ދައުރު ނިމިގެންދާއިރުވެސް ހަރުކަށި ފިކުރާއި ދެކޮޅަށް މަސައްކަތްކުރެވޭ ތަނެއް ނުފެންނަ ކަމުގައި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
ރާއްޖޭގައި ހަރުކަށި ފިކުރާއި އަނިޔާވެރި އަމަލުތައް އިތުރުވަމުންދަތީ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ހުށަހަޅުއްވާފައިވާ މައްސަލާގައި ވާހަކަ ދައްކަވަމުން އިންތި ވިދާޅުވީ ރާއްޖޭގައި ހަރުކަށި ފިކުރު އޮތް މިންވަރާއި، އެކަމުގެ ނުރައްކާތެރިކަން ރައްޔިތުންގެ ކުރިމަތީގައި ފެންނަން ހުރިކަމަށެވެ. އެމްޑީޕީއަކީ މިފަދަ ކަންކަން ހުއްޓުވުމަށް އަބަދުމެ ވަކާލާތުކޮށް އެކަންކަމަށް ބާރު އަޅާ ބަޔަކަށްވާއިރު އަމިއްލަ ވެރިކަމެއް އޮވެ މިކަމަށް އެއްވެސް ފިޔަވަޅެއް ނޭޅޭކަމީ ނުހަނު ކަންބޮޑުވާ ކަމެއްކަމަށް އިންތި ވިދާޅުވިއެވެ.
އޭނާ ވިދާޅުވީ އެއްވެސް ބިރެއްނެތި މީހުން މަރާލަން ކެރޭ މީހުންނާއި، ޖަލުގައި ހަރުކަށި ފިކުރަށް ރެކްރޫޓް ކުރާކަމާއި، މަރުކޮމިޝަނުން އެކުލަވާލި ރިޕޯޓްތަކުން ފާހަގަވާ ކަންކަމަށްވެސް ފިޔަވަޅު އެޅިގެން ނުދާކަން ހިތާމައާއިއެކު ފާހަގަ ކުރާކަމަށެވެ. މީހުންނަށް ލާދީނީ އަދި ކާފަރުންކަމަށް ހަދައި ދެކެވޭ ވާހަތަކަށްވެސް ފިޔަވަޅު އެޅޭކަމީ ކަންބޮޑުވާކަމެއްކަމަށްވެސް އިންތި ވިދާޅުވިއެވެ.
ހަރުކަށި ފިކުރާއި ދެކޮޅަށް މަސައްކަތް ކުރާތަން ދައުރު ނިމިގެންދާތަންވެސް ނުފެނޭ. ވެރިކަން ކޮށްލަން ލިބޭ ފުރުސަތުތަކުގެ ބޭނުން ރަނގަޅަށް ހިފަންޖެހޭ. އެމްޑީޕީގެ ސިޔާސަތާއި، އަސާސުތައް ދޫކޮށްލައިފިނަމަ ޤައުމުގެ މުސްތަގުބަލުވެސް ގެއްލިދާނެ. ވެރިކަމުގައި މިތިބި މިފުރުސަތުގެ ބޭނުން ކުރަންޖެހޭ.
– އިންތި ވިދާޅުވިއެވެ.
އިންތި ވިދާޅުވީ ޕާޓީއަކުން ވެރިކަމަށް އައިސް ކަންކަން ރަނގަޅު ކުރުމަށް ލިބެނީ ކުޑަ ފުރުސަތެއްއް ކަމަށެވެ. އެފުރުސަތުގެ ބޭނުން ހެޔޮ ގޮތުގައި ނުކުރެވޭނަމަ ޤައުމެއްވެސް ނޯންނާނެކަމަށް އޭނާ ވިދާޅުވިއެވެ. އިންތި ވިދާޅުވީ ހަރުކަށި ފިކުރާއި ދެކޮޅަށް ސަރުކާރުން ކުރަންޖެހޭ މަސައްކަތް ނުކުރާކަމީ ހިތާމަ ކުރާކަމެއްކަމަށެވެ. ދައުރު ނިމިގެންދާއިރުވެސް އެއްވެސް މަސައްކަތެއް މިކަމަށް ނުކުރާކަމީ އިންތިހާއަށް ކަންބޮޑުވާކަމެއްކަމަށް އިންތި ވިދާޅުވިއެވެ.
