ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ގދ.ތިނަދޫއަށް ވެވަޑައިގެންފައިވާ ވައުދުތައް ކުރިއަށް ނުދާކަމަށް ތިނަދޫ ދެކުނު ދާއިރާގެ މެމްބަރު ސަނީފް ވިދާޅުވެއްޖެއެވެ.

ސަނީފް މިހެން ވިދާޅުވީ މިއަދު މަޖިލީހުގެ ތަޅުމުގައި ފިނޭންސް މިނިސްޓަރ އިބްރާހިމް އަމީރާއި ކުރެއްވި ސުވާލުގައެވެ. ސުވާލުގައި ސަނީފް ވަނީ ރައީސް ޞާލިހު ރިޔާސީ އިންތިޚާބުގެ ދުވަސްވަރު ތިނަދޫއަށް ވަޑައިގެން ވެވަޑައިގެންނެވި ވައުދުތައް ތަންފީޒު ވެގެން ނުދާނީ ކަންބޮޑުކަމާއިއެކު އެކަން ފާހަގަކޮށްފައެވެ.

ދައުލަތުގެ މާލީ ވަޒީރަކީ ރައީސް ޞާލިހުގެ ވައުދުތައް ތަންފީޒު ކުރަން ހުރި އެންމެ މުހިންމު ފަރާތަށްވާއިރު، ވައުދުތައް ފުއްދުމުގައި އެކަށީގެންވާ މަސައްކަތް ނުކުރާ ސަބަބަކީ ކޮބައިތޯ ސަނީފްވަނީ ސުވާލު ކުރައްވާފައެވެ. އަދި ރައީސް ރިޔާސީ އިންތިޚާބުގެ ކެމްޕެއިން ދުވަސްވަރު ވެފައިވާ ވައުދުތައް ތަންފީޒު ކުރުމުގެ ބަދަލުގައި މުޅިން އާ ކަންތައްތަކެއް ފަށައިގެން ކުރިއަށް ގެންދަނީ ކޮން ސަބަބާއި ހެދިތޯވެސް ސަނީފް ވަނީ ސުވާލު ކުރައްވާފައެވެ.

މިސުވާލަށް ސީދާ ޖަވާބު ދެއްވުމުގެ ބަދަލުގައި މިނިސްޓަރ އަމީރު ވިދާޅުވީ ސަރުކާރުން ހިންގާ މަޝްރޫޢުތައް ޓެންޑާ މަރުހަލާގައާއި އެނޫން މަރުހަލާތަކުގައި ފެންނަން ހުންނާނެކަމަށެވެ. ތިނަދޫއަށް ރައީސް ވެވަޑައިގެންނެވި ވައުދުތައް ތަންފީޒު ކުރަމުންދާ މިންވަރާއި ގުޅޭގޮތުން ވަޒީރު އެއްވެސް ޖަވާބެއް ދެއްވާފައި ނުވެއެވެ.

މީގެ ކުރިންވެސް ސަނީފް ވަނީ ތިނަދޫއަށް މިސަރުކާރުން ކޮށްދެއްވާނެކަމަށް ވެފައިވާ ވައުދުތައް ފުއްދެެމުން ނުދާތީ އެކަމުގެ ކަންބޮޑުވުން ފާޅުކޮށްފައެވެ.