ރާއްޖޭގެ މަޝްހޫރު އެކްޓަރެސް މަރިޔަމް އައްޒަ ހޯސްޓްކުރާ ޝޯ "އަޒޯނާ" ގެ ހަތަރު ވަނަ ސީޒަން ގެނެސްދޭން ތައްޔާރުވެއްޖެ އެވެ.
އަންނަ ބުރާސްފަތި ދުވަހު ދިރާގުޓީވީގެ ވީޑިއޯ އޮން ޑިމާންޑް (ވީއޯޑީ) ޕްލެޓްފޯމްގައި ޕްރީމިއާކުރަން ހަމަޖެހިފައި ވަނީ ދިރާގު ޓީވީންނެވެ. "އަޒޯނާ" ސީޒަން ހަތަރެކީ އައްޒަގެ ފިރިމީހާ އަދި އެކްޓަރު އަބްދުﷲ މުއާޒް (މުއާ) ގެ ސްޓޫޑިއޯ، އަބްދުﷲ މުއާޒް ޕްރޮޑަކްޝަނާއި ދިރާގު ގުޅިގެން ގެނެސްދޭ އެއްޗެކެވެ.
އާ ސީޒަންގެ ޕްރޮމޯއެއް ވެސް މިހާރު އާންމުކޮށްފައިވާ އިރު، މުއާޒު ބުނީ މި ފަހަރުގެ ސީޒަން ކުރީގެ ސީޒަންތަކާ ތަފާތުވާނެ ކަމަށެވެ. އަދި ކުރިއަށް ވުރެ ރަނގަޅު ކޮންޓެންޓް ބެލުންތެރިންނަށް ގެނެސްދިނުމަށް ގިނަ މަސައްކަތްތަކެއް ކޮށްފައި ވާކަން ވެސް އޭނާ ފާހަގަކުރި އެވެ.
މަޝްހޫރު ޔާރާ އާއިލާ އަށް ނިސްބަތްވާ އައްޒަ އަކީ ކާމިޔާބު އެތައް ފިލްމެއް ކުޅެފައިވާ ބަތަލާއެކެވެ.
