ހިޔާ މަޝްރޫއުގެ ދަށުން ސްޓެލްކޮއިން ތަރައްގީކުރި ފްލެޓްތައް މުވައްޒަފުންނާއި ހަވާލު ކޮށްފިއެވެ. ފްލެޓް ހަވާލުކުރުމަށް ފާއިތުވެދިޔަ ހަފްތާގެ ބުރާސްފަތި ދުވަހު ބޭއްވި ރައްސްމިއްޔާތުގައި މި ފްލެޓްތައް ތަރައްގީކުރި ޗައިނާގެ ކުންފުނިންވަނީ ފްލެޓްތަކުގެ މަސައްކަތް ނިންމާ ރަމްޒީ ތަޅުދަނޑިވެސް ސްޓެލްކޯގެ މެނޭޖްމަންޓާއި ހަވާލު ކޮށްފައެވެ.
ސްޓެލްކޯގެ ފްލެޓް ލިބުނު މުވައްޒިފުންނާއި ފްލެޓް ހަވާލު ކޮށްފައިވަނީވެސް މި ރަސްމިއްޔާތުގައެވެ.
ސްޓެލްކޯގް ފްލެޓް ތަރައްގީ ކޮށްފައިވަނީ ޖުމްލަ 692 މިލިއަން ރުފިޔާ ޚަރަދު ކޮށްގެންނެވެ. މީގެތެރެއިން ސްޓެލްކޯގެ މުވައްޒަފުން ދައްކާ ކުލިން ހިއްސާ ކުރަނީ 623 މިލިއަން ރުފިޔާއެވެ. ސްޓެލްކޯއިން ހިއްސާ ކޮށްފައިވަނީ 69 މިލިއަން ރުފިޔާއެވެ.
މީގެ އިތުރުން ސްޓެލްކޮއިން ހަމަޖައްސާފައިވަނީ ފްލެޓްތަކުގެ ކުލިވެސް އެކުންފުނި މެދުވެރިކޮށް ދެއްކުމަށެވެ. ސްޓެލްކޯއިން ބުނެފައިވާ ގޮތުގައި މިގޮތަށް ހަމަޖައްސާފައިވަނީ ބޭންކު ލޯނު މެދުވެރިކޮށް ކުލި ހަމަޖެއްސުމަކީ ޚަރަދު ބޮޑު އުސޫލަކަށް ވާތީ ކަމުގައެވެ.
މިގޮތުން އެކުންފުނިންވަނީ ކުލި 18 އަހަރަށް ބަހާލައިގެން ދެއްކޭނެ ގޮތް ހަމަޖައްސާފައެވެ.
ސްޓެލްކޯއިން ދެ ޓަވަރު ތަރައްގީ ކޮށްފައިވާއިރު، ދެ ޓަވަރުގައި ޖުމްލަ 360 ޓަވަރު ހުރެއެވެ. އޭގެ ތެރޭގައި ހިމެނެނީ 1 ކޮޓަރީގެ 72 އެޕާޓްމަންޓާއި ދެ ކޮޓަރިއާއި މެއިޑް ރޫމް ހިމެނޭ 288 އެޕާޓްމަންޓެވެ.
މީގެ ތެރޭގައި ހިމެނޭ އެއް ކޮޓަރީގެ އެޕާޓްމަންޓަކަށް ދައްކަން ޖެހެނީ މަހަކު 5622 ރުފިޔާއެވެ. ދެކޮޓަރިއާއި މެއިޑް ރޫމް ހިމެނޭ އެޕާޓްމަންޓަކަށް ދައްކަން ޖެހެނީ 10،356 ރުފިޔާއާއި 10،652 ރުފިޔާއާއި ދެމެދުގެ އަދަދެއްގެ ކުއްޔެކެވެ. ފްލެޓްތަކުގެ މެއިންޓަނަންސް ފީގެ ގޮތުގައި ދައްކަން ޖެހެނީ މަހަކު 1،000 ރުފިޔާއެވެ.
ސްޓެކްކޮއިން ހާމަ ކޮށްފައިވާ ގޮތުގައި މިހާތަނަށް 306 މުވައްޒިފަކު ފްލެޓް އެއްބަސްވުމުގެ ސޮއިކޮށްފައި ވާއިރު، އެއްބަސްވުމުގައި އަދި ސޮއިކުރަންޖެހޭ 52 މުވްޒިފަކު އެބަތިއްބެވެ.
ސްޓެލްކޯ ހިމެނިގެންދަނީ، ހިޔާ މަޝްރޫއުގެ ދަށުން ފްލެޓް ތަރައްގޫކުރި 4 ކުންފުނީގެ ތެރެއިން އެންމެ ފުރަތަމަ ފްލެޓް ހަވާލުކުރި ކުންފުނި ކަމުގައެވެ.
