ރައްޔިތުންގެ މަޖިލީހުގެ މެންބަރުންގެ އަދަދު, 87 ގައި ހިފަހައްޓައި އެއަށްވުރެ އެ އަދަދު ގިނަ ނުވާނެ ގޮތް ހެދުމަށް ޖުމްހޫރީ ޕާޓީގެ ލީޑަރު އަދި މާމިނގިލީ ދާއިރާގެ މެންބަރު ގާސިމް އިބްރާހިމް ގާނޫނުއަސާސީއަށް ހުށަހެޅުއްވި އިސްލާހަށް އެމްޑީޕީގެ ރައީސް އަދި މަޖިލިސް ރައީސް މުހައްމަދު ނަޝީދު ތާއީދު ކުރައްވައިފިއެވެ.
ގާނޫނުއަސާސީގެ 71 ވަނަ މާއްދާގައި މިހާރު ބުނެފައިވާ ގޮތުގައި ދިވެހިރާއްޖޭގެ ކޮންމެ އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީގެ ފުރަތަމަ ފަސްހާސް މީހަކަށް ނުވަތަ ފަސްހާސް މީހުން ހަމަނުވާ ކޮންމެ އިދާރީ ދާއިރާއަކަށް ދެ މެންބަރުން ތިބެންޖެހޭނެއެވެ. އަދި, އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީ ފަސްހާހަށްވުރެ އިތުރުވާނަމަ، އާބާދީގެ ފުރަތަމަ ފަސްހާސް މީހުންނަށްވުރެ އިތުރުވާ ކޮންމެ ފަސްހާސް މީހަކަށް މެންބަރެއް ހުންނަން ޖެހޭނެއެވެ.
ގާސިމް, އިސްލާހު ހުށަހަޅުއްވާފައިވަނީ މި މާއްދާ ބަދަލުކުރުމަށެވެ. އެގޮތުން އޭނާގެ ހުށަހެޅުމަކީ, ރައްޔިތުންގެ މަޖިލީހުގެ މެންބަރުންގެ އަދަދަކީ 87 ކަމަށް އެ މާއްދާގައި ބަޔާން ކުރުމެވެ. އަދި, 87 އިންތިހާބީ ދާއިރާ ކަނޑައެޅުމަށްފަހު, އެއިން ކޮންމެ އިންތިހާބީ ދާއިރާއަކުން އެއް މެންބަރަކު އިންތިހާބު ކުރުމެވެ.
މިއިސްލާހަށް ތާއީދު ކުރައްވާ ނަޝީދު ވިދާޅުވީ މިއީ ވަރަށް މުހިންމު އިސްލާހެއްކަމަށެވެ. ރައްޔިތުންގެ މަޖިލިސް އެކުލެވިގެންވާ ގޮތާއި އަދި މަޖިލިސްގެ ދުއުރާބެހޭ ގޮތުންވެސް ވިސްނުން ވަރަށް ބޭނުން ތެރިކަމަށް މަޖިލިސް ރައީސް ވިދާޅުވިއެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމް އެ ހުށަހެޅުއްވި އިސްލާހަކީ މުހިންމު އިސްލާހެއް. މަޖިލިސް އެކުލެވިގެންވާ ގޮތާއި އަދި މަޖިލިސްގެ ދުއުރާބެހޭ ގޮތުންވެސް ވިސްނުން ވަރަށް ބޭނުންތެރި.
– ރައީސް ނަޝީދު ވިދާޅުވިއެވެ.
ގާނޫނުއަސާސީ އިސްލާހު ކުރުމުގެ ބާރު އޮތީ، 261 ވަނަ މާއްދާގައި ލިޔެފައިވާ ގޮތުން، މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައި އަޣުލަބިއްޔަތަށެވެ. އެއީ، މެންބަރުންގެ 75 ޕަސެންޓެވެ. މަޖިލީހުގެ ސުޕަމެޖޯރިޓީ އޮންނަ އެމްޑީޕީގައި އެ އަދަދަށް، 65 މެމްބަރުން އެބަތިއްބެވެ.
ފެހި ގާނޫނުއަސާސީގެ ދަށުން އެންމެ ފުރަތަމަ އިންތިހާބުކުރި ރައްޔިތުންގެ މަޖިލީހުގައި 77 މެންބަރުން ތިއްބެވެ އެވެ. އޭގެފަހުން 2014 ވަނަ ބޭއްވި އިންތިހާބުގައި 85 މެންބަރުން އިންތިހާބު ކުރަން ޖެހުނުއިރު, މިހާރު އޮތް މަޖިލީހުގައި ތިއްބަވަނީ 87 މެންބަރުންނެވެ.
އަންނަ 2024 ގައި ރައްޔިތުންގެ މަޖިލީހުގެ އިންތިހާބު އޮންނާނެއިރު, އާބާދީއަށް މިހާރު އައިސްފައިވާ ބަދަލާއެކު ރައްޔިތުންގެ މަޖިލީހުގެ މެންބަރުންގެ އަދަދު އަނެއްކާވެސް އިތުރުވާނެއެވެ.
