ތިލަމާލެ ބްރިޖް އެޅުމަށް ބޭނުން ކުރާ ޕްލެޓްފޯމް ފުންކުރުމުގެ މަސައްކަތް ކަނޑައަޅާފައިވާ ތާރީހަށް ނިންމައި ނުލެވުނީ ކަނޑު ގަދަ ވުމުގެ ސަބަބުން ކަމަށް އިންޑިއާގެ އެފްކޮންސް ކުންފުނިން ބުނެފިއެވެ.
ބޯހޯލް ތޮރުފައިގެން ސާވޭ އަށް ބޭނުންކުރާ އެ ޕްލެޓްފޯމް ވިލިމާލެ ފަރަށް އެރިތާ ހަފުތާއެއްވީ އިރު ވެސް އެ ނުނަގައި ހުރުމުގެ ސަބަބުން ޕްލެޓްފޯމުގެ ތަނބުތައް ވަނީ ފަރުތަކުގައި ތާށިވެ، ރަނގަޅަށް ހަރުލައްވައިލައިފައެވެ.
ޕްލެޓްފޯމް ނެގުން ލަސްވަނީ ފަރުތަކަށް ގެއްލުން ކުޑަ ގޮތަކަށް އެ މަސައްކަތް ކުރާތީ ކަމަށާއި ކުރިއަށް އޮތް ދެ ދުވަސް ތެރޭގައި ޕްލެޓްފޯމް ނަގާނެ ކަމުގެ ޔަގީން ކަން އިންޑިއާގެ ކުންފުނިން ދޭ ކަމަށް ސަރުކާރުން ވަނީ މިދިޔަ އަންގާރަ ދުވަހު ބުނެފައެވެ.
އެ ކުންފުނިން ދިން ތާރީހު ފަހަނައަޅައި ދިޔައިރުވެސް ޕްލެޓްފޯމް ފުންްކުރެވިފައި ނުވާތީ އެކަން ނުވި ސަބަބު ބަޔާންކޮށް ނެރެފައިވާ ކުރު ބަޔާނެއްގައި ބުނެފައިވަނީ ކަނޑުގަދަ ވުމުގެ ސަބަބުން ކަނޑައަޅާފައިވާ ގޮތަށް މަސައްކަތް ކުރިއަށް ނުގެންދެވުނު ކަމަށެވެ. އަދި މޫސުން ރަނގަޅުވެ ކަނޑު މަޑުވިހާ އަވަހަށް އަލުން މަސައްކަތް ފަށާނެ ކަމަށް ވަނީ ބުނެފައެވެ. އެކަމަށް ޓީމުތައް ތިބީ ތައްޔާރަށް ކަަމަށްވެސް ބުންޏެވެ.
އެފްކޮންސްގެ ބަޔާނުގައި މިފަހަރުވެސް ބުނީ ޕްްލެޓްފޯމް ފުން ކުުރުމުގެ މަސައްކަތް ކުރާނީ ވިލިމާލެ ފަރަށް އެންމެ ގެއްލުން ކުޑަވާނެ ގޮތަށް ވިސްނައިގެން ކަމަށެވެ. އެކަމުގެ ޔަގީންކަން ދޭ ކަަމަށް ވަނީ ބުނެފައެވެ. މޫސުން ރަނގަޅުވީހާ އަވަހަށް އަލުން މަސައްކަތް ފެއްޓުމަށް އެ ކުންފުނީގެ ޓީމުތައް ތައްޔާރަށް ތިބި ކަމަށް ވެސް އެފްކޯންސް އިން ބުނެއެވެ.
ޕްލެޓްފޯމް ފަރަށް އެރުމާ ގުޅިގެން އެ މައްސަލަ ހައްލުކުރުމަށް ޕްލޭނިން މިނިސްޓްރީ އާއި އީޕީއޭ އަދި އެފްކޮންސް ގުޅިގެން، އެ ތަންތަނުގެ އިސްވެރިންނާ އެކު ވަނީ މަޝްވަރާ ބައްދަލުވުމެއް ބާއްވައިފައެވެ. އީޕީއޭ އިން ބުނީ ޕްލެޓްފޯމް ނެގުމުން ވިލިމާލެ ފަރަށް ލިބިފައިވާ ގެއްލުން ބެލުމަށް އެސަސްމަންޓެއް ވެސް ހަދާނެ ކަމަށެވެ.
ތިލަމާލެ ބްރިޖް އެޅުމަށް ބޭނުން ކުރާ ޕްލެޓްފޯމް ފަރަށް އެރުމާ ގުޅިގެން ޕްލެޓްފޯމް ނެގުމަށް މަސައްކަތް ނުކުރާ ކަމަށް ބުނެ ރައްޔިތުންގެ މަޖިލީހަށް އިއްޔެ ކުއްލި މައްސަލައެއް ވެސް ހުށަހެޅި އެވެ. މައްސަލަ ހުށަހެޅުއްވީ ވިލިމާލެ ދާއިރާގެ މެންބަރު އަހްމަދު އުޝާމް އެވެ.
