ބޮލީވުޑް އެކްޓަރު އަދި ޑައިރެކްޓަރު ފަރްހާން އަޚްތަރާއި އޭނާގެ ޕާޓުނަރު ރިތޭޝް ސިދުވާނީގެ ފިލްމު ކުންފުނި އެކްސެލް އެންޓަޓެއިންމަންޓުން ކޮންޓްރެކްޓް މުވައްޒަފުންތަކަކަށް މުސާރަ ނުދޭ މައްސަތަލެއް ފެންމަތިވެއްޖެއެވެ.
ކާމިޔާބު އެތައް ފިލްމެއް ގެނެސްދިން އެކްސެލް އެންޓަޓެއިންމަންޓުން، ފިލްމް ސްޓޫޑިއޯސް ސެޓިންގ އަދި އެލައިޑް މަޒްދޫރު ޔޫނިއަން ކިޔާ ބައެއް މެދުވެރިކޮށް، ގާތްގަނޑަކަށް 300-400 މުވައްޒަފުން ބޭނުންކޮށްގެން މިއަހަރުގެ މެއި މަހުން ފެށިގެން އަންނަނީ މުމްބާއީގެ އިތުރުން މުމްބާއީގެ ބޭރުގެ އެކި ތަންތަނުގައި މަސައްކަތް ކުރުވަމުންނެވެ.
އެގޮތުން މި އަހަރު ފެށުނު ފަހުން އެކްސެލްއުން މަސައްކަތް ކުރަމުން އަންނަ އެކިއެކި ޕްރޮޖެކްޓްތަކުގައި މުވައްޒަފުން މަސައްކަތްކުރަމުން އަންނަ އިރު މުވައްޒަފުންނަށް ފާއިތުވި ތިން ހަތަރު މަހުގެ މުސާރަ ނުދޭ ކަމަށް ބުނެފައިވެއެވެ. އެމީހުންނަކީ ދުވަހު މުސާރައަށް މަސައްކަތް ކުރާ މުވައްޒަފުން ތަކެއް ކަމުން އެމީހުންގެ މަސައްކަތް ނިމުމުން ކޮންމެ ދުވަހަކުވެސް މުސާރަ ދޭން ޖެހެއެވެ. ނަމަވެސް ފާއިތުވި ތިން ހަތަރު މަސް ދުވަހުގެ ތެރޭގައި މުސާރަ ދީފައި ނުވާކަމަށް އެމީހުންނާއި ހަވާލާދީ ރިޕޯޓްތައް ބުނެއެވެ.
View this post on Instagram
މީގެ އިތުރުން ލޭބަރ ޤާނޫނުގައި ބުނެފައިވާ ވަގުތަށްވުރެ އިތުރަށް މަސައްކަތް ކުރުވާ، އިތުރުގަޑީގެ ފައިސާވެސް ނުދޭކަމަށާއި އަދި މި ވާހަކަތައް ދައްކާތީ ވަޒީފާ ގެއްލި ދާނެ ކަމުގެ ބިރުވެސް އެބަ އޮތް ކަމަށް އެމީހުން ބުނެފައި ވެއެވެ.
މި ޝަކުވާތަކާ ގުޅިގެން ސްޓޫޑިއޯސް ސެޓިން އާއި އެލައިޑް މަޒުދޫރު ޔުނިއަން އިން މިހާރު ވަނީ ކަމާބެހޭ އިދާރާތަކަށްވެސް އެ މައްސަލަ ހުށަހަޅާފައެވެ.
View this post on Instagram
މި މައްސަލަ ފެންމަތިވެފައި ވާއިރު، ފަރްހާން މި ވަގުތު އަންނަނީ އަންހެނުންނާއެކު އޮސްޓްރޭލިއާގައި ޗުއްޓީ ހޭދަކުރަމުންނެވެ. ފަރްހާން ދެން އެންމެ އަވަހަށް ޑައިރެކްޓުކުރަން ހަމަޖެހިފައި ވަނީ "ޖީ ލޭ ޒަރާ" އެވެ.
