ކާތިކްގެ ފިލްމީ ކެރިއަރުގައި ލިބުނު އެންމެ ބޮޑު ފިލްމުގެ ބަތަލާއިންގެ ގޮތުގައި ފެނިގެންދާނީ މިވަގުތު ބޮލިވުޑުގައި ތިބި ހުނަރުވެރި އަދި އެންމެ ޑިމާންޑް ބޮޑު ދެ ބަތަލާއިންގެ ތެރެއިން ކޮން ބަތަލާއެއްތޯ ވަނީ ސުވާލު މާކެއްގެ ތެރޭގައެވެ.
އަދި މާގިނަ މަުލޫމާތެއް ހިއްސާ ކޮށްފައިނުވާ މި ފިލްމު އިއުލާ ކޮށްފައިވާ އިރު ފިލްމުގެ ލީޑުން ފެނިގެންދާނީ މިހާރު އެންމެ ކާމިޔާބު އެއް ޒުވާން އެކްޓަރ ކާތިކް އާރިޔާންއެވެ. އޭނާ އާއެކު ފިލްމަށް ގެންނާނެ ބަތަލާއެއް މިހާރު ވަނީ ގަދަ ހިފުމަށް ގޮސްފައެވެ. އެގޮތުން މި ފިލްމްގެ ލީޑުން ކެޓްރީނާ ކައިފް ނުވަތަ ދީޕިކާ ޕަޑުކޯން ފެންނާނެ ކަމަށް ޚަބަރުތަށް ބުނެއެވެ.
މިދެތަރިންގެ ތެރެއިން ފިލްމުން ފެންނާނީ ކޮން ތަރިއެއް ކަމެއް އަދި ޔަގީނެއް ނުވެއެވެ. އެންމެ ބޮޑަށް ލަފާ ކުރެވޭ ގޮތުގައި ފިލްމަށް ނަގާނީ ކެޓްރީނާއެވެ.
އަދި ވަކި ނަމެއް ދީފައި ނުވާ މި ފިލްމުގެ ޑައިރެކްޓަރަކީ ކަބީރް ޚާނެވެ. އޭނާ އާއެކު މީގެ ކުރިން ވެސް ކްޓްރީނާ ވަނީ މަސައްކަތް ކޮށްފައެވެ. އަދި އެދެމީހުންގެ މެދުގައި ވަރަށް ވަރުގަދަ އެކުވެރި ކަމުގެ ގުޅުން އޮވެއެވެ.ފިލްމް އިއުލާން ކުރި އިރު ވެސް ކަބީރް ހުރީ ރާއްޖޭގައި ކެޓްރީނާގެ އުފަންދުވަސް ފާހަގަ ކުރުމުގައި ބައިވެރިވާށެވެ.
View this post on Instagram
ސާޖިދު ނަޑިއާޑްވާލާ ޕްރޮޑިއުސްކުރާ މި ފިލްމުގެ މަސައްކަތް ފަށާނީ އަންނަ އަހަރުއެވެ. މި ފިލްމުގައި ކާތިކްގެ ކެރެކްޓާގެ ތެރެއިން، ފިލްމު "ދަންގަލް" ގައި އާމިރު ޚާންގެ ހަށިގަނޑަށް ގެނައިފަދަ ބަދަލުތަކެއް ކާތިކްގެ ހަށިގަނޑުންވެސް ފެންނާނެ ކަމަށް ޚަބަރުތައް ބުނެއެވެ.
ކެޓްރީނާ އެންމެ އަވަހަށް ބެލުންތެރިންނަށް ފެންނާނީ ފިލްމު "ފޯން ބޫތު" އިންއެވެ. އެހެންނަމަވެސް އެފިލްމު މިހާރު ވަނީ ރިލީޒްކުރަން ކަނޑައެޅި ތާރީހު ފަސް ކޮށްފައެވެ. މީ އެ ފިލްމުގެ ތަރީހު ފަސް ކުރި ދެވަނަ ފަހަރެވެ.
ކާތިކަކީ މިވަގުތު އެންމެ ކާމިޔާބު އެއް އެކްޓަރެވެ. އެގޮތުން އޭނާގެ ފިލްމު "ބޫލް ބުލައްޔާ2″ އަށް ލިބުނު ބޮޑު ކާމިޔާބީއާ އެކުގައި އޭނާ ވަނީ ބޮލީވުޑްގެ މެދު އުޑުގައި ފިޔަޖަހަން ފަށާފައެވެ.
