އިންޓަ ކޮންޓިނެންޝިއަލް ޕްލޭއޮފްްގައި ރޭ ނިއު ޒީލެންޑް 1-0 އިން ބަލިކޮށް ކޮސްޓަ ރިކާ އިން މި އަހަރު ފަހުކޮޅު ގަތަރުގައި ބާއްވާ ފީފާ ވޯލްޑް ކަޕްގެ ފަހު ޖާގަ ހޯދައިފިއެވެ.
ނޮވެމްބަރު މަހު ފަށާ ވޯލްޑް ކަޕްގައި ކޮސްޓަ ރިކާ ހިމެނެނީ ޖަރުމަނާއި ސްޕެއިން އަދި ޖަޕާނާ އެއް ގްރޫޕެއްގައެވެ. ތިންވަނަ ފަހަރަށް ވޯލްޑް ކަޕުން ޖާގަ ހޯދަން ނުކުތް ނިއުޒިލެންޑާ ދެކޮޅަށް ކޮސްޓަ ރިކާ އިން މެޗުގައި ޖެހި ހަމައެކަނި ލަނޑު މެޗުގެ ތިންވަނަ މިނިޓުގައި ޖަހައި ދިނީ ކުރިން އާސެނަލް އަށް ކުޅުނު ފޯވާޑް ޖޮއެލް ކޭމްބެލްއެވެ.
ކޮސްޓަ ރިކާއާ ދެކޮޅަށް ކުޅެ ނިއުޒިލެންޑުން މެޗު ނިންމާލީ 10 ކުޅުންތެރިންނާ އެކުއެވެ. އެއީ ބަދަލު ކުޅުންތެރިއެއް ގޮތުގައި ކުޅެން އެރި ކޮސްޓާ ބަރްބަރޯސެސް އަށް ވީއޭއާރުގެ އެހީގައި ރެފްރީ، 69 ވަނަ މިނިޓުގައި ރަތް ކާޑު ދެއްކުމުންނެވެ.
ވޯލްޑް ކަޕްގެ ޖާގައެއް ނުލިބުމުން ވަރަށް ބޮޑަށް މާޔޫސްވެފައިވާ ކަމަށް މެޗަށް ފަހު ނިއު ޒީލެންޑްގެ ކޯޗު ޑެނީ ހޭއި ވަނީ ބުނެފައެވެ. މި މެޗުގައި ނިއު ޒީލެންޑުން ޖެހި ގޯލު ބަލައިނުގަންނަން ރެފްރީން ނިންމާފައިވާތީ އެކަމަށް، ހޭއި ވަނީ އެ ކަމަށް ވަރަށް ބޮޑަށް ފާޑުކިޔައިފައެވެ.
ކޮސްޓަ ރިކާ ވޯލްޑް ކަޕުގައި އެންމެ ބޮޑު ކާމިޔާބެއް ހޯދީ 2014 ވަނަ އަހަރެވެ. އެފަހަރު އެ ގައުމު ވަނީ ގުރޫޕް ސްޓޭޖުގައި އިންގްލެންޑާއި އިޓަލީ ކަޓުވާލައި، އުރުގުއޭ ފަހަތަށް ޖައްސާލައި ގުރޫޕްގެ އެއްވަނަ ހޯދައިގެން ނޮކައުޓް ބުރަށް ދަތުރު ކޮށްފަ އެވެ. ނޮކައުޓް ފުރަތަމަ ބުރުގައި ގްރީސް އަތުން މޮޅުވި ނަމަވެސް މުބާރާތުން ކެޓީ ކުއާޓާ ފައިނަލުގައި ނެދަލެންޑްސް އަތުން ބަލިވެގެންނެވެ.
ގަތަރުގައި މި އަހަރު ފަހުކޮޅު ވޯލްޑް ކަޕް ބާއްވާއިރު، މުބާރާތް ފަށާނީ ނޮވެމްބަރު 21 ވަނަ ދުވަހުއެވެ. މުބާރާތުގެ ފައިނަލް މެޗު ކުޅޭނީ ޑިސެމްބަރު 18 ގައެވެ.
