ކުރުމަށް 8 ގަޑިއިރު ހޭދަ ކޮށްފައި ވާކަމަށެވެ.
އަދި އިންޓަރވިއުއަށް ތައްޔާރު ވެގެން ތިބޭތާ އެތައް އިރެއް ވެގެން ދިޔައިރުވެސް ރައީސީގެ ޚަބަރެއް ނުވެފައި ވަނިކޮށް، އިންޓަރވިއު ފެށުމަށް ހަމަޖެހިފައި އޮތް ވަގުތަށްވުރެ 40 މިނިޓްއިރު ފާއިތުވެގެން ދިޔަފަހުން ވަޑައިގެންނެވީ އިރާނުގެ ރައީސްގެ އެހީތެރިއެއް ކަމަށެވެ.
އޭނާ ވަޑައިގެން ވިދާޅުވީ އަހަރެން ބުރުގާ އަޅަން ރައީސީ އެދިވަޑައިގަންނަވާ ކަމަށް. ސަބަބެއް ކަމުގައި ވިދާޅުވީ މިއީ މާތްވެގެންވާ މުހައްރަމް އަދި ސަފަރުމަސް ކަމަށް ވާތީ ކަމަށް. އަހަރެން ވަރަށް އަދަބުވެރިކަމާއެކު ދެންނެވިން، އަހަރެމެން މިތިބީ ނިއުޔޯކުގައި ކަމަށާއި، ބުރުގާ އެޅުން ލާޒިމްކުރާ ގާނޫނެއްވެސް އަދި އެފަދަ ސަގާފަތެއްވެސް މިތަނުގައި ނެތްކަމަށް. އަދި އިރާނުގެ ކުރީގެ އެއްވެސް ރައީސަކުން، އިރާނުން ބޭރުގައި އަހަރެން ކުރި އެއްވެސް އިންޓަވިއުއެއްގައި ބުރުގާ އަޅާކަށް ނާންގާކަމަށް.
އަމަންޕޫރު ކުރެއްވި ޓުވީޓުގައި ވިދާޅުވެފައި ވެއެވެ.
Protests are sweeping Iran & women are burning their hijabs after the death last week of Mahsa Amini, following her arrest by the “morality police”. Human rights groups say at least 8 have been killed. Last night, I planned to ask President Raisi about all this and much more. 1/7
— Christiane Amanpour (@amanpour) September 22, 2022
އަމަންޕޫރުގެ ޓުވީޓުގައި އޭނާ އިތުރަށް ވިދާޅުވީ، ބުރުގާ ނާޅުއްވާނެކަމަށް އޭނާ ދެއްނެވުމުން، ބުރުގާ ނާޅުއްވާ އިންޓަވިއު ކުރިޔަށް ނުގެންދެވޭނެކަމަށް، ރައިސީގެ ފަރާތުން ވަޑައިގެންނެވި ބޭފުޅާ ވިދާޅުވި ކަމަށެވެ. އަމަންޕޫރު ވިދާޅުވީ، ބުރުގާ އެޅުމަށް ރައީސީ އެދިވަޑައިގަންނަވަނީ، "އިހުތިރާމް އަދާކުރުމަށް ކުރާ ކަމެއްގެ ގޮތުގައި" ކަމަށް ރައީސީގެ ފަރާތުން ވަޑައިގެންނެވި ބޭފުޅާ ވިދާޅުވި ކަމަށާއި އަދި އިރާނުގައި މިހާރު ކުރިޔަށްދާ މުޒާހިރާތަކަށްވެސް އޭނާ އިޝާރާތް ކުރެއްވި ކަމަށެވެ.
އަހަރެން ދެންނެވިން، އެހެންވިޔަސް، ކުއްލިއަކަށް ކުރިމަތިވީ މި ޝަރުތައް އެއްބަސް ނުވެވޭނެކަމަށް. އެހާތަނުން އަހަރެމެން އެނބުރި އައީ. އިންޓަރވިއު ނުބޭއްވުނު.
އަމަންޕޫރުގެ ޓުވީޓުގައި އޭނާ ވިދާޅުވެފައި ވެއެވެ.
އަމަންޕޫރު ވިދާޅުވި ގޮތުގައި، އިރާނުގެ ފުލުހުންގެ ހައްޔަރުގައި ހުރި އަންހެން ކުއްޖަކު މަރުވުމާއި ގުޅިގެން އެގައުމުގައި މިހާރު ކުރިޔަށްދާ، އެތައް ބަޔަކު މަރުވަމުންދާ މުޒާހިރާތަކާއި ގުޅިގެން މިއިންޓަރވިއުގައި ސުވާލުކުރުމަށް އޭނާ ބޭނުންވި ކަމަށާއި، ގެއްލިގެން މިދިޔައީ އިރާނުގެ ރައީސް އިބުރާހިމް ރައީސީއާއި ވާހަކަ ދައްކާލުމަށް ލިބިގެންދިޔަ މުހިންމު ފުރުސަތެއް ކަމުގައެވެ.
އިރާނުގައި މިހާރު ކުރިޔަށްދާ މުޒާހިރާތަކަކީ، ހެދުން އަޅައިގެން ހުރި ގޮތް ގޯސްވެގެން އިރާނުގެ ފުލުހުން (މޯރަލިޓީ ޕޮލިސް އިން) ހައްޔަރު ކުރި، އުމުރުން 22 އަހަރުގެ މަހުސާ އާމިނި ފުލުހުންގެ ހައްޔަރުގައި ހުއްޓާ މަރުވުމާއި ގުޅިގެން އެގައުމުގައި ކުރިޔަށްދާ މުޒާހިރާ ތަކެކެވެ. މި މުޒާހިރާތަކުގައި އިރާނުގެ އަންހެނުން ދަނީ އެއްވުންތަކުގައި، އެމީހުން އަޅާއިގެންތިބި ބުރުގާތައް އަންދަމުންނެވެ.
ކޮމެންޓު ފޮނުވާ