ބައިނަލްއަޤްވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ޙަރަކާތަށް ހުރަސްއަޅައި ހަމަނުޖެހުން ހިންގާފައިވަނީ ދިވެހި ސަރުކާރުންކަމަށް އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް ވިދާޅުވީ އެއްވެސް ހަރަކާތަކަށް ހުރަސް އަޅައި ހަމަނުޖެހުން ހިންގުމަކީ ޕީޕީއެމުން ކުރާނެ ކަމެއް ނޫންކަމަށެވެ. ޕީޕީއެމް، ޕީއެންސީން ހިންގާ ހަރަކާތްތަކަކީ ދުރާލައި ރާވައިގެން ހިންގާ ހަރަކަތްތަކެއް ކަމަށް އޭނާ ވިދާޅުވިއެވެ.
އަޅުގަނޑުމެން މިތިބީ މިކަމުގައި ފުލުހުން ކުރާ ތަހުގީގަށް ފުރިހަމަ އެއްބާރުލުން ދޭން. އަޅުގަނޑުމެންނަކީ ދުރާލައި ރާވައިގެން ކަންކަން ހިންގާ ބައެއް. ހަމަނުޖެހުން ހިންގުމާއި، މަސްލަހަތު ނަގާލުމަކީ ޕީޕީއެމްއިން ކުރާނެ ކަމެއްނޫން. މިކަމަކީ ސީދާ ސަރުކާރުން ރާވައިގެން ހިންގި ކަމެއް.
– އަދުރޭ ވިދާޅުވިއެވެ.
އަދުރޭ ވިދާޅުވީ ގަލޮޅުދަނޑުގައި ހިންގި ހަމަނުޖެހުމަކީ ވަރަށް ރަނގަޅަށް ބަލަންޖެހޭ މައްސަލައެއް ކަމަށެވެ. ގަލޮޅު ދަނޑަކީ ވަށައިގެން ގޭޓުހުރި ސަލާމަތީ ކަންކަން ފަސޭހައިން ބެލެހެއްޓޭ ތަނަކަށްވާއިރު، މިތަނަށް އާންމުންގެ ބަޔަކު ވަދެ ހަމަނެޖެހުން ހިންގުމަކީ ސަރުކާރުން ޖާގަ ނުދޭނަމަ ކުރެވޭނެ ކަމެއް ނޫންކަމަށް އަދުރޭ ވިދާޅުވިއެވެ.
އަޅުގަނޑުމެން އެބަތިބެން މިއޮފީހުން ނުނިކުމެވިފަ، ފުލުހުން ގޭޓު ބަންދުކުރީމާ، ދެން ކީއްވެތޯ ގަލޮޅު ދަނޑުގެ ސެކިއުރިޓީ ނުބެލެހެއްޓެވެންވީ. މިކަމުގައި ހޯމް މިނިސްޓަރާއި، ރައީސް ޞާލިހާއި މިސަރުކާރުގެ ބައިވެރިވުން އޮތް މިންވަރެއް އެބަ ބަލަންޖެހޭ.
– އަދުރޭ ވިދާޅުވިއެވެ.
މިހަމަނުޖެހުމާއި ގުޅިގެން ފުލުހުން ނެރުނު ނޫސްބަޔާނެއްގައި ބުނީ، އެ ޖަރީމާ ހިންގުމުގައި ބައިވެރިވި މީހުންގެ މައްސަލަތައް ތަހުގީގުކޮށް، ގާނޫނީ ފިޔަވަޅު އެޅުމަށް ކުރަންޖެހޭ މަސައްކަތްތައް ފުލުހުންގެ އިދާރާގެ އެކި ޑިޕާޓްމަންޓްތައް ގުޅިގެން ކުރިއަށް ގެންދާ ކަމަށެވެ. ފުލުހުން ބުނީ، ޔޯގާގެ ހަރަކާތުގައި ބައިވެރިވި ބޭރުގެ ގައުމުތަކުގެ ސަފީރުންނާއި ޑިޕްލޮމެޓުންނާއި އާންމުންނާ ދެކޮޅަށް، ބިރުވެރިކަން އުފެދޭ ގޮތަށް ގަލޮޅު ދަނޑަށް ވަދެ، "ބައެއް މީހުންނަށް ހަމަލަދީ، ތަކެއްޗަށް ގެއްލުން ދީފައިވާ މައްސަލަ" ސީރިއަސް ކަމެއްގެ ގޮތުގައި ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުން އަންނަ ކަމަށެވެ.
ފުލުހުން ބުނީ، ޔޯގާގެ ހަރަކާތުގެ ހަމަނުޖެހުން ހިނގުމަށް މެދުވެރިވި ސަބަބުތައް ބަލައި، ފުލުހުން އިޖާބަދިން ގޮތުގެ "އިންޓާނަލް ރިވިއުއެއް" ހަދާނެ ކަމުގެ ޔަގީންކަން ދޭ ކަމަށެވެ. މިމައްސަލާގައި މިހާތަނަށް 6 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
