2021 ވަނަ އަހަރުގެ ޑިސެމްބަރު މަހުގެ ރިލީޒް ކުރި ފިލްމް "ޕުޝްޕާ" އަކީ މި އަހަރު ފެށުން އިރުވެސް އެންމެ ކާމިޔާބު އެއް ފިލްމެވެ.
ސައުތުގެ މި ފިލްމުގެ ލީޑުން ފެނިގެން ގޮސްފައިވަނީ އައްލޫ އަރުޖުން އާއި ރަޝްމީކާ މަންދަނާއެވެ. މި ފިލްމަކީ ސުކުމާރު ލިޔެ، ޑައިރެކްޓްކުރި އެކްޝަން ޑްރާމާއެކެވެ.
ފިލްމަކީ ވަރަށް ކާމިޔާބު ފިލްމެކެވެ. ބޮކްސް އޮފީހުގައި މި ފިލްމަށް ބޮޑު ކާމިޔާބެއް ލިބުނު އިރު ބެލުންތެރިނަށް ފިލްމް ވަރަށް ބޮޑަށް ކަމުދިޔައެވެ. ގިނަ ބަސްތަކުން ރިލީޒްކުރި މި ފިލްމުގެ ދެވަނަ ބައެއް ހެދުމުގެ މަސައްކަތް ކުރާނެކަމަށް ފިލްމުގެ ޕްރޮޑިއުސަރުން ވަނީ ބުނެފައެވެ.
ޚަބަރުތައް ބުނާގޮތުގައި މި އަހަރުގެ ކުރީކޮޅު ޝޫޓިންގ ފަށަން ޕްލޭންކުރި ފިލްމުގެ މަސައްކަތް ފަސްކުރީ ސްކްރިޕްޓައް މުހިންމު ބަދަލުތަކެއް ގެނައުމުގެ ގޮތުން ކަމަށެވެ. އެހެންވެ އިތުރަށް ފިލްމު ރަނގަޅުކޮށް "ޕުޝްޕާ"ގެ ދެވަނަ ބައިގެ ޝޫޓިން "ޕުޝްޕާ: ދަ ރޫލް" ގެ ޝޫޓިން އަންނަމަހުގައި ފަށާނެ ކަމަށް ޚަބަރުތައް ބުނެވެ.
މި ފިލްމުން ވެސް ކުރީގެ ފިލްމުގެ ލީޑުން ފެނުނު ތަރިން ފެންނާނެ ކަމަށާއި އަދި ފިލްމު އިތުރަށް ވަރުގަދަ ކުރުމަށް އާތަރިން ލައިފާވާ ކަަމަށް ޚަބަރުތައް ބުނެއެވެ.
"ޕުޝްޕާ: ދަ ރޫލް" ރިލީޒްކުރާނެ ތާރީހެއް އަދި ނޭނގެއެވެ. ނަމަވެސް މިފިލްމަކީ ފުރަތަމަ ފިލްމަށް ވުރެވެސް ފުރިހަމަ ފިލްމަކަށް ހެދޭތޯ ފިލްމުގެ ޓީމުން މަސައްކަތް ކުރާނެ ކަަމަށް ބެލެވެއެވެ.
