މިސަރުކާރު އޮތީ ބޮއްސުންލާފައި ކަމަށާއި، ކުރިއަށް އޮތް 2023 ވަނަ އަހަރު ރާއްޖޭގެ ވެރިކަން ކުރާނީ ޖުމްހޫރީ ޕާޓީންކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ އެޑްވައިޒާ ރިޔާޒު ރަޝީދު ވިދާޅުވެއްޖެއެވެ.
"ތައްޔާރު" ނަމުގައި ޖުމްހޫރީ ޕާޓީން މިރޭ އެޕާޓީގެ ހަރުގޭގައި ބާއްވާ ޖަލްސާގައި ވާހަކަ ދައްކަވަމުން ރިޔާޒު ވިދާޅުވީ އެޕާޓީއަކީ ރާއްޖޭގެ މަސްލަހަތާއި، ރައްޔިތުންގެ މަސްލަހަތަށް އަބަދުވެސް އިސްކަންދޭނެ ޕާޓީއެއް ކަމަށެވެ. މިހާރު އޮތް ސަރުކާރުގައިވެސް ވަރަށް ބޮޑެތި ގޯސްތައް ހުރިކަމަށް އޭނާ ވިދާޅުވިއެވެ.
ނަމަވެސް ޖުމްހޫރީ ޕާޓީއަކީ މަގުމަތިން ވެރިކަން ވައްޓާލައި ރައްޔިތުން 5 އަހަރަށް އިންތިޚާބުކުރި ވެރިމީހާ ވެރިކަމުން ވައްޓާލަން ހިތްވަރުދޭނެ ޕާޓީއެއް ނޫންކަމަށެވެ. ޤައުމުގައި ހުރި ނުރަނގަޅު ކަންކަން އިސްލާހުކޮށް ރައްޔިތުން އެދޭފަދަ ވެރިކަމެއް ގާއިމް ކުރާނީ ޖުމްހޫރީ ޕާޓީންކަމަށް އޭނާ ވިދާޅުވިއެވެ.
މިޖަލްސާގައި ޤާސިމަށް ވަރަށް ބޮޑަށް ތަޢުރީފް ކުރައްވައި ރިޔާޒު ވިދާޅުވީ ޤާސިމަކީ މިރާއްޖެއަށް އައިސްފައިވާ ހުރިހާހާ ކުރިއެރުމެއްގެ ހިއްސާ އޮތް ބޭފުޅެއްކަމަށެވެ. އޭގެ ނަތީޖާއަކީ މިރާއްޖޭގެ ވެރިކަމަށް މިހާތަނަށް އައި އެއްވެސް ބަޔަކަށް ޖޭޕީގެ ލީޑަރު ޤާސިމްގެ އެހީއާއި ނުލައި ވެރިކަމަށް އާދެވިފައި ނުވާކަމަށެވެ. ކުރިއަށް އޮތް ރިޔާސީ އިންތިޚާބުގައި ޖޭޕީގެ އަމާޒަކީ ޖުމްހޫރީ ޕާޓީގެ ތަސައްވަރާއިއެކު ޤައުމުގެ ވެރިކަން ކުރުންކަމަށާއި، އެކަން ކުރުމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ފަހަރުގައި ޖުމްހޫރީ ޕާޓީގެ އެންމެ މެމްބަރުން ތިއްބަވާނެކަމަށް ރިޔާޒު ވިދާޅުވިއެވެ.
ރިޔާޒު ވިދާޅުވީ ޖުމްހޫރީ ޕާޓީން މަސައްކަތް ކުރާނީ ސިޔާސީ މައިދާނުގައި ކަންކަން ހިނގާގޮތް ރަނގަޅަށް އެގިގެންކަމަށެވެ. މިއަދުގެ މަސްރަހު އޮތްގޮތުން ސިޔާސީ ގޮތުންވެސް އަދި އެނޫން ގޮތްގޮތުންވެސް ރާއްޖެއަށް އޮތް އެންމެ ރަނގަޅު ޗޮއިސްއަކީ ޖުމްހޫރީ ޕާޓީކަމަށް ރިޔާޒު ވިދާޅުވިއެވެ.