ރާއްޖޭގައި މިނިވަން ދުވަހެއް ފާހަގަކުރަމުން އަންނައިރު، ޚިޔާލުފާޅުކުރުމުގެ ހައްގުގައި ހިލިހިލާ ޖެހިފައިވާކަަމަށް މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް އަދި ދަނގެތި ދާއިރާގެ މެންބަރު މުޙައްމަދު ނާޒިމް (ކާނަލް) ވިދާޅުވެއްޖެއެވެ. ނާޒިމް މިފަދައިން ވިދާޅުވީ މިއަދު ފާހަގަކުރާ މިނިވަން ދުވަހުގެ މުނާޞަބަތުގައ ފޮނުއްވި ތަހުނިޔާގެ މެސެޖުގައެވެ.
ނާޒިމް ވިދާޅުވީ، މިނިވަންކަމަށް 57 އަހަރު ފުރުނިއިރު މިނިވަންކަމަށް ބޮޑެތި ގޮންޖެހުންތައް ކުރިމަތިވެފައިވާކަމަށާއި، ކޯވިޑާއި ޔޫކްރެއިން ރަޝިޔާ ހަނގުރާމައިގެ ސަބަބުން އިޤްތިޞާދަށް އައި ހީނަރުކަމުގެ އޭގެ އަނިދިރިކަން ރައްޔިތުންގެ ހިތްތަކަށް ވެރިވެފައިވާކަމަށެވެ.
ބާޒާރުގައި މުދަލުގެ އަގު ބޮޑުވެ އާންމު ރައްޔިތުންގެ ދިރިއުޅުމުގެ ހާލަތު ދުވަހުން ދުވަހަށް ދަށްވަމުންދާކަމަށާއި، ދައުލަތާއި ސަރުކާރުގެ ޚިދުމަތާއި އެކަށީގެން ނުވާވަރަށް ދައުލަތް ބޮޑުކޮށް އިސްރާފުކޮށް ފޫބެއްދުމަށް ހަރުދަނާ ފިޔަވަޅުތަކެއް ނޭޅޭކަމަށް ނާޒިމް ވިދާޅުވިއެވެ. އެހެންކަމުން ރައްޔިތުންގެ އަތުން ނަގާ ޓެކްސް ބޮޑުކުރުމަކީ އެކަމުގެ ހަމައެކަނި ހައްލުކަމަށް ޤަބޫލުނުކުރާކަމަށް ނާޒިމް ވިދާޅުވިއެވެ.
ޒަމާނުއްސުރެ މިޤައުމުގައި ދަމަހައްޓަމުން އައި އިސްލާމީ ރިވެތި އުސޫލްތަކާއި މިންގަނޑުތަކުން ނެއްޓި ޤައުމުގެ ފޭރާން ރޫޅި ދިވެހިންގެ ތެރެއިން ބައެއްގެ އަޚްލާގު މިއަދު ވެއްޓިފައިވާ ދަރަޖައަކީ އެއާމެދު ދިވެހި ކޮންމެ މަންމައަކާއި ބައްޕައަކު އަދި ކޮންމެ ބޭބެއަކާއި ކޮއްކޮއަކު ފުންކޮށް ވިސްނަން ޖެހިފައިވާ ހާލަތެއް.
– ކާނަލް ނާޒިމް ވިދާޅުވިއެވެ.
ދިވެހިންގެ ފަހުރުވެރި މިނިވަން ދުވަހުގެ މުނާސަބަތުގައި އެމްއެންޕީގެ ރައީސް ކާނަލް (ރޓޑ) މުޙައްމަދު ނާޒިމް ދެއްވާ ޚިތާބު pic.twitter.com/G0Mlq3O7dq
— Maldives National Party (@MNP_Secretariat) July 26, 2022
ނާޒިމް ވިދާޅުވީ ދިވެހިންގެ ހިތްތަކުގައި އިސްލާމީ ޝިއާރު ޢާލާކޮށް އިސްލާމީ ވަހުދަތު ނަގަހައްޓާ ހިފަހައްޓާ ބަޔަކަށް މި ޤައުމު ބޭނުންވެފައިވާކަން ކޮންމެ މީހަކަށް އިހުސާސްކުރެވޭނެކަމަށެވެ.
ޒަމާން ބަދަލުވެ އައު ޤާނޫނު އަސާސީ ތަޢާރަފްވެ ދައުލަތް ޖަވާބުދާރީ ކުރުވަން އުފެދިފައިވާ މުއައްސަސާތަކުގެ ބާރު ކެނޑި ރައްޔިތުން ޤުރުބާންވެ ހޯދައިދިން ހައްގުތައް ހަނިކުރަމުންގޮސް ޑިމޮކްރަސީގެ އެއް އަސާސްކަމަށްވާ މިނިވަން ނޫސްވެރިކަން މިވަނީ ނޭވާ ހޮޅިއަށް އެޅިފައި. ޒަމާނުއްސުރެ ދިވެހިން ވަކާލާތު ކުރަމުން އައި ހިޔާލު ފާޅުކުރުމުގެ ހައްގުގާ މިވަނީ ހިލި ހިލާ ޖެހިފައި. ރައްޔިތުންނަށް ތެދު ހަބަރު ފެތުރުމުގެ ބޮޑު މައްސޫލިޔަތު ގާނޫނު އަސާސީން ތަންމިނަށް ދީފަ އޮތް ނޫސްވެރިންނަށް ޖަލުގެ ހުރަގެ އެއީ އެމީހުންގެ މަސައްކަތުގެ އެންމެ ފަހު މަންޒިލް ކަމަށް މިވަނީ ވެފައި. ދިވެހިންނަށް މިނިވަންކަން ލިބުތާ 57 އަހަރު ފުރި އޭގެ އުފާ އަޅުގަނޑުމެން ފާހަގަ ކުރާއިރު އަޅުގަނޑުމެންގެ ހާލަކީ މީނުންތޯ؟
– އެމްއެންޕީގެ ރައީސް ނާޒިމް ވިދާޅުވިއެވެ.
ދިވެހިންގެ މިނިވަންކަމާއި އިސްތިގުލާލާ މާތްވެގެންވާ އިސްލާމް ދީނުގެމަތިވެރި އުސޫލުތައް ނަގަހައްޓާއި ދިވެހިންނަށް ޚިދުމަތް ދިނުމުގައި ހަމަތައް ޤާއިމްކޮށްދީ ދިވެހިން އެދޭ އުއްމީދީ ދިވެހިރާއްޖެއެއް ބިނާކޮށްދޭން ކެރިގެން ކުރިމަތިލާން ތައްޔާރަށް ހުންނެވިކަމަށްވެސް ނާޒިމް ވިދާޅުވިއެވެ.
ރާއްޖޭގެ ޚާރިޖީ ސިޔާސަތު ބައްޓަންވެފައި މިވަނީ ދިވެހިންގެ މަސްއޫލިއްޔަތު އިސްކޮށްގެންތޯ އެތައް ބަޔަކު ސުވާލު އުފައްދާކަން ފާހަގަކުރައްވާ ނާޒިމް ވިދާޅުވީ، އެމްއެންޕީގެ ވެރިކަމެއްގައި ދިވެހިންގެ މިނިވަންކަމަށް ބުރޫއަރާފަދަ އެއްވެސް ކަމެއް ނުކުރާނެކަމުގެ ޔަޤީންކަން ދެއްވާކަމަށެވެ. އަދި ދިވެހިންގެ ލޮބުވެތި ފަސްގަނޑު ހަމަހިލާ އެންމެ އިންޗިއެއްވެސް ބޭރުގެ ބަޔަކަށް ނުދޭނެކަމުގެ ފުރިހަމަ ޔަޤީންކަން ރައްޔިތުންނަށްދޭކަމަށް ނާޒިމް ވިދާޅުވިއެވެ.
