ވަޒީރުންގެ މަޖިލީހުގެ ތިން ވަޒީރެއްގެ ކާރުކޮޅުގައި "އިންޑިއާ އައުޓް" ޖަހައިފިއެވެ.
އިދިކޮޅު ޕީޕީއެމުން ހިންގާ "އިންޑިއާ އައުޓް" ތިން ވަޒީރެއްގެ ކާރުކޮޅުގައި ސްޕްރޭކުރި މައްސަލަ ފުލުހުން ތަހުގީގު ކުރަން ފަށައިފައެވެ. "އިންޑިއާ އައުޓް" ޖަހާފައި ވަނީ އިކޮނޮމިކް މިނިސްޓަރު ފައްޔާޒް އިސްމާއިލް އާއި އެޑިއުކޭޝަން މިނިސްޓަރު ޑރ.އައިޝަތު އަލީގެ އިތުރުން ފިޝަރީޒް މިނިސްޓަރު ޑރ.ހުސެއިން ރަޝީދު ހަސަންގެ ދަތުރުތައް ކުރެއްވުމަށް ސަރުކާރުން ހަމަޖައްސާފައިވާ ކާރުތަކުގައެވެ.
މި މައްސަލަ ރިޕޯޓްކުރީ އިއްޔެ ހެނދުނު 7:30 ހާއިރު ކަމަށް ފުލުހުން ވަނީ ބުނެފައެވެ. ފުލުހުން ބުނި ގޮތުގައި ރައްޔިތުންގެ މަޖިލީހުގެ އިދާރާގެ ކުރިމަތީގައި އޮންނަ ޕާކިން ޒޯނުގައި ޕާކުކޮށްފައި އޮތް ކާރަކަށް ވެސް ރޭ ވަނީ ގެއްލުން ދީފައެވެ. ހަތަރު ކާރަށް ގެއްލުން ދީފައިވާ ކަމަށް ބުންޏަސް ތަފްސީލެއް ފުލުހުން ނުދެއެވެ.
ސޯޝަލް މީޑިއާގައި އާއްމުވި ފޮޓޯތަކުން ފެންނަ ގޮތުގައި، ވަޒީރުންގެ ކާރުކޮޅުތަކުގެ ކުރީގައި ވަނީ ނޫ ކުލައިގެ ސްޕްރޭއިން އިންޑިއާ އައުޓް ޖަަހައިފަ ވެ. ވެލާނާގެ އާއި ރައްޔިތުންގެ މަޖިލީހުގެ އިދާރާ ހުންނަ ސަރަހައްދަކީ ހައި ސެކިއުރިޓީ ޒޯނެކެވެ. ގިނަ އަދަދެއްގެ ސީސީޓީވީ ކެމެރާ ހުރެއެވެ.
ޤައުމީ ސަލާމާތާބެހޭ މަޖިލީހުން ނިންމި ނިންމުމާއި ގުޅިގެން ރައީސުލްޖުމްހޫރިއްޔާ ވަނީ އިންޑިއާއި ދެކޮޅަށް ހިންގާ ހަރަކާތްތައް ހުއްޓުވުމަށް ކަނޑައަޅައި، އެކަން ތަންފީޛް ކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގަވާފައެވެ. އަދި އެމަނިކުފާނު ވަނީ ރާއްޖޭގައި އިންޑިއާ އައުޓް ހަރަކާތް ހުއްޓުވުމަށް ޤަރާރެއްވެސް ނެރުއްވާފައެވެ.
ޤަރާރަށްފަހު ރާއްޖޭގައި އިންޑިއާ އައުޓްގެ ހަރަކާތް މާބޮޑަށް ދަނީ ހިންގަމުންނެވެ. އިދިކޮޅުން ބުނަމުންދަނީ ޤާނޫނު އަސާސީން ލިބިދީފައިވާ އެއްވެ އުޅުމާއި ޚިޔާލް ފާޅު ކުރުމުގެ މިނިވަންކަމަކީ ޤަރާރަކުން ހުއްޓުވޭނެކަމެއް ނޫންކަމަށެވެ.
