އެއް ޖިންސުން ގުޅުން ހިންގިިކަމުގެ ކުށް ސާބިތުވި ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރުގެ މައްޗަށް އިތުރު 40 ދައުވާއެއް އުފުލައިފިއެވެ.
ޕީޖީ އޮފީހުން ބުނެފައިވަނީ އެމްޑީ އަލަމްގިރްގެ މައްޗަށް، ދިވެހިރާއްޖޭގެ ޤާނޫނުލްޢުޤޫބާތުގެ 622 ވަނަ މާއްދާގެ (ހ) ގެ 7 ވަނަ ނަންބަރާ ޙަވާލާދީ، އެމާއްދާގެ (ބ) ގެ 2 ވަނަ ނަންބަރުގެ ދަށުން، އޮރިޔާން ކާޑު ހެދުމުގެ ކުށުގެ 40 (ސާޅީސް) ދަޢުވާ އިއްޔެ ކްރިމިނަލް ކޯޓަށް ހުށަހަޅައިފައިވާކަމަށެވެ.
އަލްމްގިރި މިހާރު ދަނީ 7 މަހާއި 6 ދުވަހަށް ޖަލު ހުކުމެއް ތަންފީޒު ކުރަމުންނެވެ. އޭނާއަށް ކުށްސާބިތުވި ފަހަރު ކޮށްފައިވަނީ ތިން ދައުވާއެކެވެ. އެ ހުރިހާ ދައުވާއަކަށްވެސް އޭނާ ވަނީ އިޢުތިރާފްވެފައެވެ. އަވަސްނިޔާގެ މައްސަލައެއްގެ ގޮތުގައި ކުރިއަށްގެންދިޔަ މި މައްސަލާގައި އޭނާގެ މައްޗަށް ހަތް މަސްދުވަހަށް ޖަލަށް ލުމަށް ޙުކުމްކުރިއިރު، ޝަރީއަތުން ވަނީ އޭނާއަށް ތައުބާ ލައިދީފައެވެ.
އެއް ޖިންސުން ގުޅުން ހިންގިކަމަށް ތުހުމަތުކުރެވޭ މައްސަލާގައި އަލަމްގިރުގެ އިތުރުން 3 ދިވެއްސެއްގެ މައްޗަށްވެސް ދައުވާކުރެއެވެ. އެއީ ޤާނޫނީ ވަކީލް ނާޒިމް ސައްޠާރާއި، ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދާއި، ފުލުހެއްކަމަށްވާ ޢަބްދުއްރަހުމާން ރަފީޢުއެވެ. އެމީހުންގެ މައްޗަށްވެސް ދައުވާ އުފުލާފައިވަނީ ގާނޫނޫލްއުގޫބާތުގެ ދަށުންނެވެ. މި ޝަރީއަތްތައް ކުރިއަށް ގެންދާނީ, ޖިންސީ ކުށާއި ގުޅޭ މައްސަލައަކަށްވާތީ ސިއްރުކޮށްގެންނެވެ.
މީގެ ތެރެއިން ނާޒިމް ސައްތާރަށް ކޮށްފައިވަނީ 4 މަހުގެ ގޭބަންދު ހުކުމެވެ. ގާނޫނުލްއުގޫބާތުގެ ދަށުން ދައުވާ އުފުލުމުން މިމައްސަލައިގައި ހިމެނޭ މީހުންނަށް އެންމެ ބޮޑު އަދަބަކަށްވެސް އަންނާނީ ނުވަ މަހާއި 18 ދުވަހުގެ ޖަލު ޙުކުމެކެވެ.
