އެއްޖިންސުން ގުޅުން ހިންގުމަކީ އެހެންމީހަކަށް އެކަމުގެ ސަބަބުން ގެއްލުންހުރި ކަމެއް ނޫންކަމަށް އެމްޑީޕީގެ ފުރަތަމަ ރައީސް އިބްރާހީމް އިސްމާޢީލް (އިބުރާ) ވިދާޅުވުމުން، އެކަން މީޑިއާތަކުން ރިޕޯޓުކުރުމުން އޭނާގެ ނުރުހުން މީޑިއާތަކަށް އަމާޒުކޮށްފިއެވެ.

އެއްޖިންސުން ގުޅުން ހިންގިކަމުގެ ތުހުމަތުގައި ހައްޔަރުކުރި މީހުން ދޫކޮށްލިނަމަވެސް، ޔޯގާ ހަމަނުޖެހުމާއި ގުޅިގެން ހައްޔަރުކުރި މީހުން އަދިވެސް ދޫކޮށްލާފައިނިވާތީ މީހާކު އެކަމުގެ ކަންބޮޑުވުން ފާޅުކޮށް ކުރި ޓްވީޓަކާއި ގުޅިގެން އިބުރާ ވަނީ، ޒިނޭއާއި ލިވާތު ކުރުމަކީ ކުށެއްކަމަށާއި، ނަމަވެސް އެއީ އެހެން މީހަކަށް އޮތް ގެއްލުމެއް ނޫންކަމަށް ވިދާޅުވެފައެވެ. މިއާއެކު ގިނަ ބަޔަކު ވަނީ އިބުރާއަށް ފާޑުވިދާޅުވެފައެވެ.

މިއާއެކު އިބުރާ މީޑިއާއަށް ފާޑުވިދާޅުވެ ކުރެއްވި ޓްވީޓްގައި ވިދާޅުވީ ނޫސްވެރިންގެ މިނިވަންކަން މިހާރު ވެގެން މިދަނީ އެހެން މީހުންގެ މިނިވަންކަމަށް އޮތް ހުރަހަކަށްކަމަށެވެ. އެއްވެސް އެއްޗެއް ނުބުނާށޭ ނޫސްތަކުން ބުނާކަހަލަކަމަށާއި، ބުނެފިއްޔާ އޮޅުވާލައިގެން ސުރުޚީ ހަދާނަމޭ ނޫސްތަުން ބުނާކަހަލަކަމަށްވެސް އިބުރާ ވިދާޅުވިއެވެ.

އޭނާ ވަނީ މިނޫންގޮތެއް ނެތްތޯ މީޑިއާ ކައުންސިލަށް ސުވާލުކުރައްވާފައެވެ.

Noosveringe minivankan mihaaru vegen midhanee ehen meehunge minivankamah oiy hurahakah.

Noos thakun bunaakahala: evves echcheh nubunachey, bunefiyyaa olhuvaalaigen surukhee hadhaanamey.@mmc_mv minoon gotheh neiytho?

— Maverick Ibra (@ibramandhu) August 13, 2022

އިބުރާ އިއްޔެ ކުރެއްވި ޓްވީޓްތަކެއްގައި ވަނީ ޒިނޭއާއި ލިވާތު ކުރުމަކީ ކުށެއްކަމަށެވެ. އެ ކުށަކީ ދެމީހަކު ނުވަތަ އެއަށްވުރެ ގިނަ މީހުންގެ ރުހުމުގައި އެކަހެރިވެގެން ތިބެ ކުރިކަމެއްކަމަށް އިބުރާ ވިދާޅުވިއެވެ. ފުރާނައަށް ޖިސްމަށް މުދަލަށް ނުރައްކަލެއް ނެތްކަމަށާއި، އެހެން މީހެއްގެ މިނިވަންކަމަށް ހުރަހެއް ނެތްކަމަށްވެސް އިބުރާ ވިދާޅުވިއެވެ.

އެކަމުން އެހެން މީހެއްގެ ފުރާނައަށް ޖިސްމަށް މުދަލަށް ނުރައްކަލެއް ނެތްކަމަށާއި، އެހެން މީހެއްގެ މިނިވަންކަމަށް ހުރަހެއް ނެތްކަމަށްވެސް އިބުރާ ވިދާޅުވިއެވެ. އެކަމަށް ތުހުމަތުކުރެވޭ ތަހުގީގް ނިމުނީމާއި ޝަރީއަތުން ހުކުމެއް ނެތްހާ ހިނދަކު ބަންދުކޮށްފައި ނުބެހެއްޓޭނެކަމަށާއި، އެއާއި ޚިލާފަށް ޔޯގާ މައްސަލައަކީ އެހެން ބައެއްގެ މިނިވަންކަމަށް ހުރަސްއަޅައި ޖިސްމަށް އަނިޔާ ދޭނެކަަމުގެ އަމަލުތަކެއް ހިމެނޭގޮތުން އާންމު ތަނެއްގައި ހިންގާފައިވާ ޓެރަރިޒަމްގެ އަމަލެއްކަމަށް އިބުރާ ވިދާޅުވިއެވެ.