މިއަހަރުގެ ފިތުރު ޢީދު ކުލަގަދަކޮށް ފާހަގަކުރި މާލެއަތޮޅު މާފުށީގައި އަޟްޙާ ޢީދުގައިވެސް ތަފާތު ގިނަ ހަރަކާތްތަކެއް ބޭއްވުމަށް ނިންމައިފިއެވެ.
"މާފުށީ ޢީދު އުފާ"ގެ ނަމުގައި މާފުށީ ރަށު ކައުންސިލުން އިންތިޒާމްކޮށްގެން ބާއްވާ ޢީދު ފެސްޓިވަލް ކުރިއަށްދާނީ ޢީދު ވިލޭ ރެއިން ފެށިގެން އާދީއްތަ ދުވަހުގެ ނިޔަލަށެވެ.
ފެސްޓިވަލްގައި ކުރިއަށް ދާނެ ބައެއް ސަގާފީ ހަރަކާތްތަކުގެ ތެރޭގައި ބޮޑުމަސް ބޭނުން، ކޯޑި ނެރުން އަދި މާލިޕެރޭޑް ހިމެނެއެވެ. މިއީ އަންމުކޮށް ރާއްޖޭގެ ގިނަ ރަށްރަށުގައި ވެސް ޢީދުގައި ކުރިއަށް ގެންދާ ސަގާފީ ކުޅިވަރުތަށް ކަމަށްވާއިރު ޢީދު ފާހަގަކުރުން މާފުށީގައި ތަފާތުވަނީ އެރަށުގައި ބާއްވާ ތަފާތު ޒަމާނީ ކުޅިވަރުތަކުގެ ސަބަބުންނެވެ.
މާފުށީގައި ކުރިއަށްގެންދާ ޒަމާނީ ކުޅިވަރުތަކުގެ ތެރޭގައި ކަލަރ ރަންއަކާއި، ފްލޯޓިންގ ވޯޓަރ ޕާކްގެ ހަރަކާތްތަކާއި ޚާއްސަ ޢީދު ޝޯތައް ފާހަގަކޮށްލެވެއެވެ. މީގެ އިތުރުން ބޮޑު ޖަމާއަތުގައި ކުރެވޭ ޢީދު ނަމާދާއި ޢީދު ސަޔާއި، ވެދުމާ ދިޔުމާއި އުޟްހިޔާ ކަތިލުންވެސް ޢީދުގެ ހަރަކާތްތަކުގެ ތެރޭގައި ފާހަގަކޮށްލެވެއެވެ.
ޢީދު ވިލޭ ރޭ ބޮޑު ޖާފަތެއް އޮންނާނެ ކަމަށާއި އެރޭ ޢީދު ބަޑިޖެހުން ވެސް އޮންނާނެ ކަމަށް މާފުށީ ކައުންސިލުން މައުލޫމާތު ދެއެވެ. އަދި ޢީދު ދުވަހު ރޮބޯ މޭން އާއެކު ކުޑަކުދިންގެ ހަވީރަކާއި ޢީދު ދުވަހުގެ ރޭ ހަވާއެރުވުމާއި ލޭޒާ ލައިޓް ޝޯއެއް އޮންނާނެކަމަށް މާފުށީ ކައުންސިލުން ބުނެއެވެ.
މާފުށީގައި ކުރިއަށްގެންދާ ޢީދު ޝޯތަކުގައި ސަފޫރާ އެންޑް ފްރެންޑްސް، ޔާރާ ގްރޫޕް، ޓްރެފިކް ޖޭމް، މާފުށީ ސަގާފީ ގްރޫޕް އަދި މާފުށީ ބޮޑުބެރު ގްރޫޕްގެ ހުށަހެޅުންތައް އޮންނާނެއެވެ.
ފިތުރު ޢީދުގައި 4500 އަށް ވުރެ ގިނަމީހުން މާފުއްޓަށް ޒިޔާރަތް ކުރިކަން ފާހަގަކޮށް މާފުށީ ކައުންސިލުން ލަފާކުރަނީ އަޟްޙާ ޢީދުގެ ހަރަކާތްތައް ބެލުމަށާއި ބައިވެރިވުމަށް 7000 އަށް ވުރެ ގިނަ މީހުން މާފުއްޓަށް ޒިޔާރަތް ކުރާނެ ކަމަށެވެ.
ޢީދުގެ ހަރަކާތްތަކަށް މާފުއްޓަށް ދާން ބޭނުންވާ ފަރާތްތަކަށް ހާއްސަ ފެރީގެ އިންތިޒާމްތައް ހަމަޖައްސާ ނަމަވެސް ދުރާލައި ލޯންޗު ޓިކެޓާއި ގެސްޓްހައުސްތަކުން ކޮޓަރި ބުކް ކުރުމަށް މާފުށި ކައުންސިލުން ވަނީ އިލްތިމާސްކޮށްފައެވެ.
