އަދުގެ ދުނިޔޭގައި އެއްވެސް ގައުމަކީ ހަރުދަނާ އިގްތިސާދީ ސިޔާސަތުތަކެއްގެ މައްޗަށް މެނުވީ ކުރިއަރައިގެން ދާނޭ ގައުމުތަކެއް ނޫނެވެ. ދުނިޔޭގެ ގައުމުތައް ސިޔާސީ ގޮތުން ބާރުގަދަ ވުމާއި، ގައުމުތަކުގެ ރައްޔިތުންގެ ފުދުންތެރި ކަމާއި، އަދި މިނޫނަސް ތަރައްގީއާއި ތަމައްދުނުގެ ރޮގުގައި، އަދުގެ ދުނިޔޭގައި ގައުމުތައް ކުރި އަރައިގެން އައިސްފައިވަނީ އެގައުމުތައް އިގްތިސާދީ ގޮތުން ހޯދި ކުރިއެރުންތަކުގެ ނަތީޖާއެއްގެ ގޮތުންނެވެ.
ހަމަ އެއާއެކު ފާހަގަ ކޮށްލާންޖެހޭ އެންމެ މުހިންމު އެއް ނުކުތާއަކީ، އިގުތިސާދީ ގޮތުން ދުނިޔޭގައި ހަމައެކަނި ކުރިއަރައިގެން ގޮސްފައިވަނީ، ގުދުރަސީ ވަސީލަތްތައް އެގައުމުކުގައި ހުރި ގައުމުތައް އެކަނި ނޫންކަމެވެ. އޭގެ ބަދަލުގައި، އަމިއްލަ ގައުމުގައި އިގްތިސާދީ މާގިނަ ވަސީލަތްތަކެއް ނެތްނަމަވެސް، އިގްތިސާދީ ގޮތުން އިންވެސްޓުކޮށްގެން ގައުމުގައި ހުރި ވަސީލަތްތައް އިތުރަށް ފުޅާ ކޮށްގެން، އަދި އާ ސިޔާއަތުތައް އީޖާދުކޮށްގެން މާލީގޮތުން ކުރިއަރަމުން އަންނަ ގައުމުތައްވެސް އަދުގެ ދުނިޔޭގައި ވަރަށްވެސް ގިނައެވެ.
މި ފުރުސަތުތައް ހޯދާ ލިބިގަތުމުގައި ބޭނުންވަނީ އިގްތިސާދީ ހަރުދަނާ ވިސްނުންތަކާއި، ސިޔާސަތުތަކެކެވެ. ޒަމާނުއްސުރެ ލިބިފައި ހުރި ވަސީލަތްތަކުން "ދިޔަ ފެލާލާއިގެން" ބަނޑުފުރާނަ މުއްތި ކޮށްގެން ތިބުމުގެ ބަދަލުގައި، އާމްދަނީ ލިބިގަނެވޭނެ އާ އިންވެސްޓްމަންޓަތަކަށް ފުރުސަތު ދިނުމާއި، މި އުސޫލުމެމަތިން ސްޓަރަޓެޖިކް އިގްތިސާދީ އިންވެސްޓްމަންޓްތައް ގައުމުގައި ގާއިމް ކުރުމެވެ.
މިގޮތުން ބަލާއިރު، ކުރީ ސަރުކާރަށްވެސް އަދި މި ސަރުކާރަށްވެސް ދުރަށް ނުދެވިގެން އުޅޭ އެއް ވިސްނުމެއްގެ ގޮތުގައި ފާހަގަވާން އޮތީ، ފާއިތުވި 30 ވަރަކަށް އަހަރު ތެރޭ ދިވެހިރާއްޖޭގެ އިގްތިސާދުގެ އެންމެ މައިގަޑު އެއް ތަނބުގެ ގޮތުގައިއޮތް ފަތުރުވެރިކަމުގެ ސިނާއަތުން ދިޔަ ފެލާލައިގެން އިގްތިސާދު ދެކޮޅު ޖެއްވުމުގެ ވިސްނުމެވެ. މި ސިނާއަތު އިތުރަށް ޑައިވާސިފައި ކުރުމުގެ ބަދަލުގައި ދައުލަތަށް މި ސިނާއަތުންވެސް ނަގަމުންދާ ޓެކްސް އިތުރު ކުރަމުން ދިއުމުގެ ވިސްނުމެވެ.
އިގްތިސާދީ އާ ސިނާއަތުތައް ވުޖޫދު ކުރުމުގެ ވިސްނުމެއް ނެތް!
ފާއިތުވެދިޔަ ދެ އަހަރެއްހާ ދުވަހު ދުނިޔެއަށް ކުރިމަތިވެފައި އޮތް ކޯވިޑްގެ އާލަމީ ވަބާއަށްފަހު މިހާރު ކުރެވެމުންދާ ޔޫކުރެއިން ހަގުރާމައާއެކު، މުޅި ދުނިޔެވެސް މިވަނީ އިގްތިސާދީ ވަރުގަދަ ކާރިސާއެއްގެ ތެރެއަށް ވެއްޓިގެން ގޮސްފައެވެ.
އަމުދުން ރާއްޖެފަދަ ކުދި ގައުމުތަކުން ބެޖެޓް ދެކޮޅު ޖެއްސުމަށް ނަގަމުން އަންނަ ލޯނުތަކާއި، ތެލާއި ކާނާގެ ބާވަތްތައް ލިބުމުގައި ކުރިމަތިވެފައިވާ ގޮންޖެހުންތަކާއެކު ތެކެތީގެ އަގު އިންތިހާއަށް އުފުލިގެން ދާދިއުމުގެ ނަތީޖާއެއްގެ ގޮތުން އިގްތިސާދީ ގޮތުން ހުރި ގޮންޖެހުންތައް މިވަނީ އިންތިހާއަށް އުފުލިގެން ގޮސްފައެވެ.
އަދި މިގޮތުން ކުރިމަތިވަމުންދާ އިގްތިސާދީ ގޮންޖެހުންތަކަށް ކައިރި މުސްތަގުބަލެއްގައި ހައްލު އަންނާނޭކަމަށް ބެލެވެމުން ނުދާތީ، އިގްތިސާދީ ދެމެހެއްޓެނިވި ސިޔާސަތެއްގެ މުހިންމުކަންވެސް މިގައުމުތަކަށް މިވަނީ ވަރަށްވެސް ބޮޑުވެފައެވެ.
މިގޮތުން، އަހަރުން އަހަރަށް އިތުރުވަމުންދާ ދައުލަތުގެ ޚަރަދުތަކާއި، ބޮޑުވަމުންދާ ދައުލަތުގެ ބަޖެޓް ދެކޮޅު ޖެއްސުމަށް ދައުލަތަށް ބޭނުންވާ އާމްދަނީ އިތުރު ކުރުމަށްޓަކާ މިއަދު ޓީޖީއެސްޓީއާއި ޓީޖީއެސްޓީއަށް ބަދަލު ގެނެސް، އަންނަ އަހަރުގެ ޚަރަދުތައް ދެކޮޅު ޖެއްސުމަކީ ކުރެވިދާނެ ކަމެކެވެ.
އެހެންނަމަވެސް، މި ބީދައިން ޖިއެސްޓީގެ ބްރެކެޓް ފުޅާ ކުރެވެމުން ގެންދެވޭނީ ކިހާ މިންވަރަކަށްތޯ، ނުވަތަ އާމްދަނީ އިތުރު ކުރުމަށް ކުރިޔަށް އޮތްތަނުގައިވެސް ގެންނާން ހަަމައެކަނި ބަދަލަކީ މިއީތޯ ހަގީގަތުގައިވެސް މިއަދު އުފެދިގެންދާ ސުވާލެކެވެ.
މި ސަބަބަށްޓަކާ، އިގްތިސާދީ ސިޔާސަތުތައް ރާވާ ފަރާތްތަކުން މިއަދު މިވަނީ، ދަައުލަތުން ނަގާ ޓެކްސް ބޮޑުކޮށްގެން ދައުތަގެ އާމްދަނީ އިތުރު ކުރުމުގެ ވިސްނުމާއި ދުރަށްގޮސް، އާމްދަނީ ހޯދޭނެ އިތުރު އާ ވަސީލަތްތަކާމެދު ފުންކޮށް ވިސްނާ ފިކުރު ކުރާންޖެހިފައެވެ. ކުރިޔަށް ދިގުދެމިގެންދާނޭ އިގްތިސާދީ އާ އިންވެސްޓުމަންޓް ތަކަކާ ދޭތެރޭ ވިސްނާ ފިކުރު ކުރާން ޖެހިފައެވެ. އިގްތިސާދީ އާ ސިނާއަތްތައް ވުޖޫދު ކުރެވޭތޯ މަސައްކަތް ކުރާން މިއަދު މިވަނީ މަޖުބޫރު ވެފައެވެ.
ދިވެހިރާއްޖެއަކީ ކަނޑު ދަތުރުފަތުރާއި ނުހަނު ބޮޑަށް ގުޅި ލާމެހިފައިވާ ގައުމަކަށް ވުމާއެކު، ދުނިޔޭގެ ބައްރުތައް ހުރަސްކޮށް ދަތުރު ކުރަމުންދާ ބޯޓު ފަހަރުތަކަށް ޚާއްސަ ޓްރާންޝިޕަންޓް ބަނދަރެއް ގާއިމް ކުރުމުގެ ވިސްނުމަކީ މިހާރުވެސް ސަރުކާރުން ގެންގުޅެން ޖެހިފައިވާ ވިސްނުމެކެވެ. ސަބަބަކީ ދިވެހިރާއްޖެއަކީ، ދުނިޔޭގެ އިރުން ހުޅަނގަށް ދަތުރު ކުރާ ގިނަ ބޯޓު ފަހަރުތަކުން ރާއްޖޭގެ ކަނޑުތައް ހުރަސް ކުރާންޖެހޭގޮތަށް، އުތުރުން ދެކުނަށް ނުވަތަ ދެނުކުން އުތުރަށް ވާގޮތަށް 1،000 ވަރަކަށް ކިލޯ މީޓަރަށް ފެތުރިފައި އޮތް ގައުމަކަށް ވާތީއެވެ.
ދުނިޔޭގެ ބައެއް ގައުތަކަށް ބަލާއިރު، މިސްރުގެ އިގްތިސާދަކީ ކުރިއަރައިގެންދިޔަ، މެދު އިރުމަތީގެ ވަރުގަދަ އިގްތިސާދަކަށް ވެގެން ދިޔައީ، ސުވޭސް ކެނަލްއަށް އެގައުމުން އިންވެސްޓުކޮށް، އެއީ ދުނިޔޭގެ ކާގޯ ބޯޓުފަހަރުތައް ދަތުރުކުރާ މައިގަޑު ޗެނަލްގެ ގޮތުގައި އެ ޗެނަލް ހަމަޖެހިގެން ދިޔަ ހިސާބުންނެވެ. މި ޗެނަލައަކީ ސްޕެޝަލް އިކޮނޮމިކް ޒޯންއެއްގެ ގޮތުގައި ތަރައްގީ ކުރުމަށްޓަކާ އެގައުމުން މިހާތަނަށް އައިއިރު މި ޗެނަލްއަށް 18 ބިލިއަން އެމެރިކާ ޑޮލަރު އިންވެސްޓް ކޮށްފައި ވެއެވެ.
މިއަދު މުޅި ދުނިޔޭގައި، ކަނޑު ހުރަސްކޮށް އުފުލޭ ކާރގޯގެ %12 އުފުލުމަށް ބޭނުންކުރެވޭ، 193 ކިލޯ މީޓަރު ދިގު މި ކެނަލް ފާއިތުވެދިޔަ އަހަރު ބަންދުވުމުގެ ސަބަބުން، ކޮންމު ދުވަހަކަށް، އޭޝިއާ އަދި ޔޫރަޕާ ދެމެދު އުފުލޭ 9.6 ބިލިއަން އެމެރިކާ ޑޮލަރުގެ އަގުހުރި ގާކޯ އޭގެ މަންޒިލްތަށް ފޯރުކޮށް ނުދެވި އޭރުވެނީ ހިފެހެއްޓެމުން ގޮސްފައެވެ.
މިއުސޫލުން ބަލާއިރު، ރާއްޖެއިން ތެޔޮ ފެނޭތޯ މަސައްކަތް ނުކޮށް ދެއަތް އުރާލައިގެން މިއަދު ތިބޭންވީ ސަބަބެއްވެސް ހަގީގަތުގައި އޮތް ކަމަށް ދެންނެވޭކަށް ނެތެވެ. އޭގެ ތަހުލީލުތައް ކުރުމުގެ ވިސްނުން ސަރުކާރުތަކުން ނުގެންގުޅޭންވީ އެއްވެސް ސަބަބެއް ނެތެވެ. ނުވަތަ ދުނިޔޭގެ ބާޒާރުގައި ލިބެންހުރި ތެލުގެ ވަސީލަތްތައް ހޯދާ ބަލާ، ކުރޫޑް އޮއިލް ރާއްޖޭގައި ރިފައިން ކުރެވޭނޭ ވަރުގެ އިންވެސްޓަމަންޓަކާ ދޭތެރޭވެސް މިއަދު ވިސްނުމަކީ، ރާއްޖެފަދަ އިމްޕޯޓުކުރާ ތެލަށް އިންތިހާއަށް ބަރޯސާވެފައ އޮތް ގައުމަކުން މިސްރާބު ހިފުން ރަގަޅު އަމާޒެކެވެ.
ސަބަބަކީ، މިގޮތުން ކުރެވޭ ބިޔަ އިންވެސްޓްމަންޓެއްގެ ޒަރީއާއިން (ތެޔޮ ސާފުކޮށްގެން)، މުޅި ގައުމުގެ ހަކަތައިގެ %70 ތެލުގެ އިމްޕޯޓަށް ބަރޯސާވެފަ އޮތް އޮތުމަށް ބަދަލު ނުގެނެވޭންވީ އެއްވެސް ސަބަބެއް އަދުގެ ދުނިޔޭގައި ފެންނާން ނެތުމުންނެވެ. އިގްތިސާދީ އާ ސިނާއަތުތަކާއި އާ ވަސީލަތްތައް ދުނިޔޭގެ އެހެން ގައުމުތަކުންވެސް އީޖާދު ކޮށްފައިވަނީ ހަމަ މި ބީދައިން ކަމަށް ވާތީއެވެ.
އިގްތިސާދީ އާ ވަސީލަތްތަކަށް އިންވެސްޓު ކުރުން މަޖުބޫރު!
ފާއިތުވެދިޔަ 5 އަހަރެއްހާ ދުވަހަށް ބަލާއިރު، އޭރުގެ ސަރުކާރުންނާއި މިހާރުގެ ސަރުކާރުންވެސް ކޮށްފައިވާ އަދި ކުރަމުންދާ ބޮޑެތި ހޭދަތަކަށް ބަލާއިރު، ކޮށްފައިވާ ބިޔަ ގިނަ އިންވެސްޓްމަންޓް ތަކަކީ، އިގްތިސާދީ "ޕްރޮގްރެސިވް" ވިސްނުންތަކުގެ ތެރެއިން ކޮށްފައިވާ އިންވެސްޓްމަންޓްތަކެއް ނޫންކަމުގައި ދަންނަވާން ޖެހެއެވެ.
ރައީސް ޔާމިންގެ ސަރުކާރުކާރުގައި ސިނަމާލެ ބުރިޖަށް 300 މިލިއަން ޑޮލަރު ހޭދަ ކޮށްފައިވާއިރު، މިސަރުކާރުން މިހާރުވަނި ތިމަލާގެ ބުރިޖަށް 600 މިލިއަން ޑޮލަރު ޚަރަދު ކުރުމަށް ނިންމާފައެވެ.
މިއީ ލޯން އެހީގައި ކުރެވޭ ޚަރަދުތަކެއް ނަމަވަސް، ފާއިތުވެދިޔަ ސަރުކާރާއި މިސަރުކާރުގެ 10 އަހަރުގެ ދައުރުގެ ތެރޭގައި ކުރެވޭ 1 ބިލިއަން ޑޮލަރުގެ މި ބޮޑު ހޭދައިން ނެރެވޭނެ އިގްތިސާދީ ނަފާވެރިކަމާމެދު ފުންކޮށް ވިސްނާލުމުން، މި ހޭދަތަކަކީ ގައުމަށް ލިބޭ ފައިދާއަށްވުރެ ގެއްލުން ބޮޑު އިންވެސްޓްމަންޓްތަކެއް ކަމުގައި ގަބޫލު ކުރާން މަޖުބުރު ވެއެވެ.
ސަބަބަކީ، މި ބުރިޖުތަކުން ދަތުރު ފަތުރަށް ފަސޭހަކަން ލިބި، އޭގެ ޒަރީއާއި އިގްތިސާދީ ބައެއް ހަރަކާތްތަކަށް ދިރުން އައި ނަމަވެސް، މިއީ އޭގެ ޒާތުގައި، މި ބޮޑު ހޭދައާއި ގާތްކުރާ ވަރަށްވެސް ދައުލަތަށް އާމްދަނީ ލިއްބައިދޭނޭ އިންވެސްޓްމަންޓް ތަކަކަށް ނުވާތީއެވެ.
އަދި ރައީސް ޔާމިންގެ ދައުރުގައި ބިނާކުރި ސިނަމާލެ ބުރިޖުގެ މެއިންޓަނަންސަށްވެސް އަހަރު 30 މިލިއަން ރުފިޔާ ޚަރަދު ކުރަން ފާއިތުވެދިޔަ ބަޖެޓްތަކުގައި ހިމަނަމުން އައިސްފައިވާއިރު، މި ބިޔަ ބޮޑު އިންވެސްޓްމަންޓްތައް ކޮންމެ ދައުރެއްގައި ސިޔާސީ ވިސްނުންތަކަށް ބަރޯސާކޮށްގެން ކުރުމަކީ ހަގީގަތުގައި އިންގިތިސާދީ ގޮތުން ގައުމަށް ލިބޭ ފައިދާއަށްވުރެ ގެއްލުން ބޮޑެތި ސިޔާސަތުތަކެއް ކަމުގައި ގަބޫލުކުރަން މިއަދު މިވަނީ މަޖުބޫރު ވެފައެވެ.
އެހެންކަމުން، ގައުމުގެ އިގްތިސާދަށް ކުރިއެރުން ގެނެސް، ތަރައްގީއާއި ތަމައްދުނުގެ ރޮގުގައި ކުރިއަރާ، އަދި އާންމު ރައްޔިތުންގެ ތަނަވަސްކަމާމެދު އެއްވެސް ސަރުކާރަކުން ވިސްނާނަމަ ދެމެހެއްޓެވި އިގްތިސާދީ ސިޔާސަތުތައް އެކުލަވާލަން އެބަޖެހެއެވެ. ދައުތަކަށް އާމްދަނީ އިތުރުކުރުމަށްޓަކާ ހަމައެކަނި ވަގުތީ ހައްލުތަކާއިމެދު ވިސްނުމުގެ ބަދަލުގައި، އިގްތިސާދީ އާވިސްނުންތަކާއި އީޖާދުތައް ކުރަން އެބަޖެހެއެވެ. އާ އިގްތިސާދީ ވަސީލަތްތަކުގައި އިންވެސްޓް ކުރަން އެބަޖެހެއެވެ. ސްޓްރެޓީޖިކް އިންވެސްޓްމަންޓްތަކެއް ގާއިމް ކުރެވެން އެބަޖެހެއެވެ.
އެހެން ނޫންނަމަ، ކޮންމެ އަހަރަކުންވެސް އިތުރުވާ ޚަރަދުތައް ފޫބެއްދުމަށް އޮންނާނީ ޓެކްސް ބްރެކެޓް ފުޅާކުރަން ޖެހިފައެވެ. މުޅިގައުމު ޓެކުހަށް ބަރޯސާކޮށް، ގައުމުގެ އިގްތިސާދީ ސިޔާސަތު ވެގެންދާނީ "ވެންމަވަސް ވެނަށް ކާންދިނުން" ކަމުގައެވެ.
