ބޮލީވުޑްގެ ނުފޫޒުގަދަ ޑައިރެކްޓަރ އަދި ޕްރޮޑިއުސަރ ކަރަން ޖޯހަރުގެ ޗެޓް ޝޯ "ކޮފީ ވިތު ކަރަން"ގެ 7 ވަނަ ސީޒަން މިހާރު ވަނީ ޑިޒްނީ ޕްލަސް ހޮޓްސްޓަރ އިން ސްޓްރީމް ކުރަން ފަށާފައެވެ. މިއީ މި ޝޯ އޮންލައިން ޕްލެޓްފޯމަކުން ގެނެސްދޭ ފުރަތަމަ ފަހަރެވެ.
2004 އިން ފެށިގެން "ކޮފީ ވިތު ކަރަން" ގެނެސްދެމުން އައީ ސްޓާ ވޯލްޑް އިންޑިއާ އިންނެވެ.
ޝޯގެ 7 ވަނަ ސީޒަންގެ ޕްރޮމޯޝަން ތަކުގައި ކަރަން ގެންދަނީ އަވަދިނެތި އުޅެމުންނެވެ. މިފަދަ ޕްރޮމޯޝަނެއްގެ ތެރެއިން ވާހަކަ ދައްކަމު ކަރަން ވަނީ އޭނާ ޑައިރެކްޝަނަށް ތަޢާރަފްވި ފިލްމު "ކުޗް ކުޗް ހޯތާހޭ" އަލުން ހަދާނަމަ ނަގާނެ ތަރިން ހާމަކޮށްފައެވެ.
1998ގެ މި ފިލްމަކީ ޝާހްރުކް ޚަނާއި ކާޖޮލްގެ އިތުރުން ރާނީ މުކަރުޖީ އާއެކު ގެނެސްދިން ސުޕަރހިޓް ތިނެސްކަން ލޯބީގެ ފިލްމެކެވެ.
ކަރަން ބުނީ އެ ފިލްމު މިޒަމާނުގައި ހަދާނަމަ، ޝާހްރުކް ކުޅުނު ރާހުލްގެ ރޯލަށް އޭނާ ނަގާނީ ރަންވީރު ސިންގ ކަމަށެވެ. އަދި ކާޖޮލް ކުޅުނު އަންޖަލީގެ ރޯލަށް ކަރަންގެ ޗޮއިސްއަކީ އާލިއާ ބަޓެވެ. މީގެ އިތުރުން ރާނީ ކުޅުނު ޓީނާގެ ރޯލަށް ކަރަންއަށް އެންމެ ކަމުދިޔައީ ޒުވާން ތަރި ޖާންވީ ކަޕޫރެވެ.
އަހަރު ތަކަކަށް ފަހު ކަރަން ޑައިރެކްޓަރުގެ ގޮޑީގައި އިށީން ފިލްމު "ރޮކީ އޯރް ރާނީ ކީ ޕްރޭމް ކަހާނީ"ގެ ލީޑުން ފެނިގެންދާނީ ރަންވީރާއި އާލިއާއެވެ. މިއީ 2019ގެ ފިލްމު "ގަލީ ބޯއީ" އަށްފަހު މިދެތަރިން އެކުގައި ކުޅޭ ދެވަނަ ފިލްމެވެ. އަނެއްކޮޅުން ޖާންވީ 2018 ވަނަ އަހަރު ބޮލީވުޑަށް ތަޢާރަފްކުރީވެސް ކަރަން އާއި ޒީ ސްޓޫޑިއޯ ގުޅިގެން ގެނެސްދިން ފިލްމަކުންނެވެ.
