ހޮންގ ކޮންގ އެއްމެ މަޝްހޫރު އެއް ލޭންޑް މާރކުގެ ގޮތުގައި ހުރި މަޝްހޫރު ފްލޯޓިން ރެސްޓޯރަންޓް އަޑިއަށް ހިގައްޖެއެވެ.
މި ރެސްޓޯރަންޓް އަޑިއަށް ގޮސްފައިވަނީ، ރެސްޓޯރަން 50 އަހަރު ވަންދެން ހިންގަމުން އައި ހާބަރު ކައިރިން ކަފުޖަހައިގެން އެހެން ސަރަހައްދަކަށް ބަދަލު ކުރަމުން ދަނިކޮށެވެ.
ފްލޯޓިން ރެސްޓޯރަންޓް ހިންގަމުންއައި ކުންފުނިން ހާމަ ކޮށްފައިވާ ގޮތުގައި ރެސްޓޯރަންޓް އަރި އަޅާލާފައިވަނީ، އެހެން ސަރަހައްދަކަށް ގެންދިއުމަށްޓަކާ ސައުތު ޗައިނާ ކަނޑުގައި ދަތުރު ކުރަމުން ދަނިކޮށް ކަމުގައެވެ. މި ރެސްޓޯރަންޓް ގެންދިއުމަށް ހަމަޖެހިފައިވާ ތަނެއް މިކުންފުނިން ހާމަ ކޮށްފައެއް ނުވެއެވެ.
ރެސްޓޯރަންޓްގެ ވެރިފަރާތް ކަމުގައިވާ އަބަރޑީން ރެސްޓޯރަންޓް އެންޓަރޕްރައިސެސް ކުންފުނިން ބުނެފައިވަނީ، "މިއީ ވަރަށް ހިތާމަވެރި ހާދިސާއެއް ކަމަށާއި" އެހެންނަަމަވެސް އެއްވެސް ފަޅުވެރިއަކަށް މިހާދިސާގައި އަނިޔާ ވެފައި ނުވާކަމުގައެވެ.
މި ރެސްޓޯރަންޓު ބަންދު ކޮށްފައިވަނީ 2020ވަނަ އަަހަރުގެ މާރޗްމަހު، ކޯވިޑްގެ އާލަމީ ވަބާ ދުނިޔޭގައި ފެތުރެން ފެށުމާއި ގުޅިގެންނެވެ.
މި ރެސްޓޯރަންޓް ހިންގާފައިވާ ދިގު މުއްދަތުގައި، ރެސްޓޯރަންޓުން ފޯރުކޮށްދީފައިވާ ސައުތު ޗައިނާގެ މީރު ކާނާގެ ރަހަތައް 3 މިލިއަން ގެސްޓުން ތަޖުރިބާ ކޮށްފައިވާކަމަށް އަންދާޒާ ކުރެވެއެވެ. މި ގެސްޓުންގެ ތެރޭގައި އިނގިރޭސި ރާނީގެ އިތުރުން މަޝްހޫރު ފިލްމީ ތަރި ޓޮމް ކުރޫޒްއާއި އަދި މަހުޖަނު ރިޗަރޑް ބްރޭންސަންވެސް ހިމެނެއެވެ.
މި ފްލޯޓިންގެ ރެސްޓޯރަންޓް ވަނީ ބައެއް މަޝްހޫރު ފިލްމްތަކުގައިވެސް ބޭނުން ކޮށްފައެވެ. އޭގެ ތެރޭގައި ބޮންޑްގެ ފިލްމެއްވެސް ހިމެނެއެވެ. އެހެންނަމަވެސް ރެސްޓޯރަންޓް ހިންގަން ދަތިވެ، ވިޔަފާރި ހުއްޓުމަކަށް އައިސްފައިވަނީ ކޯވިޑް ކާރިސާގެ ސަބަބުން ކަސްޓަމަރުން ނުލިބުމުގެ ސަބަބުންނެވެ.
ރެސްޓޯރަންޓްގެ ވެރިފަރާތުން ހާމަ ކޮށްފައިވާ ގޮތުގައި ސައުތު ޗައިނާ ކަނޑު ހުރަސްކޮށް ކުރަން އޮތް މި ދަތުރުގެ ކުރިން މެރިން އިންޖިނިރަރަކު މެދުވެރިކޮށް ވަނީ ހުރިހާ އިސްޕެންޝަނެއްވެސް ހަދާފައެވެ. އަދި ހޯދަންޖެހޭ ހުރިހާ ހުއްދަތަކެއްވެސް ހޯދާފައި ވާކަމަށްވެސް އެފަރާތުން ހާމަ ކޮށްފައި ވެއެވެ.
މި ރެސްޓޯރަން ޚާއްސަ ލޮކޭޝަނެއްގައި ބޭއްވުމަށް ހަމަޖެހިފައިވަނީ، ރެސްޓޯރަނޓް ހިންގާނެ އާ އޮޕަރޭޓަރަކު ލިބެން ދެނެވެ.
އެހެންނަމަވެސް އާދީއްދަ ދުވަހު ރެސްޓޯރަންޓް އަޑިއަށް ގޮސްފައިވަނީ ޕަރަސެލް އައިލޭންޑް ކައިރިން "ދަތުރު ހާލަތު ގޯސްވެ" އަދި ދިޔަވާން ފެށުމުގެ ސަބަބުން ކަމުގައި އަބަރޑީން ރެސްޓޯރަންޓް އެންޓަރޕްރައިސެސްއިން ބުނެފައި ވެއެވެ.
"އެ ސަރަހައްދުގައި ކަނޑުގެ ފުންމިން ހުރީ 1،000 މީޓަރުގައި. އެހެންނަކަމުން ސަލާމަތް ކުރުމަށްވެސް ކުރަންޖެހުނު މަސައްކަތްތައް ވެގެން ދިޔައީ އިންތިހާއަށް ދަތި ކަމަކަށް،" ކުންފުނިން އިތުރަށް ހާމަ ކޮށްފައި ވެއެވެ.
މި ރެސްޓޯރަން އޮޕަރޭޓް ކުރަމުން އައި ކުންފުނި ކަމުގައިވާ މެލްކޯ އިންޓަރނޭޝަނަލް ޑިވެލޮޕްމަންޓުން ފާއިތުވެދިޔަ މަހު ބުނެފައިވަނީ، 2013 އިން ފެށިގެން ރެސްޓޯރަންޓަށް ފައިދާ ވެފައި ނުވާކަމަށާއި، ހިންގަމުން އައިސްފައިވަނީ ބޮޑު ގެއްލުމެއްގައި ކަމުގައެވެ.
