ރައްޔިތުން ރައްކާތެރިކޮށް އަމާން ވެއްޓެއް ޤާއިމް ކުރުމަށް ހުވާ ކޮށްގެން ތިބި މީހުންވެސް ޒިންމާ ނަގަންޖެހޭ ކަމުގައި އެމްއާރްއެމްގެ ނައިބު ރައީސާ އައިމިނަތު ނާދިރާ ވިދާޅުވެއްޖެއެވެ.
ނާދިރާ މިހެން ވިދާޅުވީ ބައިނަލްއަޤްވާމީ ޔޯގާ ދުވަސް ފާހަގަކުރުމަށް އިއްޔެ ގަލޮޅު ރަސްމީ ދަނޑުގައި ބޭއްވި ޙަރަކާތަށް ހުރަސްއަޅައި ހަމަނުޖެހުން ހިންގިއިރު ފުލުހުން އެންމެ އެކަށީގެންވާ ފިޔަވަޅު އަޅާފައި ނުވާތީ ގިނަ ބައެއްގެ ފާޑުކިޔުން ފުލުހުންނަށް އަމާޒުވެފައި ވަނިކޮށެވެ.
ނާދިރާ ވިދާޅުވީ ޤައުމުގެ އަމާންކަން ގާއިމް ކުރުމުގައި ހަމަނުޖެހުމާއި، ކުށްތަށް ކުރާ ފަރާތްތަކުން އެކަންކަމުން ދުރު ކުރުމުގައި އެކަންކަމުގެ ހުވާ ކުރައްވައިގެން މަސްއޫލިއްޔަތު އަދާކުރައްވާ ބޭފުޅުންގެ ޒިންމާއެއްވެސް އޮންނަ ކަމަށެވެ. ބޭރުގެ ގިނަ އަދަދެއްގެ ޑިޕްލަމެޓުންވެސް ބައިވެރިވި މި ހަރަކާތަށް އާންމުންގެ ތެރެއިން ގިނަ ބަޔަކު ހުރަސް އެޅުމާއި ގުޅިގެން މިހަރަކާތް ވަނީ ކުރިއަށް ނުގެންދެވިފައެވެ.
ރައްޔިތުން ރައްކާތެރިކޮށް އަމާން ވެއްޓެއް ޤާއިމް ކުރުމަށް ހުވާ ކޮށްގެން ތިބި މީހުންވެސް ޒިންމާ ނަގަންޖެހޭ. ބިރު ދައްކައިގެން ގޮށް މުށުގެ ބާރުން ކަންކަން ކުރެވިގެން ނުވާނެ. މިއީ ކޮންމެ ދިވެއްސެއްގެވެސް ޤައުމު. ބަދުނާމުވަނީވެސް ހުރިހާ ދިވެހިން. ކަން ކުރާ މީހުން އެކަންޏެއް ނޫން.
– ނާދިރާ ވިދާޅުވިއެވެ.
ގަލޮޅު ރަސްމީ ދަނޑަކީ ސެކިއުރިޓީ ބަލަހައްޓަން ފަސޭހަ ތަނަކަށް ވާއިރު، އެތަނުގައި ބޭއްވި އިވެންޓަކަށް ދުރާލައި ޕްލޭންކުރެވި އެކަމަށް ހުރަސް އަޅަން ކުރި މަސައްކަތް ފުލުހުން ނުހުއްޓުވުމަކީ ގިނަބައެއްގެ ފާޑުކިޔުން އަމާޒުވި ކަމެކެވެ. ޚާއްސަކޮށް ބޭރުގެ ޑިޕްލަމެޓުން ތިބި ތަނަކަށް މިގޮތަށް މީހުން ވަދެ ހަމަނެހުން ހިންގުމަށް ޖާގަ ދެވުމަކީ ސަލާމަތީ ކަންކަން އެންމެ ރަނގަޅަށް ނުބަލާކަމުގެ ހެއްކެއްކަމަށް ގިނަ ބަޔަކު ދެކެއެވެ.
މި މައްސަލައާއި ގުޅިގެން ފުލުހުން ވަނީ މުޒާހަރާގެ ތެރެއިން 6 ފިރިހެނަކު ހައްޔަރުކޮށްފައެވެ. އަދި މި މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށްވެސް ފުލުހުން ވަނީ ވިދާޅުވެފައެވެ. އަދި މިޙަރަކާތަށް ހުރަސްއަޅައި ހިންގި ހަމަނުޖެހުން ކޮންޓްރޯލް ކުރުމަށްޓަކައި ފުލުހުންގެ މުއައްސަސާއިން ހަރަކާތްތެރިވިގޮތުގެ އިންޓާނަލް ރިވިއުއެއް ހެދުމަށްވެސް ފުލުހުން ވަނީ ނިންމާފައެވެ.
