ރާއްޖޭގައި ފާޙިޝް ޢަމަލުތައް އިންތިހާއަށް އިތުރުވެ، ނުބައި މިސްރާބަކަށް ޤައުމުދާއިރު، ދައުލަތުން މިކަމުގައި އަދާކުރައްވަންޖެހޭ ޒިންމާ އަދާނުކޮށް ހަމަހިމޭނުން އޮތްކަމީ ނުހަނު ކަންބޮޑުވެ ވަޑައިގަންނަވާ ކަމެއްކަމަށް ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

"ތައްޔާރު" ނަމުގައި ޖުމްހޫރީ ޕާޓީގެ ހަރުގޭގައި މިރޭ ބޭއްވި ޖަލްސާގައި ވާހަކަ ދައްކަވަމުން ޤާސިމް ވިދާޅުވީ ރާއްޖޭގައި އިންތިހާއަށް ފާޙިޝް ޢަމަލުތައް އިތުރުވެ، މުޅި ސޯޝަލް މީޑިއާގައި ދައުރުވަމުންދާއިރު، އެކަމުގައި ދައުލަތުން ޢަމަލު ކުރަމުންދާ ގޮތް ރައްޔިތުންނަށް ވަރަށް ސާފުކޮށް ފެންކަމަށެވެ. ދައުލަތުގެ ކޮންމެ މަޤާމެއްގައި ހުރި މީހަކީ ބޮޑު ހުވައެއް ކޮށްގެން ހުންނެވި ބޭފުޅަކަށްވާއިރު މިކަމުން ރެކެވޭނެ ގޮތެއް ނެތްކަމަށް ޤާސިމް ވިދާޅުވިއެވެ.

ޤާސިމް ވަނީ މިމައްސަލަތައް ބަލަން ކުރާ މަސައްކަތަށް ހުރަސް އެޅެގޮތަށް މަޖިލިސް ރައީސް ދައްކަވަމުންދާ ވާހަކަތަަށް ރައްދު ދެއްވާފައެވެ. ޤާސިމް ވިދާޅުވީ މަޖިލީހުގެ މެމްބަރަކަސް އެހެން މެމްބަރަކަސް ޤާނޫނީ ކުށެއްކޮށްފިނަމަ އެމީހަކު ހާޒިކޮށް ތަހުގީގް ކުރެވެން ޖެހޭކަމަށެވެ.

މިއަދު ހިނގަމުންދާ މުންކަރާތަކާއި، ނުބައި އަމަލުތައް ހިންގަމުންދާއިރު ދައުލަތުން ޢަމަލުކުރަމުންދާގޮތް އެބަފެނޭ. މިކަމާއި ދައްކާނެ އެއްވެސް ވާހަކައެއް ނެތް. ހުރިހާ ކަމެއް ސޯޝަލް މީޑިއާއިން ދަނީ ފެންނަމުން. މިއަދު ފެންނަނީ ވަކި ބަޔަކު ފާހިޝްއަމަލު ކުރިޔަސް އެކަމެއް ނުބެލޭތަން. މަޖިލީހުގެ ރައީސް އެބަބުނޭ ހާޒިރު ނުކުރެވޭނެއޭ. މިއީ ހުވާކޮގެން ހުރި މީހަކަށް ބުނެވޭނެ އެއްޗެއްތޯ.

– ޤާސިމް ވިދާޅުވިއެވެ.

ޤާސިމް ވިދާޅުވީ ދައުލަތުގެ ޒިންމާ އަދާކުރުމުގައި ވެރިން ޖަވާބުދާރީ ވާންޖެހޭކަމަށެވެ. މިއަދު ޤައުމުގެ މިސްރާބު ދާގޮތުން މިފެންނަނީ ވަރަށް ނުރައްކާތެރި މިސްރާބަކަށް ޤައުމުދާ ތަންކަމަށް ޤާސިމް ވިދާޅުވިއެވެ. މިކަންކަމާއި ބިރުވެތިވެ ދުރާލައި މިކަމަށް ފިޔަވަޅު ނޭޅިއްޖެނަމަ މާޒީގައި އެހެން ޤައުމުތަކަށް އައުފަދަ ބޮޑެތި ކޯފާތައް މަތިން ހަނދާންކޮށް އެކަންކަމަށް ބިރުވެތިވާންޖެހޭކަމަށް ޤާސިމް ވިދާޅުވިއެވެ.

ދައުލަތުގެ ޒިންމާ އަދާކުރައްވަން ތިއްބެވި އެއްވެސް ވެރިއަކު، ފަސްޖެހިގެން ނުވާނެ. މިއަދު މިދަނީ ކޮންފަދަ ނުބައި މިސްރާބަކަށްތޯ. ބޮޑު ކޯފާއަކަށް އަޅުގަނޑުމެން ބިރުވެތިވާންޖެހޭ. މިކަންކަން މިދަނީ ކޮން ހިސާބަކުންކަން އަޅުގަނޑުމެން ވިސްނަންޖެހޭ.

– ޤާސިމް ވިދާޅުވިއެވެ.

ޤާސިމް ވަނީ މިކަންކަން ބެލުމަށް ފުލުނުް އަދާކުރަންޖެހޭ ޒިންމާ އަދާކުުރުމުގައި ވަކި މީހެއްގެ މޫނަކަށް ކަދުރާއަކަށް ބެލުމެއްނެތި ފިޔަވަޅު އެޅުމަށް ގޮވާލާފައެވެ. އަދި މިކަމުގައި ފުލުހުން ކުރަންޖެހޭ ކަމެއް ކުރުމުގައި ވަކި މީހަކު ބުނާ އެއްޗަކަށް ނުބަލައި އަޅަންޖެހޭ ފިޔަވަޅު އެޅުމަށް ޤާސިމް ވަނީ ގޮވާލާފައެވެ.