ކުރިއަށް އޮތް 2023ގެ ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރާނެ ކަމުގައި އެޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ޤާސިމް އިބްރާހިމް އަކީ މިހާރު ވެރިކަން ކުރާ ކޯލިޝަންގެ އެންމެ އިސްލީޑަރެވެ. ޤާސިމް މިރޭ ޖޭޕީން ވާދަކުރާނެ ކަމުގެ ޔަގީންކަން ދެއްވާފައިވާއިރު 2023ގައި ވާދަކުރާނެކަން އިއުލާންކުރައްވައި ރައީސް ޞާލިހުވެސް ވަނީ ޤާސިމްއާއި ބައްދަލު ކުރައްވާފައެވެ. މިހާތަނަށް އެބައްދަލުވުމުގެ މާބޮޑު ތަފްސީލެއް ލިބިފައި ނުވެއެވެ. ނަމަވެސް އެބައްދަލުވުމަކީ ރިޔާސީ އިންތިޚާބުގައި ޤާސިމްގެ ތާއީދު ހޯއްދެވުމަށް ރައީސް ޞާލިހު ބޭއްވި ބައްދަލުވުމެއްކަމަށް އެމްޑީޕީގެ ލީޑަރު މުހައްމަދު ނަޝީދުވެސް ވަނީ ވިދާޅުވެފައެވެ.

މިރޭ ޖުމްހޫރީ ޕާޓީގެ ހަރުގޭގައި ވާހަކަ ދައްކަވަމުން ޤާސިމް ވިދާޅުވީ، ޖުމްހޫރީ ޕާޓީން 2023ގެ ރިޔާސީ އިންތިޚާބުގައި ވާދަ ކުރާނެކަމަށެވެ. އެޕާޓީން އިންތިޚާބުގައި ވާދަކުރާނީ ކޮން ގޮތަކަށްތޯ ނިންމާނީ އެޕާޓީގެ ކޮންގްރެސްއިންކަމަށެވެ. ކޮންގްރެސްގައި ޕާޓީން ނިކުންނާނީ ވަކިންތޯ، ނޫންނަމަ ކޯލިޝަނަކާއިއެކުގައިތޯ ނިންމާނެކަމަށެވެ. ނަމަވެސް އިންތިޚާބުގައި ޖުމްހޫރީން ޕާޓީން ވާދަކުރާނެކަމީ ޝައްކެތް އޮތްކަމެއް ނޫންކަމަށް ޤާސިމް ވިދާޅުވިއެވެ.

ޤާސިމް ވިދާޅުވީ މަލްޓިޕާޓީި ނިޒާމުގެ ތެރެއިން މިހާތަނަށް އުފެދުނު ކޮންމެ ވެރިކަމެއްގައިވެސް ޖުމްހޫރީ ޕާޓީން މުހިންމު ދައުރެއް އަދާކުރިކަމަށެެވެ. ކޮންމެ ބަޔަކާއިއެކުވެސް ވެރިކަމަށް އަންނަނީ ބޮޑު ކޯލިޝަނެއް ހަދައި އެގްރީމަންޓުތައްކޮށް އަހުދު ކަށަވަރު ހިފައިގެން ކަމަށެވެ. ނަމަވެސް އެއްވެސް ބަޔަކަށް ވާ އަހުދުތަކަށް އިހުތިރާމް ނުކުރެވޭކަމަށެވެ. މިސަރުކާރުވެސް ހިމެނޭހެން ޤާސިމް ވިދާޅުވީ މިހާތަނަށް ޖޭޕީން ހެދި ކޮންމެ ކޯލިޝަން ވެރިކަމެއްގައި ކަންވީގޮތް ދިވެހި ރައްޔިތުންނަށް ސާފުވާނެކަމަށެވެ.

ވަޢުދުވާއިރު އެކަމެއް ފުއްދަންޖެހޭނެކަން އަބަދުވެސް ހަނދާން ހުންނަންޖެހޭނެ. އެހެން ނުވާކަމަށްވަންޏާ ގޯހެއްނޫންތޯ. މާތްރަސޫލާގެ ހަދީސެއްގައިވެސް އޮވޭ ވަޢުދެއްވެއްޖެނަމަ އެވައުދަކަށް އިހުތިރާމް ކުރުން. އެކަން އެހެންދޭތޯ އެބަ ވިސްނަންޖެހޭ. 2013 ގައި ވާދަކޮށްގެން ކާމިޔާބު ނުވުމުން، އަޅުގަނޑުމެން ނިންމީ އިންތިޚާބުގައި ދެން އެއްވެސް ބަޔަކަށް ތާއީދު ނުކުރަން، ނަމަވެސް އަލުން ކައުންސިލުން ނިންމީ، އެއްބަސްވުންތަކާއިއެކު ޕީޕީއެމްއާއިއެކު ކުރިއަށްދާން. ނަމަވެސް އެވެރިކަމުގައި ކަން ހިނގައިދިޔަ ގޮތް އަޅުގަނޑު ކިޔައި ނުދިނަސް އެގޭނެ. އަދި 2008 ގެ ކަންކަން ވެގެންދިޔަ ގޮތްވެސް ސާފުވާނެ. އަދި މިއަދު ކަން ހިނގާގޮތްވެސް ސާފުވާނެ.

– ޤާސިމް ވިދާޅުވިއެވެ.

ޤާސިމް ވަނީ މިރޭގެ ޖަލްސާގައި ފާޅުކަން ބޮޑުކޮށް ހިންގަމުންދާ ފާޙިޝް އަމަލލުތަކަށް ސަރުކާރުން އެކަށީގެންވާ އިޖާބައެއް ނުދޭތީ ވަރަށް ބޮޑަށް ފާޑުވިދާޅުވެފައެވެ. އަދި މިކަމުގައި އެންމެ ބޮޑަށް ޤާސިމްގެ ނުރުހުން އަމާޒުވީ މަޖިލިސް ރައީސް މުހައްމަދު ނަޝީދު ދައްކަވަމުންދާ ވާހަކަތަށެވެ. މަޖިލީހުގެ މެމްބަރަކު ފުލުހަށް ހާޒިރު ކުރާނަމަ ރައީސް ނަޝީދަށް އެގެންޖެހޭކަމަށް ވިދާޅުވެ ދެއްކެވި ވާހަތަކަށްވެސް ޤާސިމްވަނީ ރައްދު ދެއްވާފައެވެ. ޤާސިމް ވިދާޅުވީ އެއްވެސް މީހަކު ކުށެއްކޮށްފިނަމަ އެކަން ބެލުމުގައި ތަފާތު ކުރުމެއްނެތި ބެލެންޖެހޭނެކަމަށެވެ.

ޤާސިމްވަނީ ކޯވިޑްގައި ރައީސް ޞާލިހު ރާއްޖޭގެ އިޤްތިޞާދީ ކަންކަން މެނޭޖުރި ގޮތަށް މިރޭގެ ޖަލްސާގައި ތަޢުރީފްވެސް ކުރައްވާފައެވެ. އެގޮތުން މިއަދު ލަންކާ އޮތް ހާލަތަށް ރާއްޖެ ނުދިޔައީ ރައީސް ޞާލިހު އެޅުއްވި ހަރުދަނާ ފިޔަވަޅުތަކުގެ ސަބަބުންކަމަށް ޤާސިމް ވަނީ ވިދާޅުވެފައެވެ.